افغانستان: ایران دې د سوریې جګړې ته افغان کډوال نه لېږي

د افغانستان د بهرنیو جارو وزارت له ایراني چارواکو په تېره سپاه پاسدران غواړي چې په هغه هېواد کې میشت افغان ځوانان او تنکي زلمیان د سوریې جګړې ته ونه ګوماري.

د وزارت ویاند احمد شکیب مستعني بي بي سي ته وویل، په ایران کې افغان کډوال په زور او هیلې ور کولو سره د نړیوالو اصولو خلاف چارو ته مجبورېږي.

ښاغلی مستغني وايي، د سوریې جګړې ته د افغان تنکیو زلمیانو د لېږلو او هلته د وژل کېدو په اړه یې د ایران په ګډون نورو کوربه هېوادونو ته خپله اندېښنه څرګنده کړې ده.

* ایران دې د جګړې لپاره د "افغان ماشومانو ګومارلو لړۍ ودروي"

* "د ایران له خوا د سوریې جګړې ته د کم عمره افغان ځوانانو لېږل جنګي جرم دی"

"دغه مسله مو د یوې جدي اندېښنې په توګه په بېلابېلو کچو د ایران له اسلامي جمهوریت سره مطرح کړې. ان په نړیوالو ناستو او ټولنو کې مو دغه اندېښنه څرګنده کړې ده".

هغه وویل مخکې دوی ته ویل شوي وو چې دغه کسان په داوطلبانه ډول د سوریې جګړې ته لېږل کیږي خو اوس څرګنده شوې چې ځینې دغه تنکي زلمي په زور هم استول شوي دي.

شکېب مستغني وايي، که افغان کډوال خپل خوښي هم د سوریې جګړه کې ګډون کوي، بیا هم د کډوالو، ماشومانو او تنکیو ځوانانو حقونو ته په پام ایران باید د دوی د مخنیوي لپاره اړین ګامونه پور ته کړی.

د افغانستان د بهرنیو چارو وزارت له دې څرګندونو دوه ورځې مخکې د انساني حقونو د څار سازمان هم پر ایران غواړي چې په جګړه کې دې د ماشومانو کارولو لړۍ ودروي.

دا اداره وايي د ایران انقلابي ساتونکي( سپاه پاسدران) په سوریه کې د بشارالاسد رژیم په پلوي جګړې ته ان ۱۴ کلن افغان ماشومان استولي دي.

دې ادارې له ملګرو ملتونو د دغه کار په اړه د څېړنو غوښتنه کړې ده.

* په ایران کې د افغان زدکوونکو ښوونځی تړل کېږي

* "ځینې افغانان د بې وزلۍ له کبله سوریه کې د ایران په پلوۍ جنګېږي"

سوریې ته د لېږل شویو او وژل شویو افغان ځوانانو او تنکیو زلمیانو کره شمېره لا هم نه ده معلومه.

خو د انساني حقونو د څار سازمان ویلي و، وړاندې تر دې یې داسې سندونه ترلاسه کړي وو چې ایران کې یو شمېر افغان کډوال په ایران کې د اوسېدو قانوني سندونو ترلاسه کولو په موخه هم د سوریې جګړې ته زړه ښه کوي.

د دې ادارې د رپوټ له مخې، له ۲۰۱۳ کال راهیسې،‌ ایران زرګونه افغانان روزلي او ځینې یې په سوریه کې د ایران د انقلابي ګارد اړوند فاطمیون په کنډک کې جګړې ته ګومارلي دي.