لاوروف: په رسمیت د طالبانو حکومت پېژندنه له وخته مخکې خبره ده

د روسیې بهرنیو چارو وزیر سرګي لاوروف وايي، په رسمیت د طالبانو حکومت پېژندلو موضوع له 'وخته مخکې ' خبره ده.

د روسیې له تاس خبري اژانس سره یوه مرکه کې چې د دسمبر پر ۳۱ مه د روسیې بهرنیو چارو وزارت پر وېبپاڼه هم خپره شوې، ښاغلی لاوروف وايي، د اوس لپاره به په رسمیت د طالبانو حکومت پېژندلو موضوع له وخته مخکې خبره وي.

نوموړی زیاتوي:

'' یو مثبته پرېکړه په دې پورې تړاو لري، چې په افغانستان کې وضعیت څه ډول بڼه غوره کوي، یا به مناسبه وي که ووایم، چې هغه وخت چې طالبان د یوه پراخګډونه حکومت رامنځته کولو، د افغانستان له خاورې د ترهګرۍ او مخدره موادو په څېر مسایلو سره مبارزې لړ کې خپلې ژمنې پوره کړي. ''

نوموړی وايي، روسیه به د دې موضوع سره په تړاو له نړیوالې ټولنې سره په شریکه د ملګرو ملتونو د بندیزونو له نوملړه د طالبانو لېرې کولو پر لور تدریجي پرمختګ وکړي، ''چې په رسمیت د افغانستان نوي حکومت پېژندلو ته زمینه برابره شي. ''

په ورته مهال ښاغلي لاوروف ویلي، مسکو په کابل کې د خپل سفارت له لارې په افغانستان کې د طالبانو حکومت له استازو سره په اړیکه کې دی.

د یادونې ده، چې تېره اونۍ د روسیې ولسمشر ولادیمیر پوتین هم وویل چې طالبان باید د خپل حکومت ټولګډونوالی باوري کړي.

هغه یوې خبري غونډې ته دا هم وویل چې مسکو به د طالبانو د حکومت د رسمیت - پېژندنې په تړاو له نړیوالې ټولنې سره په ګډه پرېکړه کوي.

ښاغلي پوتین روسیې ته له افغانستانه د مخدره توکو قاچاق او د مرکزي اسیا هغو هېوادونو ته چې له روسیې سره پوله لري، په احتمالي ډول د اورپکو ننوتل د اندېښنې وړ مسایل وبلل.