टीईटी गैरप्रकारात अडकलेल्या उमेदवारांच्या यादीत सत्तारांची मुलं, सत्तारांनी आरोप फेटाळले
फोटो स्रोत, Facebook
शिक्षक पात्रता परीक्षा (TET) घोटाळा उघडकीस आल्यानंतर संपूर्ण महाराष्ट्रात खळबळ उडाली होती.
मुख्यमंत्री एकनाथ शिंदे यांच्यासोबत शिवसेनेतून बंडखोरी केलेले औरंगाबादमधील सिल्लोडचे आमदार अब्दुल सत्तार यांच्या चार मुलांची नावं या टीईटीशी जोडली गेली आहेत. कारण सत्तारांच्या चारही मुलांचं टीईटी प्रमाणपत्र रद्द करण्यात आल्याचं उघड झालंय.
परीक्षा परिषदेकडून टीईटी गैरव्यवहार प्रकरणात कारवाई करण्यात आलेल्या विद्यार्थ्यांच्या यादीत अब्दुल सत्तारांच्या दोन मुलींची नावं आहेत.
गैरप्रकारात अडकलेल्या तब्बल 7 हजार 874 विद्यार्थ्यांची यादी परीक्षा परिषदेनं प्रसिद्ध केलीय. या यादीत अब्दुल सत्तारांच्या चार मुलांच्या नावांचाही समावेश आहे.
पुणे पोलीस आरोग्य सेवक भरती प्रकरणाचा तपास करत असताना टीईटी परीक्षेत घोटाळा झाल्याचे समोर आले होते. खासगी कंपन्यांचे संचालक, परीक्षा परिषदेचे अधिकारी आणि परीक्षा देणारे विद्यार्थी यांच्या संगनमतानं हा घोटाळा झाल्याचे समोर आले होते.
फोटो स्रोत, Abdul Sattar/facebook
हा घोटाळा उघडकीस आल्यानंतर कारवाई सुरू करण्यात आली. त्याचा एक भाग म्हणून परीक्षेत गैरप्रकार केलेल्या उमेदवारांची प्रमाणपत्र रद्द करण्यात आली आणि टीईटी परीक्षा देण्यास कायमस्वरूपी बंदी घालण्यात आली.
परीक्षा परिषदेनं या प्रमाणपत्र रद्द केलेल्या विद्यार्थ्यांची यादीच जाहीर केलीय. त्यात सत्तारांच्या चार मुलांची नावं आहेत.
अब्दुल सत्तारांनी काय म्हटलं?
यावर अब्दुल सत्तार यांनी माध्यमांशी संवाद साधला. एबीपी माझानं याबाबतचा व्हीडिओ प्रसिद्ध केला आहे. यात अब्दुल सत्तार म्हणतात की, "माझ्या मुलानं आता एलएलबीची परीक्षा दिली. तो कधी टीईटीला बसलाच नाही. तरीही नाव येतं, मग ही फार मोठी बहाद्दुरी आहे."
सत्तार पुढे म्हणाले, "राहिला प्रश्न माझा दोन मुलींचा. तर दोन्ही मुली अपात्र आहेत. राज्य परीक्षा परिषदेच्या आयुक्तांचा अहवाल खरा मानायचा की तुमच्याकडे (माध्यमांकडे) आलेला खरा मानयचा? मला यात संभ्रम आहे.
"दुसरं म्हणजे, टीईटीचा उपयोग नोकरीसाठी किंवा पगारासाठी होतो. मग आमच्या मुलींनी त्याचा फायदा घेतला असेल, तर त्याचा पूर्ण रेकॉर्ड शिक्षणाधिकाऱ्यांकडे असेल. आमच्या संस्थेकडे चौकशी केली असता, आपल्याकडून असा कोणताच प्रस्ताव गेलेलं नाही, असं त्यांनी सांगितलं. माझ्या मुलीचं सहा हजारांचं पगार सुरू होतं, तेही बंद झालंय."
"2020 मध्ये माझ्या मुली अपात्र आहेत, मग 2019 च्या यादीत पात्र कसे होतात?" असा प्रश्नही सत्तारांनी विचारलं.
"या सगळ्या प्रकाराविरोधात मुख्यमंत्री एकनाथ शिंदे आणि शिक्षण विभागाच्या सचिवांकडे तक्रार करणार आहे. शिवाय, यासंबंधी कारवाई माझ्या वकिलांतर्फे मीही करेन," असंही अब्दुल सत्तारांनी माध्यमांशी बोलताना सांगितलं.
अब्दुल सत्तार यांचा राजकीय प्रवास?
अब्दुल सत्तार हे औरंगाबाद जिल्ह्यातील सिल्लोड विधानसभा मतदारसंघातील आमदार आहेत. अब्दुल सत्तार अब्दुल नबी हे त्यांचे पूर्ण नाव आहे.
1 जानेवारी 1965 साली सत्तार यांचा जन्म औरंगाबादच्या सिल्लोड गावातल्या एका सामान्य कुटुंबात झाला. त्यांनी सिल्लोडमधून बीएपर्यंतचे त्यांचे शिक्षण पूर्ण केले. महाविद्यालयापासून राजकारणाची आवड असलेल्या सत्तार यांच्या राजकीय कारकिर्दीला 1984 पासून सुरूवात झाली.
घरात कोणतीही राजकीय पार्श्वभूमी नसताना 1984 साली ग्रामपंचायतची निवडणुक लढवून ते जिंकून आले. 1990 साली सिल्लोड ग्रामपंचायतीचे नगरपरिषदेमध्ये रूपांतर झाले. नगरपरिषदेवर प्रशासक असतानाही त्यांनी खुबीने गावातील लोकांची कामं करून जनाधार गोळा केला.
फोटो स्रोत, Abdul Sattar/facebook
2001 साली अब्दुल सत्तार हे विधानपरिषदेवर निवडून गेले. 2004 साली अब्दुल सत्तार हे अतिशय कमी फरकाने विधानसभा निवडणूक हरले. 2009 साली ते पहिल्यांदा सिल्लोडमधून विधानसभा निवडणूक जिंकून आले. 2014 साली (विधानसभा निवडणूकांआधी) कॉंग्रेसच्या मंत्रीमंडळात ते काही महीने कॅबिनेट मंत्री झाले. त्यानंतर विधीमंडळात विविध मुद्द्यांवर आपली भूमिका मांडताना ते चर्चेत राहीले.
2019 च्या विधानसभा निवडणुकीवेळी त्यांनी कॉंग्रेस पक्ष सोडून शिवसेनेत प्रवेश केला. महाविकास आघाडी सरकारमध्ये त्यांनी महसूल, ग्रामविकास या खात्याचे राज्यमंत्री म्हणून काम केलं.
उद्धव ठाकरेंच्या विरोधात एकनाथ शिंदे यांनी 50 आमदारांसह बंड केलं. त्यात ते एकनाथ शिंदे यांच्यासोबत आहेत. शिंदे-फडणवीसांच्या मंत्रीमंडळात स्थान मिळवण्यासाठी अब्दुल सत्तार हे प्रयत्नशील आहेत.
हेही वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
