تښتوونکو له افغانستان څخه د الماني سرتېرو د وتلو غوښتنه کړې وه

د بهرنيو چارو د وزارت يوۀ وياند، سلطان احمد بهين، بي بي سي ته وويل دوى باور لري چې يو يو المانى سړى د زړۀ د درېدا لامله مړ شوى او دويم يې لاهم ژوندى دى.

وړاندې، طالبانو ويلي و چې دواړه الماني سړي يې يو پر بل پسې وروسته له هغه ووژل چې الماني حکومت د دوى غوښتنو ته پام ونه کړ.

دغه دوه سړي تېره چهارشنبه يې د غزني او ميدان وردگو ولايت تر منځ له يوې سيمې څخه تښتول شوي وو.

د طالبانو يوه وياند، قاري يوسف احمدي، مخکې ويلي و دوى نن (شنبه) د غرمې ١٢ بجو پورې د المان حکومت ته مهالوېش ورکړى و چې خپل سرتېري له افغانستان څخه وباسي، که نه نيول شوي وگړي به يې ووژل شي.

قاري يوسف وويل دوى له دوولسو بجو ورسته پنځه دقيقې نور هم انتظار وکړ، خو کله چې يې د خپلو غوښتنو په وړاندې څه ځواب تر لاسه نه کړ، يو نيول شوى سړى يې وواژه او ساعت وروسته يې دويم هم وويشت.

د المان د بهرنيو چارو وزارت وايي دوى د طالبانو ادعا سخته جدي نيولې، خو د خپلو وگړو د وژنې خپلواک تاييد يې نه دى ترلاسه کړى.

د المان مشرې، انگيلا ميرکل وړاندې اعلان کړى و، چې د طالبانو په غوښتنه به له افغانستان څخه هغه سرتېري ونه باسي چې د ناټو تر مشرۍ لاندې دلته مېشت شوي دي.

دغه دوه المانيان د چهارشنبې په ورځ په جغتو ولسوالۍ کې هغه له خپلو شپږ تنو افغان همکارانو سره وتښتول شول چې د يوۀ بند د جوړونې په کار پسې تللي ول.

طالبانو همدارنگه په غزني ولايت کې ١٨ عيسوي کوريايان هم نيولي چې د هغوى د خوشي کولو لپاره يې هم د جنوبي کوريا له حکومت څخه ورته غوښتې کړې دي.