په نورستان کې سيمه ييزو چارواکو مخکې ويلي وو چې د ايساف بمبارۍ لږترلږه ١٢ سړک جوړوونکي وژلي

تېره ورځ ځايي چارواکو او نورو سرچينو ويلي وو چې د ناټو په مشرۍ د ايساف ځواکونو د يوې افغاني کمپنۍ پر سړک جوړوونکو بم اچولى او لږ تر لږه ١٢ کار کوونکي يې وژلي دي.

د ايساف د الوتکو په بمبارۍ کې د ١٢ سړک جوړوونکو مړينه د نورستان والي تميم نورستاني تاييد کړې وه. خو د هغۀ ولايت د ولايتي شورا مشر بيا دغه شمېره دوه برابره ښووله.

د ايساف ځواکونو يوې خبرپاڼې د نورگرام ولسوالۍ په بمبارۍ کې د ولسي خلکو د وژل کېدلو راپورونه رد کړې دي.

خبرپاڼې د ناټو ځواکونو د وياند کارلوس برنکو له خولې ويلي: '' موږ خورا زيات احتياط کوو چې په نښه شوې موخه وپېژنو او يوازې همدغه نښه ووهو.''

خبرپاڼه زياتوي چې له بريده وروسته هوا او پرځمکه ترسره شوې څېړنې ښيي چې د سړک جوړونې د شرکت د کار کوونکو ځاى د بمبارد له سيمې څخه تر يو کيلومتر زيات ليرې و. وايي په هغه ځاى کې چې د دوى الوتکو په نښه کړى و هېڅ د بيارغاونې وسايل هم نه و چې وښيي هلته کار روان و.

خبرپاڼه زياتوي چې د بمبارۍ نښه د ملا عبد الله جان په نامۀ يو طالب قومندان او ورسره پنځه نور وسله وال و چې له مورچې څخه تر يوې خيمې پورې د افغان او ناټو ځواکونو لخوا تر څارنې لاندي ول او بيا په خيمه کې پرې بم وغورځول شو. د خبرپاڼې په ټکو، له بمبارۍ وروسته يوازې پنځه مړي موندل شوي چې يو پکې د ملا عبد الله جان و.

خبرپاڼه وايي د پېښې په اړه د دوى پلټنې لاهم روانې دي، خو وايي باوري دي چې په بمبارد کې ولسي خلک نه، بلکې وسله وال طالبان په نښه شوي دي.

سږ کال د تاوتريخوالي په ترڅ کې ولسي خلکو ته تر تېرو شپږو کلونو خورا زياته مرگ ژوبله ور اوښتې ده. په تېرو څو مياشتو کې د بهرنيو ځواکونو په گڼو عملياتو کې د ولسي خلکو د مرگ ژوبلې راپورونه ورکړل شوي دي، چې د بشر حقونو د موسسو او افغان حکومت اندېښنې يې زياتې کړې دي.