حشمت الله شهیدي: هندوستان سره سبانۍ لوبې ته پوره چمتووالی لرو

سبا ته په ډیلي کې د افغانستان او هندوستان ترمنځ د ۲۰۲۳ کال د کرکټ نړیوال جام لوبه ترسره کېږي.

نن او پرون افغان لوبډلې دغې لوبې ته د چمتووالي په موخه تمرینات وکړل.

نن سې شنبه د تمرین له پیل وړاندې د افغانستان د لوبډلې کپتان حشمت الله شهیدي په یوه خبري کنفرانس کې تمه وښودله چې ټیم به یې په راتلونکو لوبو کې ښه ولوبېږي.

د ښاغلي شهیدي په ټکو"یوازې د یوې لوبې د بایللو په سر حساب نه کېږي، موږ اته نورې لوبو لرو او د راتلونکې په اړه فکر کوو."

دا به دې جام کې دافغانستان دویمه سیالي وي چې کوربه هند ورسره مخ دی. لومړنۍ لوبه کې بنګله دېش افغانستان ته ماتې ورکړې وه.

د چارواکو په وینا، دې مېچ لپاره ټول ټکټونه پلورل شوي دي. دا په ډیلي کې روان جام کې هندوستان یوازېنۍ لوبه ده.

په خبري کانفرانس کې افغان کپتان نه وپوښتل شول دا چې په دې لوبه کې به د هند د لوبډلې پلویان ډېر وي په دې اړه خو څه اندېښنه نه لرئ؟ هغه وویل:

"موږ داسې حالت کې وړاندې هم لوبې کړي د مقابل لوري د پلویانو د شمېر په اړه اندېښنه نه کوو بلکې ټول پام به مو په خپلې لوبې وي."

د نړیوال جام د نن ورځې په نورو لوبو کې انګلنډ بنګله دېش ته په لوی توپیر ماتې ورکړه او شري لنکا بیا پاکستان ته د ۳۴۴ منډو هدف ټاکلی دی.

تر اوسه د شوو لوبو ترمخه د نیوزلیند ټیم د دوو لوبو ګټلو سره د جدول په سر کې دی.

دغه راز پاکستان،بنګله دېش، جنوبي افریقا او هندوستان هم خپلې لومړنۍ لوبو ګټلو سره جدول کې دوه دوه پواینټونه لري.