جعفر هاند له کابله

	حامد کرزي د بغلان په ولايت کې د پرونۍ چاودنې له امله د ولسي جرگې د استازو په گډون ٤١ تنو افغانانو د وژل کيدو په وير کې ددرې ورځيني ملي ماتم اعلان وکړ

دى دنورو ورځو په پرتله ډيرخواشينى بريښيده اووېويل چې پلټنې يې پيل کړي دي چې د بريد ترسره کوونکي څرگند کړي.

ده وويل له کابل څخه د پوليسو ځانگړې ډلې د پيښې سيمې ته ورغلي دي چې څيړنې بشپړې کړي.

ولسمشر د پروني بريد له امله يې د ولسي جرگې د استازو، د ښونځيو د زده کونکو، ښونکو او قومي مشرانو د مړينې په وير کې يې درې ورځينى ماتم اعلان کړ.

افغان ولسمشر حامد کرزي وويل چې په دې پيښه کې ٤١ تنه وژل شوي دي چې ٦ يې د ولسي جرگې غړي دي.

په دې بريد کې نژدې ١٠٠ تنه نور ټپيان شوي هم دي.

حامد کرزي وويل چې د ملي ماتم په لړ کې به د افغانستان جنډه په هيواد کې دننه او بهر نيمه ځوړنده وي.

افغان ولسمشر په بريد کې د ولسي جرگي د وژل شو او ژوبل شوغړو نومونه يو په بل پسي ياد کړل.

ده دافغانستان د پارلمان د اقتصادي جرگه گۍ د مشرنوم واخيست او د سوداگرۍ پخوانى وزير مصطفى کاظمي يې يو مجاهد او د ولس خدمتگار وباله.

که څه هم افغان ولسمشر د دې بريد په تړاوو د پړې گوته کومې ځانگړې ډلې يا شخص ته ونه نيوله خودغه پيښه يي د خپل هيواد د دښمنانو کار وباله.

ده وويل افغان ولس له هغه څه لوړ دى چې د هيواد دښمنان يې په اړه فکر کوي.

کرزي د پارلمان د وژل شو غړو اوپه پيښه کې د عادي افغانانو د دجنازې د مراسمو د ترسره کولودبهير مشري دپارلمان په چارو کې افغان وزير ډاکټر فاروق وردک ته وسپارله.

ولسمشر دملي جرگې د هغې پريکړې ننگه وکړه چې وايي وژل شوي استازې دې دولسي جرگې ودانۍ ته څيرمه خاورو ته وسپارل شي.

خو دا لا روښانه نه ده چې د وژل شو وکيلانو کورنۍ دولسي جرگې پريکړې ته غاړه ږدي کنه؟
دغه بريد تيره ورځ دصنعتي بغلان په ښارگوټي کې هغه مهال وشو چې د ولسي جرگې پلاوى د مصطفى کاظمي په مشرۍ دبورې د فابريکې د ليدو لپاره دغلته ورغلى وو.
ټاکل شوې ده چې نن د پيښې قربانيان خاورو ته وسپارل شي.

دا په تېرو شپږو کلونو کې دحامد کرزي پرواکمنۍ چې د لويديځ له بشپړملاتړ څخه برخمنه ده تر ټولو مرگونى گوزار بلل کيږي.