ټاکنیزې ناندرۍ؛ د عبدالله زرګونو پلویانو په کابل کې لاریون وکړ

د افغانستان ولسمشرۍ ټاکنو ته د نوماند عبدالله عبدالله پلویانو نن په کابل ښار کې لاریون وکړ او د دوی په وینا "د ټاکنو کمېسیون له خوا د قانون ماتولو" پر ضد یې شعارونه ورکړل.

د ثبات او همپالنې ټاکنیزې ډلې په زرګونو پلویان نن جمعه (لیندۍ ۸) ولسمشرۍ ماڼۍ ته نژدې پښتونستان واټ کې سره ټول شوي ول.

د لاریون په پای کې پرېکړه لیک کې د ټاکنو پر کمېسیون او نړیوالې ټولنې غږ شوی چې د خلکو غږ ته دې غوږ ونیسي.

لاریون ماسپښین مهال په سوله ییز ډول پای ته ورسېد.

پرون د ټاکنو کمېسیون مشرې حوا علم نورستانۍ په یوه خبري غونډه کې ټینګار وکړ چې دوی ته قانون لومړیتوب لري او د هېڅ چا د غوښتنو پر اساس د ټاکنو قانوني بهیر مخته نه وړي.

د ثبات او همپالنې ډلې تر لاریون وروسته په خپل پرېکړه لیک کې د بې بایومتریکه ۳۰۰ زره رایو پر ابطال ټینګار کړی چې که ونه شي د دوی په وینا "د ټاکنیز سیاسي بحران مسولیت" به یې د ټاکنو د کمېسیون پر غاړه وي.

خو د کمېسیون مشرې پرون د ۳۰۰ رزه جنجالي رایو په اړه وویل چې هم بایومټریک معلومات لري او د دغو ټولو رایو د پایلو په فورمو د ټاکنیزو ډلو او ټاکنڅارو ډلو لاسلیکونه شته چې د اغلې نورستانۍ په خبره دا ښيي چې له ټاکلي وخت مخکې او وروسته رایې نه دي کارېدلي.

سره له دې چې د کابل ګارنیزیون پرون په یوه اعلامیه کې د اعتراض کوونکو له پاره حضوري چمن ټاکلی و خو دوی چې تر دې وړاندې یې پښتونستان واټ غوره کړی و همالته سره ټول شول.

د ټاکنو کمېسیون ویلي چې که په اووه ولایتونو کې د رایو د بیا شمېرنې لپاره بیا هم اجازه ورنه کړل شي، د قانون له مخې به په اړه راتلونکې پرېکړې وکړي. خو کمېسیون دا نه دي ویلي چې راتلونکې ګامونه به څه وي.