د هرات ولایتي شورا غړو تر منځ فزیکي شخړه

د هرات د ولایتی شورا د مشر او یوه غړي ترمنځ د لفظی شخړې او د دوی د ساتونکو له خوا په شویو ډزو کی لږ تر لږه څلور تنه ټپیان شوي دي.

یوې باوري سرچینې بي بي سي ته وویل، د هرات ولایتي شورا مشر کامران علیزي او د شورا یوه غړی غلام حبیب هاشمی تر منځ د ولایتي شورا په دفتر کې لومړی لفظي شخړه وشوه او بیا یې ساتونکو ډزې وکړې.

د هرات پخوانی والي په زندان محکوم شو

"هرات کې د ټاکنو کمیسیون تړل شوی دفتر بېرته پرانیستل شو"

رسمي سرچینو د شخړې د انګیزې او د چا ټپي کېدو په اړه څه نه دي ویل شوي، خو د هرات د والی له دفتره په یوه خپره شوې پاڼه کې ویل شوي، د پېښې څېړنې لپاره یو ګډ پلاوی ګومارل شوی دی.

خبر پاڼه کې ویل شوي، هر څوک چې پېښه کې ګرم وپېژندل شي، قانوني چلند به ورسره کېږي. چارواکي وايي، ځانګړو ځواکونو د ولایتي شورا دروازه تړلې ده، نامسووله وسله وال او د ولایتي شورا د غړو ساتونکي یې له سیمې ایستلي دي.

د هرات ولایتي شورا یوه غړي هم بي بي سي ته وویل، د ولایتي شورا دوه غړي په فزیکي نښته او د یوه بل پر مخ د چایو پیالو ګوزار کولو له کبله برسېرن ټپیان شوي دي.

نوموړی زیاتوي پېښه کې دوه ساتونکي د ډزو له کبله ټپیان شوي دي. د هرات ولایتي شورا مشر او نورو غړو په دې تړاو تر اوسه څه نه دي ویلي.