روسيې او عربي ټولنې په ګډه غزه کې د اوربند غوښتنه کړې؛ نتنیاهو وايي 'د حماس تر ختمیدو به جګړه روانه وي'

په غزه کې د اوربند لپاره غوښتنې مخ په ډېرېدو دي او په تازه ګام کې عربي ټولنې او روسیې په ګډه له ملګرو ملتونو د سملاسي اوربند پرېکړه لیک د تصوبیدو غوښتنه کړې.

د روسیې او عربي ټولنې د همکاریو ګډه ناسته نن د مراکش په کوربه توب جوړه شوه.

دا ناسته چې په عمومي ډول د دغو دواړو لورو په سیاسي او ډېپلوماټیکو موضوعاتو راڅرخي، نن یې د خبرو ډېره برخه په غزه کې د اسرائیلي ځواکونو د جګړې او بمباریو په اړه وه.

د روسیې د بهرنیو چارو وزیر سرګي لاوروف دغې ناستې ته وویل "مونږ هیله من یوو چې ملګري ملتونه د یوه سنجول شوي اوربند غږ جېګ کړي، روسیې پرېکړه کړې چې په دې اړه به له ملګرو ملتونو سره خپلو سلا مشورو ته دوام ورکوي."

دا په داسې حال کې ده چې د ملګرو ملتونو امنیت شورا پرون په غزه کې د اوربند پرېکړه لیک تصویب لپاره جلسه بللې وه خو د متن په سر له اختلافونو وروسته له رایې اچونې پاتې شوه.

د اسرائیلو لومړي وزیز نتنیاهو وايي د حماس تر ماتې به جګړه روانه وي.

په داسې حال کې چې د مصر او قطر په مرسته او د ګڼو هېوادونو په غوښتنه د اوربند په سر خبرو زور اخیستی، د اسرائیلو لومړي وزیر د سملاسي اوربند سره مخالفت اعلان کړی دی.

د اسرائیلو لومړي وزیر بنیامین نتنیاهو یوه بیان خپور کړی چې له مخې یې په غزه کې سملاسي اوربند تر پوښتنې لاندې راغلی او د بیا اورنبد لپاره د روانو هڅو نښې نښانې هم پیکه برېښوي.

نتنیاهو ویلي "د حماس د بشپړ ختمیدو مخکې اوربند ناممکنه دی."

نوموړي ټينګار کړی چې "تر هغې چې خپلو ټولو ټاکل شویو موخو ته نه یوو رسیدلي، له جګړې لاس نه اخلو."

اسرائیلو بیا بیا ویلي د حماس د بشپړ ختمولو، د یرغمل شویو کسانو خوشي کېدو او له غزې د هر ډول ګواښ له منځه وړلو پورې به یې عملیات روان وي.

له دې سره هممهاله د اسرائیلو ولسمشر بیا داسې اشاره ورکړې چې ګواکې دوی یوه بل بشردوستانه اوربند ته چمتووالی نیسي.