یونما: سږ کال د هوايي بریدونو له امله ولسي مرګ ژوبله ٪۵۲ ډېره شوې

د ملګرو ملتونو دغه اداره وايي، د تېر کال شپږو میاشتو پرتله د سږ (۲۰۱۸) کال همدې موده کې، افغانستان کې د هوايي بریدونو له امله ولسي مرګ ژوبله ۵۲ سلنه ډېره شوې ده.

یونما دا رپوټ په داسې مهال خپور کړی، چې تېرو دوو ورځو کې افغانستان کې د هوايي بریدونو له کبله د ولسي وګړو د وژل کېدو خبرونه خپاره شوي.

کابل کې د ملګرو ملتونو مرستندویه پلاوي یونما دفتر د سپټمبر ۲۵مه (تله ۳مه) یوه خبرپاڼه کې ویلي، په روان کال کې د هوايي بریدونو له کبله د ملکي وګړو مرګ ژوبله ډېره شوې ده.

یونما پخپل راپور کې زیاتوي: "دې ماموریت د هوايي بریدونو ۵۲ سلنه د افغانستان هوايي ځواک ته، ۴۵ سلنه نړیوالو نظامي ځواکونو ته او پاتې نور ۳ سلنه نا پېژندل شوو دولت پلوه ځواکونو ته منسوبه کړې."

د یونما د رپوټ له مخې، د افغانستان شخړه کې د روان کال د لومړۍ نیمايي ملکي تلفاتو کابو اوه سلنه هوايي عملیاتو ته منسوبه شوې.

جغتو کې بمبار؛ وژل شوي طالبان دي که ولسي وګړي؟

یوناما: د ولسي وګړو د مرګ ژوبلې مخنیوی شونی دی

"د کندوز هوايي برید ولسي خلکو ته مرګ ژوبله اړولې"

یونما د تېرې شنبې په ورځ کاپیسا ولایت کې د ولسي وګړو وژل کېدو ته په اشاره ویلي، تګاب کې د یوه ښوونکي پر کور هوايي برید د ماشومانو او ښځو په ګډون د کورنۍ نهه غړي ووژل او ګڼ نور ټپیان کړل.

یونما د جګړې له دواړو غاړو د نښتو او جګړو پرمهال د ولسي وګړو د مرګ ژوبلې د مخنیوي غوښتنه کړې ده.

د پرېکنده ماموریت غبرګون

په افغانستان کې پرېکنده ماموریت یوه خبرپاڼه کې د یونما د راپور په اړه غبرګون کې ویلي، د کاپیسا عملیاتو په اړه معلومات څېړي او پایلې به یې وروسته شریکې کړي:

"موږ اوسمهال د کاپیسا د پېښې په تړاو ټول عملیاتي، اړوند او باوري معلومات څېړو. په دې کې هغه معلومات هم دي چې افغان لوري او د کلیو مشرانو موږ ته راکړي. موږ به په دې تړاو وروستي معلومات شریک کړو."

یونما د وردګو ولایت جغتو کې هوايي برید ته، چې د کاپیسا له برید وروسته وشو، هېڅ اشاره نه ده کړې.

د افغانستان دفاع وزارت د تېرې دوشنبې په ورځ وویل، د جغتو ملا حافظ کلي کې یې د وسله والو طالبانو یو زندان په نښه کړی، چې ګڼ طالبان یې پکې وژلي.

خو د سیمې خلک وايي، په دې برید کې د ماشومانو او ښځو په ګډون ګڼ ولسي وګړي وژل شوي.

یونما وايي، د روان کال لومړیو شپږو میاشتو کې د هوايي بریدونو له امله دوی د ۱۴۹ ولسي وګړو وژل کېدل او ۲۰۴ نورو ټپي کېدل مستند کړي.

دا هم د لوستلو دي: