محمد قاضي زاده له هرات څخه

	چارواکي وايي د درنې واورې لامله ځپل شوې سيمې له ښاره ليرې پرتې دي او تر اوسه پورې د مرستې لپاره څوک نه دي ور رسېدلي

چارواکي وايي د درنې واورې لامله ځپل شوې سيمې له ښاره ليرې پرتې دي او تر اوسه پورې د مرستې لپاره څوک نه دي ور رسېدلي.

د هرات د کلي د پراختيا مشر اقا محمد صديقي وويل په شينډنډ، غوريان، گلران او اوبې ولسواليو کې د مړو شمېره اوس ٦٠ ته رسېدلې.

په تېره يوه اوونۍ کې د افغانستان په بېلابېلو سړو سيمو کې درنې واورې وشوې چې له هرات سربېره په ځينو نورو ولايتونو کې يې هم خلکو ته د سر زيانونه اړولي دي.

ښاغلي صديقي وويل ١٧ نور کسان نادرکه شوي دي.

دۀ وويل د ملي پوځ هڅه کوي چې د خپلو وسايطو په کارونې سره ځپل شويو سيمو ته لار پيدا کړي او له خلکو سره مرسته وکړي، خو وايي تر اوسه لږ پرمختگ شوى دى.

دۀ وويل په ځينو سيمو کې تر يو نيم متر زياته واوره شوې چې لارې يې سختې پوښلې دي او ښايي ډېر وخت ونيسي چې مرستې ور ورسېدى شي.

په سيمه کې راگير خلک وايي دوى له خپلو کليو څخه تر پنځۀ کيلومتره زيات نه شي وتلى. تر ټولو ځپل شوې سيمه د ايران له سيمې سره پرته د غوريانو ولسوالۍ ده چې د هرات له مرکز څخه څۀ باندې ٦٠ کيلومتره ليرې پرته ده.

مخکې په هرات کې د وژل شويو کسانو شمېره ٤٥ ښوول شوې وه. په مخکينيو واورو کې په گاونډي نيمروز ولايت کې هم ١٣ تنه وژل شوي وو.