टोकियो ऑलिम्पिक: प्रवीण जाधवचं आव्हान संपुष्टात

मराठमोळा तिरंदाज प्रवीण जाधवचं ऑलिम्पिकमधलं आव्हान संपुष्टात आलं.

जागतिक क्रमवारीत अव्वल स्थानी असणाऱ्या अमेरिकेच्या ब्रॅडी अॅलिसनने एलिमिनेशन राऊंडमध्ये प्रवीणवर 6-0 असा विजय मिळवला.

अत्यंत प्रतिकूल परिस्थितीतून ऑलिम्पिकपर्यंत वाटचाल केलेल्या प्रवीणला सांघिक पुरुष तसंच मिश्र दुहेरीत लौकिकाला साजेशी कामगिरी करता आली नव्हती.

मात्र वैयक्तिक प्रकारात प्रवीणने 6-0 असा विजय मिळवत दिमाखदार सुरुवात केली.

बॅडमिंटनपटू पी. व्ही. सिंधूने खणखणीत विजयासह बाद फेरीत आगेकूच केली. ती आता प्री-क्वार्टर फायनलमध्ये पोहोचली आहे.

सिंधूने अवघ्या 35 मिनिटात हाँगकाँगच्या चेयुंग न्गान यि वर 21-9, 21-16 असा सरळे गेम्समध्ये दमदार विजय मिळवला. रिओ ऑलिम्पिकमध्ये रौप्यपदक विजेत्या सिंधूला पदकाचा रंग बदलायचा आहे.

महिला हॉकी संघाला आणखी एका पराभवाला सामोरं जावं लागलं. ब्रिटनच्या संघाने भारतावर 4-1 असा विजय मिळवला.

तरुणदीप राय, अतानू दास, प्रवीण जाधव हे त्रिकूट वैयक्तिक तिरंदाजीत नशीब आजमावतील. सांघिक प्रकारात कोरियाविरुद्ध या त्रिकुटाला पराभवाला सामोरं जावं लागलं होतं. महिलांमध्ये दीपिका कुमारी वैयक्तिक प्रकारात सहभागी होईल.

बी. साईप्रणीतला आधीच्या सामन्यातलं प्रदर्शन सुधारण्याची संधी आहे.

अर्जुन लाल जाट आणि अरविंद सिंग पदकाच्या शर्यतीतून बाहेर

रोइंग प्रकारात उपांत्य फेरी गाठलेले अर्जुन लाल जाट आणि अरविंद सिंग पदकाच्या शर्यतीतून बाहेर पडले आहेत. लाइटवेट डबल स्कल प्रकाराच्या उपांत्य फेरीत अर्जुन-अरविंद जोडीला सहाव्या स्थानावर समाधान मानावे लागले. पहिल्यांदाच भारतीय रोइंगपटूंनी ऑलिम्पिक स्पर्धेत उपांत्य फेरी गाठली होती.

सेलिंगमध्ये गणपती केलापांडा आणि वरुण ठक्कर भारताचं प्रतिनिधित्व करतील.

बॉक्सिंगमध्ये पूजा राणी ऑलिम्पिक मोहिमेची सुरुवात करणार आहे.

मंगळवारी काय घडलं?

बॉक्सिंगपटू लोव्हिना बोरगोहेनने ऑलिम्पिक पदार्पणात उपांत्यपूर्व फेरीत आगेकूच केली.

लोव्हिनाने जर्मनीच्या अनुभवी नादिन अप्ट्झवर 3-2 अशी मात करत बाजी मारली. 69 किलो वजनी गटात खेळणाऱ्या लोव्हिनाने 12 वर्षाने मोठ्या बॉक्सिंगपटूला नमवण्याची करामत केली.

23 वर्षीय लोव्हिनसमोर पुढच्या लढतीत चायनीज तैपेईच्या निइन चिन चेनचं आव्हान असणार आहे. या लढतीत जिंकल्यास लोव्हिनाचं कांस्यपदक पक्कं होऊ शकतं.

मनू भाकेर-सौरभ चौधरी पदकाच्या शर्यतीतून बाहेर

नेमबाजीत नव्याने समाविष्ट करण्यात आलेल्या मिश्र प्रकारात मनू भाकेर आणि सौरभ चौधरी जोडीकडून पदकाची अपेक्षा होती. मात्र या जोडीला पदकासाठीच्या फेरीसाठी पात्र होता आलं नाही.

10मीटर एअर पिस्तूल प्रकारात या जोडीला सातव्या स्थानावर समाधान मानावं लागलं. पात्रता फेरीच्या दुसऱ्या टप्प्यात या जोडीने 380 गुणांची कमाई केली.

वयाची विशीही पार न केलेल्या या जोडीकडून भारतीय चाहत्यांना मोठ्या अपेक्षा होत्या कारण पाच विश्वचषक स्पर्धांमध्ये त्यांनी सुवर्णपदकाची कमाई केली होती.

मात्र ऑलिम्पिकच्या व्यासपीठावर त्यांना लौकिकाला साजेशी कामगिरी करता आली नाही. वैयक्तिक प्रकारात मनूचं आव्हान पिस्तूलात झालेल्या तांत्रिक बिघाडामुळे संपुष्टात आलं होतं.

"जसपाल राणा आणि मनू भाकेर यांना एकत्र येण्यासंदर्भात प्रयत्न केले होते. मात्र ते यशस्वी होऊ शकले नाहीत", असं नेमबाजी संघटनेचे अध्यक्ष रनिंदर सिंग यांनी सांगितलं. ऑलिम्पिकनंतर नेमबाजी चमूचा कोचिंग स्टाफ पूर्णत: बदलला जाईल असंही त्यांनी सांगितलं.

रिओ ऑलिम्पिकनंतर समितीने दिलेल्या सर्व सूचनांचं आम्ही पालन केलं. जे करणं शक्य आहे ते सगळं केलं असंही त्यांनी स्पष्ट केलं.

यशस्विनी देसवाल आणि अभिषेक वर्मा तसंच एलाव्हेनी वेलावरन आणि दिव्यंश सिंग पनवर या जोड्यांनाही अंतिम फेरीसाठी पात्र होत आलं नाही.

भारतीय पुरुष हॉकी संघाचा स्पेनवर विजय

भारतीय पुरुष हॉकी संघाने स्पेनवर 3-0 असा विजय मिळवला. रुपिंदरपाल सिंगने दोन तर सिमरनजीत सिंगने एक गोल केला.

सात्विकसैराज-चिराग शेट्टी जोडीने इंग्लंडच्या बेन लेन आणि सीन वेंडी जोडीवर 21-17, 21-19 असा विजय मिळवला मात्र बाद फेरीत पोहोचण्यासाठी हा विजय पुरेसा ठरू शकला नाही.

चीनच्या मा लोंगने शरथ कमालवर 11-7, 8-11, 13-11, 11-4, 11-4 असा विजय मिळवला. शरथच्या पराभवासह भारतीय टेटे पथकाचं आव्हान संपुष्टात आलं.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)