'د طالبانو مشر ته نژدې کس ملا شیرین اخوند نژدې راتلونکې کې پاکستان ته ځي'

ښکاري چې پاکستان ته د طالبانو د حکومت او کابل ته د سیاسي – مذهبي څېرو له رازونو ډک سفرونه او راشه درشه د دواړو لورو تر منځ په اړیکو کې د وروستي کړکېچ کمولو لپاره ده خو دواړو خواوو لا په دې اړه له خلکو او رسنیو د دغو سفرونو معلومات پټ ساتلي.

پرون "ډان" پاکستانۍ ورځپاڼې خبر ورکړ چې د طالبانو مشر ته نږدې کس چې د کندهار لپاره د طالبانو د حکومت والي هم دی د پاکستان او طالبانو د حکومت تر منځ اړیکو ښه کولو لپاره په څو ورځو کې د پاکستان پلازمينې اسلام آباد ته ځي.

د ورځپاڼې له قوله چې هغه به هلته د پاکستان د بهرنیو چارو وزارت او استخباراتي ادارې له چارواکو سره ګوري او خبرې کوي.

بي بي سي هڅه وکړه چې په دې اړه د طالبانو د حکومت غبرګون ولري خو د طالبانو ویاند ذبیح الله مجاهد وویل چې په دې اړه معلومات کوي او له هغې وروسته نظر څرګندوي.

ډان ورځپانې د ملا شیرين آخوند سفر مهم ارزولی او لیکلي یې دي چې هغه د طالبانو مشرتابه ته نږدې کس دی او د طالبانو په رهبرۍ او مهمو چارو کې د ښکېلتیا په خاطر مهم شخص دی.

پاکستاني رسنۍ هغه هېواد ته داسې مهال د دغه طالب چارواکي د ورتګ خبر ورکوي چې له دې وړاندې یادو رسنیو د پاکستان د یوه سیاسي ګوند مشر فضل الرحمن ته د طالبانو د رسمي بلنې خبر ورکړی و او د راپورونو له مخې ټاکل شوې نوموړی به د جنورۍ پر درېیمه کابل ته لاړ شي.

د طالبانو د حکومت ویاند ذبیح الله مجاهد که څه هم دغه پاکستاني مذهبي او سیاسي حزبي مشر ته د خپل حکومت بلنه تأیید کړې وه خو په دې اړه يې نور جزئيات نه دي ورکړي چې هغه به له چا چا سره ګوري او پر کومو موضوعاتو ټاکلې د دوی حکومت خبرې ورسره وکړي.

خو ښاغلي مجاهد ویلي وو چې دوی غواړي د پاکستان خلک د طالبانو د حکومت له نیت او ارادې خبر کړي.

که څه هم د پاکستان د بهرنیو چارو وزارت د طالبانو د حکومت لخوا د هغه بلل کېدل او افغانستان ته یې سفر یوازې د یوه شخص شخصي بلل کېدل بللي وو، خو تازه پاکستانیو رسنیو راپور ورکړی چې له هغه سره به په دې سفر کې نور علما هم ګډون لري.

د دغو ورځپاڼو د راپورونو له مخې ټاکلې چې د دوی خبرې د پاکستاني طالبانو پر موضوع ورټولې وي.

پاکستان ادعا کوي چې ټي ټي پي د افغانستان په خاوره کې پټن‌ځایونه لري او له هغه ځایه په پاکستان کې بریدونه کوي، هغه ادعا چې د طالبانو حکومت بیا بيا رد کړې.

تازه د پاکستان جیونیوز خبري شبکې خبر ورکړی چې د دغه هېواد د پوځ د مطبوعاتو له قوله راپور ورکړی چې د افغانستان له خاورې په شمالي وزیرستان کې په یوه پوسته برید کې یو پاکستانی سرتېری وژل شوی.

دغه بنسټ دا ادعا هم کړې چې د افغانستان له خاورې پاکستان ته د پټو ور اوښتو پر مهال د دوی په ټکو درې ترهګر وژل شوي.

که څه هم په افغانستان کې د طالبانو حکومت په دې تړاو څه نه دي ویلي خو په ټولنیزو رسنیو کې داسې تصویرونه خپاره شوي و چې ګنې په زابل کې د ډېورنډ کرښې له پورې غاړې په یوه برید کې درې ملکي وګړي وژل شوي دي.