پاکستاني چارواکي وايي ښايي د وژل شويو کسانو شميره خورا ډيره وي .

د پاکستان حکومت وايي د هغې زلزلې له امله چې د شنبه په ورځ ( د تلې ١٦ د اکتوبر ٨ ) وشوه ښايي ځاني زيان او د ودانيو تاوان خورا زيات وي .

دا په تيرې يوې پيړۍ کې په دغې سيمې کې تر ټولو لويه زلزله وه چې د ريختر په کچه ٧.٦ ښکاره شوه .

د زلزلې مرکز د پاکستان تر ولکې لاندې د کشمير مرکز مظفر اباد ته نژدې و . د مځکې د ښوويدو له امله ډير مهم سړکونه بند شوي ، ودانۍ نړيدلي او ځينې ښارگوټي او کلي له يو مخې له خاورو سره خاورې شوي دي .

دا لا معلومه نه ده چې څومره کسان به وژل شوي وي خو د پاکستان له شمال څخه رپورټونه ښيي چې په زرگونو مړينې تاييد شوي دي .

په دغو کې په شمال لويديځ سرحد ايالت کې ١٦٠٠ مړينې هم شاملې دي . په دوى کې نژدې دوه سوه ماشومان وو چې د ښوونځي په نړيدو کې ووژل شول .

د افغانستان په ختيځ کې دوه ماشومان د دغې زلزلې له امله مړۀ شوي . د ولسمشر کرزي دفتر .

زلزلې د پولې پورې غاړې د کنترول له کرښې ها خوا د هند تر ولکې لاندې کشمير کې هم سيمې اغيزمنې کړي دي هلته چارواکي وايي چې تر ٣٠٠د ډيرو کسانو مړينه معلومه ده .

په سيمه کې گڼ شمير واړۀ ښارگوټي ويجاړ شوي دي . هندي مامورين وايي داسې رپورټونه دي چې په سلگونو کسان دغلته هغه وخت ټپيان شوي دي چې په کشمير او گاونډي ايالت هندي پنجاب کې له نړيدونکو ودانيو تښتيدل .

په داسې حال کې چې د مځکې ښوييدنې سړکونه تړلي هندي چارواکي چورلکې کاروي چې سخت اړين توکي د کشمير ځينو سيمو ته ورسوي په دغو توکو کې خيمې هم شته .

دغلته په غرونو کې د تودوخې کچه د شپې له خوا تر صفر درجې کښته کيږي .

بل پلو د افغانستان د ولسمشر حامد کرزي د وياند له دفتره خپور شوى يو خبر ښيي چې د افغانستان په ختيځ کې د همدغې زلزلې له امله دوه ماشومان وژل شوي دي . ولسمشر کرزي له وژل شويو کسانو سره خواشيني وښووله .