نصيراحمد احمدي

له دې ځايه واورئ!

د کابل په لوېديځه اډه کې د ٣٠٣ بس يو چلوونکی ظاهر شيرزی وايې :

"له دې اډې څخه هره ورځ له ٥٠٠ نيولي ان تر ١٠٠٠ پورې ځوانان بهرنيو هيوادونوته په غيرقانوني توګه دسفرپه نيت ځي.))

دا ډول کسان د قاچاق وړونکو په مټ او د ډيرو پيسو په لګښت تر پولو اوړي، خو ډيری وخت خپلې موخې( هدف ) ته نه رسيږي.

د باميانو ولايت يو اوسيدونکې چې نه غواړي نوم يې واخيستل شي وايي:

" ټولي پيسې قاچاقبر راڅخه يووړې، زه پوليسو ونيولم، دومره پيسې نه لرم چې تر کوره ځان ورسوم. اوس سوال کوم چې دلارې کرايه پيدا کړم."

د غزني د مقرد ولسوالۍ يو اوسيدونکی چې د نوم له ښوولو يې ډډه کوله او پخوا يې پخپله انساني قاچاق کاوه وايي:

" مساپر د لارو په اوږدو کې قاچاق وړونکې يو په بل پلوري، نه يې د خوړوبندوبست شته او نه هم د څښاک.

	زيات کسان د قاچاق وړونکو په مټ تر پولو اوړي، خو ډيری وخت خپل هدف ته نه رسيږي.

زيات شمېر يې دلارې په اوږدوکې يا له تندې مری ، يا له غرونو او کړنګونو غورځي او ددې ترڅنګ قاچاق وړونکي په دوی باندې دترياکوقاچاق هم کوي."

نوموړی زياتوي : " واړه هلکان تر هغه مهاله د قاچاق وړونکو په ولکه کې وي چې نور ملګري يې پيسې ورته راوړي.

ما پخپله يو داسي ځوان وليد چې اووه کاله دقاچاق وړونکو په يوه هوتل کې پاتې و او جنسي تيری ورباندې هم کيده."