نورې بلک هاک چورلکې هم افغانستان ته ورسېدې
د عکس سرچینه، RSM
د افغانستان دفاع وزارت وايي، څلور نورې "بلک هاک" چورلکې افغانستان ته را رسېدلي چې ژر به رسماً افغان هوايي ځواکونو ته وسپارل شي. د دفاع وزارت وياند دولت وزيري بي بي سي سي ته وويل:
"افغانستان ته د نويو بلک هاک چورلکو په رارسېدو اړينې تعليمي الوتنې تر سره شوې او ټاکل شوې د راتلونکې اکتوبر مياشتې پر اوومې نېټې رسماً افغان ځواکونو ته وسپارل شي."
افغان ځواکونو ته د بلک هاک چورلکو ورکړه د اافغانستان هوايي ځواک د پياوړتيا تگلارې برخه ده. ښاغلى وزيري وايي، له دغو چورلکو به په هوایي عملیاتو کې د اړتیا پر مهال ګټه واخيستل شي.
څو ورځې وړاندې د ناټو په مشرۍ پرېکنده ملاتړ ځواکونو، لومړنی بلک هاک چورلکه افغان پوځ ته وسپارله.
ناټو وايي، افغان پوځ ته دا ډول چورلکې ور کول به د افغان هوايي ځواکونو د پراختیا، مهارت او ټیکاو سبب شي. د ټانکونو او سپکو وسلو په ګډون اوس د افغان پوځ ټول تجهیزات امریکايي دي.
پوځ ته د امریکايي چورلکو ور کول د دې ځواکونو ترمنځ همغږي زیاتولی شي. افغان ولسمشر محمد اشرف غني ويلي امریکا د افغان هوايي ځواکونو د ملاتړ لپاره ۸۶۰ میلیون ډالره مرسته کړې.
په پام کې ده چې امریکايي ځواکونه تر ۲۰۲۱ کال پورې ۱۵۹ بلک هاک چورلکې افغان حکومت ته ور کړي.
