एपस्टीन मुद्दासँग सम्बन्धित हुन सक्ने १० लाखभन्दा बढी कागजातहरू फेला परे

अमेरिकी अधिकारीहरूले मृत्यु भइसकेका बाल यौन दुराचारी जेफ्री एपस्टीनसँग सम्बन्धित सम्भावित एक लाखभन्दा बढी कागजातहरू फेला परेको बताएका छन्। उनीहरूले ती कागजातहरू आउँदा दिन र साताहरूमा सार्वजनिक गर्ने योजना रहेको बताए।

न्यूयोर्कमा सङ्घीय जाँच ब्यूरो (एफबीआई) र सङ्घीय अभियोजनकर्ताहरूले न्याय मन्त्रालय (डीओजे) लाई आफूले फेला पारेका कागजातबारे जानकारी गराएका छन्।

न्याय मन्त्रालयले बुधवार भनेको छ, "हामीसँग वकिलहरू छन् जो पीडितहरूको सुरक्षाका लागि कानुनी रूपमा आवश्यक समीक्षाका लागि चौबीसै घण्टा काम गरिरहेका छन्। हामी जतिसक्दो चाँडो कागजातहरू सार्वजनिक गर्ने छौँ।"

मन्त्रालयले सबै फाइलहरू सार्वजनिक हुन "केही साता" लाग्न सक्ने जनाएको छ। नयाँ कानुन अन्तर्गतको समयसीमा रहेको डिसेम्बर १९ तारिखभित्र सबै एपस्टीन फाइलहरू सार्वजनिक नगरेपछि मन्त्रालय छानबिनको घेरामा छ।

उक्त निकायले "सङ्घीय कानुन र फाइलहरू सार्वजनिक गर्ने राष्ट्रपति ट्रम्पको निर्देशनको पूर्ण पालना गर्न जारी राख्ने" जनाएको छ।

मन्त्रालयले जारी गरेको विज्ञप्तिमा एफबीआई र न्यूयोर्कको सदर्न डिस्ट्रिक्टका लागि अमेरिकी महान्यायाधिवक्ताले कसरी थप सामग्री प्राप्त गरे भनेर उल्लेख गरिएको छैन।

न्यूयोर्कको जेलमा सुनुवाइको पर्खाइमा रहेकै बेला मृत्यु भएका एपस्टीन यौन तस्करीको आरोपको सामना गरिरहेका थिए।

न्याय मन्त्रालयले एपस्टीनको अनुसन्धानसँग सम्बन्धित हजारौँ कागजातहरू सार्वजनिक गरेपछि यो समाचार आएको हो।

मन्त्रालयले कागजातहरू पटक पटक गरेर जारी गरिरहेको छ र उच्च अधिकारीहरूले लाखौँ कागजातहरू अझै सार्वजनिक गर्न बाँकी रहेको बताएका छन्।

अमेरिकी राष्ट्रपति डोनल्ड ट्रम्पले कानुनमा हस्ताक्षर गरेको एपस्टीन फाइल्स ट्रान्सपरेन्सी एक्ट पारित भएपछि ती फाइलहरू सार्वजनिक भएका हुन् ।

भिडिओ, फोटो, इमेल र अनुसन्धान गरिएका कागजातहरू समावेश रहेका धेरै फाइलहरूमा एफबीआईले एपस्टीन मुद्दामा सम्भावित षड्यन्त्रकारीहरूको सहायकको रूपमा उद्धृत गर्ने व्यक्तिहरूको नाम समावेश छ।

न्याय मन्त्रालयले दुवै पक्षका सांसदहरूको आलोचनाको सामना गरेको छ जुन कानुनले पीडितहरूको पहिचान र सक्रिय आपराधिक अनुसन्धानको रक्षा गर्न मात्र अनुमति दिन्छ।

कङ्ग्रेसले पारित गरेको र गत महिना ट्रम्पले हस्ताक्षर गरेको कानुनले नाम र जानकारीहरू लाजमर्दो हुनसक्ने वा "प्रतिष्ठामा असर" पुर्‍याउनसक्ने उल्लेख गरेको छ।

यसले विशेषगरी न्याय मन्त्रालयलाई आन्तरिक सञ्चार र मेमोहरूबारे सोध्छ जसमा कसलाई अनुसन्धान गरिएको थियो र "एपस्टीन वा उनका सहयोगीहरूको अनुसन्धान गर्न अभियोग नलगाउने, अनुसन्धान नगर्ने, वा अस्वीकार गर्ने" भन्ने निर्णयको विवरण दिन्छ।

कागजातहरूमा इमेलहरू समावेश छन् जुन सन् २०१९ मा एफबीआई कर्मचारीहरू बीच आदानप्रदान भएको देखिन्छ। ती इमेलमा एपस्टीनका १० सम्भावित "सह-षड्यन्त्रकारीहरू" उल्लेख छन्।

इमेलमा समूहका छ जनालाई सपिना दिइएको छ जुन अदालतमा उपस्थित हुन दिइने आदेश हो। यसमा फ्लोरिडामा तीन, बोस्टनमा एक, न्यूयोर्क सहरमा एक र कनेक्टिकटमा एक समावेश थियो।

एपस्टीनको अपराधमा सम्भावित सह-षड्यन्त्रकारीहरू पीडितहरू र धेरै सांसदहरूका लागि अहिले केन्द्रमा छन्। ती पीडितहरूले न्याय मन्त्रालयबाट थप पारदर्शिताको माग गरेका छन्।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।