ډونلډ ټرمپ په ټاکنو کې د درغلیو په قضیه کې "بې ګناه" دی
د عکس سرچینه، BILL HENNESSY
د امریکا مخکېني ولسمشر د واشنګټن ډي سي په یوه محکمه کې پر هغو تورونو اعتراف نه دی کړی چې ګواکې هغه دې د ۲۰۲۰ کال په ټاکنو کې په خپله ګټه درغلي کړې او یا د خپل واک غځېدو ته دسیسه جوړه کړې وي.
ډونلډ ټرمپ دا څرګندونې د امریکا په وخت پرون ماسپښين داسې مهال وکړې چې په محکمه کې د خپل نوم او عمر د تايید لپاره یوې لنډې محاکمې ته حاضر شو او ویې ویل چې "بې ګناه" دی.
دا په تېرو څلورو میاشتو کې درېیم وار دی چې ښاغلی ټرمپ د جنايي تورونو په قضیه کې محکمې ته حاضرېږي.
وروسته یې خبریالانو ته وویل چې ګواکې دا دوسیه د یوه سیاسي مخالف د ځپلو لپاره د ده پر ضد رامنځ ته کړای شوې ده.
د یادولو ده چې د امریکا دغه مخکېنی ولسمشر په دې تکل دی چې د جمهوري غوښتونکو ګوند له لوري د ۲۰۲۴ کال په ټاکنو کې برخه واخلي.
ښاغلی ټرمپ پرون پنجشنبې په واشنګټن کې محکمې ته د شا له دروازې ورننوت؛ هغې سیمې ته څېرمه چې د ۲۰۲۱ کال په جنورۍ کې د نارامیو شاهده وه.
د ۲۰۲۱ کال د جنورۍ پر شپږمه د ده قهرېدلو پلویانو په کانګرېس ماڼۍ باندې هجوم ورووړ او هڅه یې کوله چې د ټاکنو د پایلو اعلان مخه ونیسي.
په هماغه قضیه کې د ښکېلتیا په تور شاوخوا زر کسان هم په همدغه محکمه کې محاکمه شوي دي.
څلور تورونه
د عکس سرچینه، Reuters
د امریکا دغه ۷۷ کلن مخکېنی ولسمشر تر محاکمې مخکې له خپلو وکیلانو سره په خبرو لیدل شوی. همدا راز داسې ښکاري چې ډونلډ ټرمپ د دې قضیې له ځانګړي قاضي جېک سمېت سره هم خبرې کړې دي.
ښاغلی ټرمپ محکمې ته په خپله ځانګړې الوتکه "ټرمپ فورس وېن" کې لاړ چې وروسته د پټو پولیسو په ګډون د یوه لوی کاروان له لوري بدرګه شو.
د "بې ګناهۍ" په دې تازه قضیه کې څلور تورونه شامل دي
- د داسې دسیسې جوړول چې امریکا/امریکایان تېر ایستل شي
- د یوه رسمي بهیر (د ټاکنو د پایلو اعلان) پر وړاندې د خنډ رامنځ ته کولو لپاره دسیسه جوړول
- د یوه رسمي بهیر د ترسراوي مخه نیول
- د خلکو د حقونو پر ضد دسیسه جوړول
د یادولو ده چې د ۲۰۲۰ کال په ټاکنو کې ښاغلي ټرمپ د امریکا اوسني ولسمشر جوبایډن ته په لوړ توپیر ټاکنې وبایللې خو د ده ټاکنیزې ډلې د ټاکنو پر پایلو نیوکې کولې او نه یې منلې.
اوس قاضۍ ښاغلي ټرمپ ته ویلي چې د دې قضیې د حقایقو په اړه له چا سره خبرې ونه کړي.
همدا راز یې خبرداری ورکړی چې که داسې ونه کړي نو ښايي د نیولو امر یې وشي، د خوشي کېدو شرايط یې لغوه شي او محکمې ته د سپکاوي تور هم پرې ولګېږي.
د عکس سرچینه، Getty Images
د دې دوسیې څارنوالانو وویل چې دوی به له دې "ګړندۍ محکمې" ګټه پورته کړي خو د ښاغلي ټرمپ حقوقي ډلې او وکیلانو ویلي چې یوې "عادلانه او منصفانه" محاکمې ته د چمتوالي لپاره وخت ته اړتیا لري.
ډونلډ ټرمپ تر محاکمې وروسته او الوتکې ته تر ختلو مخکې خبریالانو ته په خبرو کې د تازه دوسیې په اړه وویل چې "دا د امریکا لپاره یوه ډېره غموونکې ورځ ده"
هغه د واشنګټن دیوالونو او ودانیو ته په کتو وویل چې "دا هغه ځای نه دی چې ما پرېښی و، د دې هر څه لیدل په ریښتیا هم خواشينوونکي دي" او د ټاکنو اړوند قضیې په اړه یې زیاته کړه چې ګواکې دا هر څه "د یوه سیاسي مخالف د ځپلو" لپاره طرحه شوي دي او "امریکا کې داسې څه باید نه وای پېښ شوي"
د امریکا دغه مخکېنی ولسمشر د امریکا په وخت پرون پنجشنبې ماسپښين د قاضۍ موکسیله اوپادیا په مخکې محاکمه شو او وروسته به د تانیا چتکان په نوم یوه بله قاضۍ د دې قضیې نظارت کوي.
