A' chiad bhùth Tesco san Eilean Sgitheanach ceum nas fhaisge

Dealbh neach-ealain air togalach bùtha le Tesco sgrìobht os cionn an dorais ann an litrichean mòra dearga. Tha pàirc-chàraichean air beulaibh an togalaich le beagan charbadan air an stad agus chìthear daoine a' coiseachd ALASTAIR DICKIE, WEST RANGA SKYE LIMITED

Bidh meud 32,356 troigh cheàrnagach sa bhùth aig Tesco air iomall Phort Rìgh

Tha na buidhnean air cùl plana bùth Tesco a thogail ann am Port Rìgh air iarrtas cead-dealbhachaidh a chur gu Comhairle na Gàidhealtachd.

Tha West Ranga Skye Earranta, co-bhanntachd eadar West Ranga Property Group agus Lujo Properties, agus Comann Taigheadais an Eilein Sgitheanaich is Loch Aillse airson bùth Tesco a thogail air iomall a' bhaile.

A bharrachd air a' chiad Tesco san eilean, bhiodh stèisean connaidh air an làraich 4.8 acaire an cois Rathad Woodpark.

'S fhada bho bhathar a' strì airson bùth mhòr nàiseanta eile a dhèanadh farpais ris a' Cho-op aig a bheil dà thogalach am Port Rìgh agus fear san Àth Leathann.

Tha cuid a tha a' ruith bhùidhtean nas lugha air dragh a nochdadh mun bhuaidh a dh'fhaodadh a bhith orrasan mar thoradh air bùth mhòir ùir.

A bharrachd air an obair a bhios ann ga togail, tha dùil gun cruthaich a' bhùth ùr suas ri 100 cosnadh nuair a bhios i fosgailte.

Bidh Tesco cuideachd a' tabhainn seirbheis lìbhrigidh do dhachaighean air feadh an eilein.

Thuirt Alastair Dickie, Stiùiriche West Ranga Skye Earr, gun robh iad toilichte a bhith ag obair còmhla ri Comhairle na Gàidhealtachd tron phròiseas planaidh.

Thuirt e: "Tha sinn air ar dòigh glan a bhith a' cur a-steach airson cead-dealbhachaidh airson leasachadh Thesco, agus an dòchas bùth agus stèisean connaidh a tha mòran ag iarraidh a thoirt dhan Eilean Sgitheanach."