د اقلیمي بدلون په اړه دوبۍ کې کلنۍ غونډې ته طالب استازي نه دي بلل شوي
د عکس سرچینه، Getty Images
په افغانستان کې د طالبانو حکومت وايي په متحده عربي اماراتو کې د اقلیمي بدلون په اړه روانې غونډې ته د طالبانو د حکومت استازي نه دي بلل شوي.
د "کاپ ۲۸" په نامه دغه غونډه نن (پنج شنبه) په دوبۍ پیل شوه چې د ډیسمبر تر ۱۲مې به روانه وي.
کاپ ۲۸ داسې کلنۍ غونډه ده چې حکومتونه پکې د راتلونکو ممکنه اقلیمي بدلونونو او پر وړاندې یې د چمتوالي په اړه پرېکړې کوي.
د طالبانو حکومت ویاند ذبیح الله مجاهد په یوه خپره شوې خبرپاڼه کې چې د چاپیریال ساتنې ادارې له خوا خپره شوې ویلي، سره له دې چې افغانستان د اقلیمي بدلون له امله له سختو "ننګونو" سره مخ دی، خو بیا هم دغې مهمې ناستې ته د دوی استازي نه دي بلل شوي چې د نوموړي په ټکو "ستره جفاه" ده.
دغه خبر پاڼه زیاتوي "د اقلیمي بدلون له امله د افغانستان زیامنتیا به د خلکو اقتصادي او ټولنیز وضعیت نور هم خراب کړي... او آن بشري ناورین به رامنځ ته کړي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
اعلامیه زیاتوي، دطالبانو حکومت هڅه کوي چې د اقلیمي بدلون د ګواښونو کمولو په اړه ګامونه واخلي، خو ټینکار کوي چې دا کار د نړیوالې ټولنې له مرستو پرته شونی نه دی.
په اعلامیه کې غوښتنه شوې چې د طالبانو د حکومت استازي دې د اقلمي بدلون غونډو په څېرو ناستو کې ګډون ته پرېښودل شي.
د طالبانو حکومت په نړۍ کې تر اوسه کوم هېواد په رسمیت نه دی پېژندلی او له همدې امله په ډېرو مهمو ناستو کې یې استازو ته د ګډون بلنه نه ورکول کېږي.
په افغانستان کې د طالبانو تر واک لاندې د چاپیریال ساتنې ادارې بيبيسي پښتو ته ویلي و چې په دغه هېواد کې د اقلمي بدلون په اړه ۳۲ پروژې هم د طالبانو له واکمنۍ وروسته ځنډول شوې دي.
د چاپیریال ساتنې ادارې په خبرپاڼه کې د دغو پروژو د بیا پیل غوښتنه کړې ده. د دغې ادارې یوه چارواکي روح الله امین بيبيسي پښتو ته وویل په رسمي ډول یې په دغه ناسته کې بیا بیا د ګډون غوښتنه کړې وه خو وايي د ملګرو ملتونو د چاپیریال ساتنې ادارې اجازه نه ده ورکړې."
په کاپ ۲۸مه غونډه کې څوک ګډون کوي؟
د عکس سرچینه، Getty Images
دې ناستې ته له ۲۰۰ د ډېرو حکومتونو استازي او مشران وربلل شوي دي. په دې ناسته کې هغه هېوادونه او ډلې ګډون کوي چې د ملګرو ملتونو ۱۹۹۲م کال د اقلیمي بدلون هوکړه یې لاسلیک او منلې ده.
د امریکا ولسمشر جوبایډن او د چین ولسمشر شي جې پېنګ په دې ناسته کې د نه ګډون ویلي خو د دوی په استازولی به يې استازي غونډه کې برخه واخلي.
د بریتانیا لومړي وزیر ریشي سوناک دفتر غونډې ته د لومړي وزیر او بکېنګهم ماڼۍ دې ناستې ته د پاچا چارلز د ورتګ پخلی کړی دی.
د بریتانیا پاچا به د ډیسمبر په لومړۍ ورځ پرانېستونکې وینا ولري.
