"کندوز کې د بهرنیو ځواکونو بمبارۍ۱۰ ولسي وګړي وژلي"
د عکس سرچینه، Getty Images
په داسې حال کې چې افغانستان کې د پرېکنده ملاتړ بهرني ځواکونه وايي، د کندوز بمبارۍ کې ولسي وګړي وژل ردوي، د ملګرو ملتونو سیاسي استازولۍ (یونما) وايي، په یاده بمبارۍ کې لږترلږه ۱۰ ولسي وګړي وژل شوي.
یونما پر ټویټر لیکلي، د باوري رپوټونو له مخې د روانې نومبر میاشتې پر څلورمه، د کندوز چاردره ولسوالۍ کې د وژل شویو په ډله کې لس ولسي وګړي دي.
سرچینه وايي، دوی له ګڼو ژغورل شویو، روغتیاپالو، د سیمې له قومي مشرانو او نورو خلکو سره خبرې کړې چې د ټولو په اند د بمبارۍ قربانیانو کې ولسيو ګړي وو.
تېره ورځ په افغانستان کې د ناټو په مشرۍ د پرېکنده ملاتړ بهرنيو ځواکونو د کندوز په چاردره کې د ولسي وګړو مرګ ژوبله رد کړه.
د تېرې یکشنبې په ورځ د کندوز د ولایتي شورا یوه غړي له بي بي سي سره خبرو کې وویل، چې د چادرې په یوه سیمه کې ۱۴ ولسي وګړي وژل شوي او ۱۳ ټپیان دي.
د ناټو په اعلامیه کې راغلي چې په سیمه کې یې عملیات کړي او ګڼ شمېر وسلوال یې وژلي دي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د ډونلډ ټرمپ د نوې ستراتیژۍ له مخې په افغانستان کې د بهرنیو ځواکونو هوايي عملیات ډېر شوي، خو د دې عملیاتو له امله ولسي مرګ ژوبله هم ډېره شوې ده.
یونما وايي، دوی د امنیت شورا په همغږۍ د ولسي وګړو د وضعیت او مرګ ژوبلې په اړه بې پرې رپوټونه خپروي.
یونما وايي، په افغانستان کې د عبادت پر ځایونو په ۴۲ بریدونو کې لږترلږه ۲۶۱ کسان وژل شوي او ۵۷۲ نور ټپیان شوي، چې یونما دا یو ناانساني عمل بللی دی.
د عکس سرچینه، UNAMA
