د هند لسو مساپر وړونکو الوتکو کې د بمونو د موجودیت ناسم رپوټونه؛ ګڼې الوتنې ځنډول شوې
د عکس سرچینه، Getty Images
تېرو دوو ورځو کې د هند هوايي شرکتونو اړوند په لږترلږه لسو مساپر وړونکو الوتکو کې د بمونو د موجودیت ناسمو مالوماتو نه یوازې دا چې د نړۍ بېلابېلو هوايي ډګرونو کې الوتنې ځنډولې بلکې د ځینو الوتکو لوري یا مسیرونه هم بدل شوي دي.
د سینګاپور هوايي ځواک سېشنبه د دې لپاره خپل دوه جنګي جټونه هوا ته پورته کړل، چې د اېنډیا اېکسپرېس هوايي شرکت یوه مساپر وړونکې الوتکه له استوګنیزو سیمو بل خوا تګ ته اړباسي.
په دې الوتکه کې هم د بم د موجودیت ناسم خبر ورکړل شوی و.
تر دې څو ساعته ورمخکې له ډيلي څخه شیکاګو ته یوه روانه مساپر وړونکې الوتکه په احتیاطي ډول د کاناډا په یوه هوايي ډګر کې ناستې ته اړوتې وه.
د هند په مساپر وړونکو الوتکو کې د بمونو د موجودیت ناسمې ګنګوسې نوې نه دي، خو روښانه نه ده چې له دوشنبې دغه رپوټونه ولې ناڅاپه زیات شول.
بيبيسي هڅه وکړه چې په دې تړاو د هند د ملکيهوايي چلن د امنیت د لوی ریاست غبرګون هم ولري، خو ځواب یې ترلاسه نه کړ.
پر 'ایر اېنډیا' سربېره انډيګو، 'سپایس جېټ' او اکاسا فلایټس شرکتونو ته هم د دوی په الوتکو کې د بمونو د موجودیت غلط مالومات ورکړل شوي وو.
دوشنبه له ممبی د دریېو ترسره شویو نړیوالو الوتنو لوري تر هغې وروسته واړول شول، چې د اېکس (پخوني ټویټر) له یوه ناپېژاند حسابه د ورانکارۍ خبرداری ترلاسه شو.
پولیسو په دې تړاو د څېړنو په لړ کې یو کم عمره کس نیولی دی.
سېشنبه د ایر اېنډیا د دوو مساپرو وړونکو الوتکو په ګډون څلورو نورو الوتکو ته د اېکس له یوه بل اکونټه ورته خبرداری ورکړل شو، خو وروسته د خواله رسنۍ دا حساب بند شو.
د اېکس له دغه اکونټ د خپاره شوي پیغام سکرین شاټ چې پولیس او هوايي شرکتونه هم پکې ټګ شوي، پر خواله رسنیو لاس په لاس کېږي.
د عکس سرچینه، Getty Images
ایر اېنډا ویلي، له چارواکو سره په دغه کار کې د ښکېلو کسانو پېژندلو کې مرسته کوي او دا چې د تورنو خلاف به قانوني ګامونه واخیستل شي.
د هند په مساپر وړونکو الوتکو کې د احتمالي ورانکارۍ د هر ډول اطلاع له خپرېدو سره سم د الوتنو د څار، پولیسو، بم شنډولو، امبولانسونو او روغتیا ادارې متحرکې کېږي.
د داسې خبرونو له خپرېدو سره له الوتکو د مساپرو سامانونه کښته او بیا له سره تلاشي کېږي.
د انجنیرۍ او امنیت ټیمونه هم له الوتنې مخکې الوتکه بیا له سره ګوري.
له دې کبله په الوتنو کې ځنډ هوايي شرکتونو او امنیتي ادارو ته د زرګونو ډالرو زیان اړوي.
د عکس سرچینه، Getty Images
چې کله په نړیوالو الوتنو کې د بمونو او ورانکارۍ د احتمال خبر ترلاسه شي، نو په سینګاپور او کانډا کې د دغو وروستیو الوتنو په څېر یې لوري او مسیرونه بدلېږي.
د سینګاپور دفاع وزیر سېشنبه وویل، چې د دوی دوو جنګي جټونو د اېنډیا اېکسپرېس مساپر وړونکې الوتکه د ملکي استوګنې له سیمې لېرې چانګي هوايي ډګر کې کښته کړه.
دا الوتکه د هند له مدورایی ښاره سینګاپور ته الوتې وه.
