حنان حبيبزى له کابله

	د افغانستان د ښځو د فټبال د ملي لوبډلې لوبغاړو وويل چې دوى د پاکستان د لوبډلو په وړاندې ښه چمتوالى لري

د پاکستان د فټبال دفډراسيون يو چارواکي بي بي سي ته وويل چې د افغانستان په لوبډله کې ١٨ لوبغاړې او درې تنه لارښودان گډون لري .

چارواکي وويل چې د افغانستان د فټبال د ښځو د ملي لوبډلې غړې ستړې وې نوځکه يې د راتگ د ځنډ پوښتنه نه ده کړې .

د پاکستان د ښځو د فټبال څلورمه اتلولي دپنجشنبې په ورځ د اسلام اباد د جناح په لوبغالي کې پيل شوې ده او دوه سيالۍ هم ترسره شوي دي .

د افغانستان لوبډله به جمعې په ورځ ارام وکړي او دشنبې په ورځ به د گډون لپاره لوبغالي ته ورشي .

خو دا نه ده څرگنده چې افغانستان به لومړى د پاکستان له کومې لوبډلې سره خپل بخت ازمايي.

له دې وړاندې د افغانستان د فټبال ىوې وتلې لوبغاړې خاټول امرخيل بي بي سي ته وويل چې دوى به د پاکستان د ښځو د ملي لوبډلې سره بيره له نورو سيمه ييزو لوبډلو سره هم سيالي کوي .

خو د افغانستان لوبډله په ځنډ ورورسيده . د پاکستان د فټبال په فډراسيون کې د ښځو د څانگې مشرې روبينه عرفان وار له مخه د افغانستان د لوبډلې په اړه خپل دريځ روښانه کړى دى.

دې ويلي دي که د افغانستان د ښځو د فټبال ملي لوبډله د جمعې تر ماسپيښينه هم راورسيږي نو دوى به په اتلولۍ کې د لوبيدو وخت ورکړي .

که څه هم د پاکستان دا گام د فيفا له ارونو سره سر نه خوري خو د پاکستان دفټبال دې چارواکې وويل چې افغانستان د پاکستان د ورور په څير دى .

دې دا خبره هم وکړه چې په پاکستان کې د ښځو د فټبال لوبډلې نوې هڅه کوي چې له نورو هيوادونو سره د سيالۍ جوگه شي نو ځکه په دې برخه کې د فيفا په قوانينو کې نرمي شته دى .

د افغانستان لوبډله وايي چې دې لوبو ته يې ښه چمتوالى نيولى دى او ددوى د کورنيو د غړو له خوا هم ډيرې هڅيدلي دي .