निकाल : उत्तर प्रदेश, पंजाब, गोवा, मणिपूर, उत्तराखंड राज्यातील निवडणुकांचे निकाल कधी आहेत?

उत्तर प्रदेशसह उत्तराखंड, पंजाब, मणिपूर आणि गोवा या राज्यांमधील निवडणुका वेगवेगळ्या टप्प्यांमध्ये फेब्रुवारी आणि मार्च महिन्याच्या पहिल्या आठवड्यात पार पडतायत. 10 मार्चला या विधानसभा निवडणुकांचा निकाल लागेल.

पाच राज्यांच्या या निवडणुकीसाठी 18 कोटी 34 लाख मतदार मतदान करणार असून त्यापैकी 8 कोटी 55 लाख महिला मतदार आहेत.

उत्तर प्रदेशमध्ये मतदान कधी?

उत्तर प्रदेशमध्ये एकूण 7 टप्प्यांमध्ये निवडणूक होत आहे.

मतदानाचा पहिला टप्पा 10 फेब्रुवारी, दुसरा टप्पा 14 फेब्रुवारी, तिसरा टप्पा 20 फेब्रुवारी, चौथा टप्पा 23 फेब्रुवारीला पार पडलाय.

तर पाचवा टप्पा 27 फेब्रुवारी, सहावा टप्पा 3 मार्च, तर सातवा टप्पा 7 मार्च 2022 रोजी पार पडेल.

यानंतर 10 मार्चला उत्तर प्रदेशातल्या निवडणुकीचे निकाल जाहीर होतील.

पंजाब निवडणुकीचा निकाल कधी?

पंजाबमध्ये 20 फेब्रुवारी 2022 रोजी या एकाच टप्प्यात मतदान होईल. आधी मतदानासाठी 14 फेब्रुवारीची तारीख जाहीर करण्यात आली होती. पण 16 फेब्रुवारीला साजरी होणारी रविदास जयंती लक्षात घेता मतदानाची तारीख पुढे ढकलण्याची विनंती निवडणूक आयोगाकडे करण्यात आली होती.

10 मार्चला इथली मतमोजणी होऊन निकाल लागणार आहे.

उत्तराखंड निवडणुकीचा निकाल कधी?

उत्तराखंडमध्ये 14 फेब्रुवारी 2022 रोजी या एकाच टप्प्यात मतदान झालं. इथलाही निकाल 10 मार्चला लागेल.

गोवा निवडणुकीचा निकाल कधी?

गोव्यात 14 फेब्रुवारी 2022 रोजी या एकाच टप्प्यात मतदान होईल.

मणिपूरमध्ये मतदान आणि निकाल कधी?

मणिपूरमध्ये मतादानाच पहिला टप्पा 27 फेब्रुवारीला, तर दुसरा टप्पा 3 मार्च 2022 रोजी पार पडेल.

10 मार्च रोजी मणीपूरसहक पाचही राज्यांतल्या विधानसभा निवडणुकीचा निकाल लागणार आहे.

कोरोनाच्या पार्श्वभूमीवर विशेष खबरदारी

कोरोना काळात निवडणूक असल्यामुळे आयोगानं विशेष खबरदारी जाहीर केली आहे.

कोरोनामुळे चिंतेचं वातावरण

लोकसंख्येचा विचार करता उत्तर प्रदेश हे देशातील सर्वांत मोठं राज्य आहेच, मात्र त्याचबरोबर राजकीयदृष्ट्यादेखील हे सर्वात महत्त्वाचं राज्य आहे.

आगामी काही महिन्यांत या राज्यात होऊ घातलेल्या विधानसभा निवडणुका पाहता राज्यात राजकीय हालचालींना सुरुवात झाली आहे.

लोकसंख्या, राजकीय जागरुकता, ऐतिहासिक आणि सांस्कृतिक वारसा आणि स्वातंत्र्य संग्रामाच्या दृष्टीनं उत्तर प्रदेश देशातील अत्यंत महत्त्वाचं असं राज्य आहे. भारतातील जवळपास 16.17% टक्के लोकसंख्या या राज्यात राहते.

क्षेत्रफळाच्या दृष्टीनं उत्तर प्रदेश, राजस्थान, मध्य प्रदेश, महाराष्ट्र आणि आंध्र प्रदेशनंतर पाचव्या स्थानी आहे. भारताच्या एकूण भूमीपैकी 7.3% भूमी या राज्यात आहे. उत्तर प्रदेशात 75 जिल्हे आहेत.

उत्तर प्रदेशात लोकसभेच्या 80 तर राज्यसभेच्या 31 जागा आहेत. विधान सभेमध्ये 404 आणि विधान परिषदेत 100 सदस्य असतात.

सध्या उत्तर प्रदेशमध्ये भाजपचे सरकार आहे. तर मुख्य विरोधी पक्षामध्ये समाजवादी पार्टी आणि बहुजन समाज पार्टीचा समावेश आहे.

किती जागांसाठी होतेय निवडणूक?

उत्तर प्रदेश विधानसभा हे विधीमंडळाचं कनिष्ठ सभागृह आहे. त्यात 403 निवडून आलेले सदस्य आणि राज्यपालांनी नियुक्त केलेल्या एका अँग्लो इंडियन सदस्याचा समावेश असतो.

म्हणजे राज्यात 403 विधानसभेच्या जागांसाठी मतदान होईल.

वेळेपूर्वी विसर्जन झालं नाही तर, विधान सभेचा कार्यकाळ पाच वर्षांचा असतो. सध्याच्या 17 व्या विधानसभेची स्थापना 14 मार्च, 2017 ला झाली होती.

उत्तर प्रदेशात जिंकण्याासाठी किती जागा गरजेच्या?

उत्तर प्रदेश विधान सभा निवडणुकीत विजयासाठी असलेली मॅजिक फिगर 202 आहे. निवडणुकीच्या आखाड्यात उतरलेला जो पक्ष किंवा आघाडी या आकड्यापर्यंत किंवा त्याच्या पुढे पोहोचेल, त्यांचाच विजय होईल.

उत्तर प्रदेशात कोण आहेत प्रमुख उमेदवार?

उत्तर प्रदेशात अद्याप विधानसभा निवडणुकीच्या तारखेची घोषणा करण्यात आलेली नाही. त्यानंतरच पक्ष त्यांच्या उमेदवारांच्या याद्या जाहीर करतील.

मात्र, भाजप नेते आणि विद्यमान मुख्यमंत्री योगी आदित्यनाथ, समाजवादी पार्टीचे नेते अखिलेश यादव, बीएसपी प्रमुख मायावती, बीएसपी प्रदेशाध्यक्ष भीम राजभर (मुख्तार अन्सारीचं तिकिट कापून त्यांना पक्षाने मैदानात उतरवलं आहे), भाजप नेते आणि विद्यमान उपमुख्यमंत्री केशव प्रसाद मौर्य, दुसरे उपमुख्यमंत्री डॉ. दिनेश शर्मा, राय बरेलीच्या आमदार आदिती सिंह, सुहेलदेव भारतीय समाज पार्टीचे नेते ओम प्रकाश राजभर, शिवपाल सिंह यादव. यांच्यावर प्रामुख्यानं नजरा असतील.

उत्तर प्रदेशातल्या मतदारांना आपल्याबाजूने वळवण्यासाठी समाजवादी पक्षाचे नेते अखिलेश यादव, काँग्रेस नेत्या प्रियांका गांधी यांनी रोड शो केले. सध्या मुख्यमंत्री असलेले भाजपचे योगी आदित्यनाथ आणि पंतप्रधान नरेंद्र मोदींच्याही सभा झाल्या. पण बसप नेत्या आणि उत्तर प्रदेशच्या माजी मुख्यमंत्री मायावती मात्र या रणधुमाळीत दिसलेल्या नाहीत.

उत्तर प्रदेशातील प्रमुख मतदारसंघ आणि निवडणुकीचे मुद्दे?

उत्तर प्रदेशच्या विविध भागांचं निवडणुकीच्या दृष्टीनं वेगळं महत्त्व आहे. तसंच प्रत्येक भागाच्या वेगळ्या समस्यादेखील आहेत.

पश्चिम उत्तर प्रदेशात शेतकऱ्यांचा मुद्दा सर्वांत महत्त्वाचा आहे. त्यात ऊसाची थकबाकी आणि एमएसपी सारखे महत्त्वाचे मुद्दे आहेत.

बुंदेलखंडमध्ये कायम पाण्याची समस्या राहिलेली आहे. हा भाग दुष्काळग्रस्त आहे. उत्तर प्रदेशचा दुर्लक्षित भाग अशी या भागाची ओळख आहे. हा भाग कधीही विकासाच्या अजेंड्यावर नसतो, असं म्हटलं जातं.

अवधच्या मध्य लखनऊ परिसरात कोव्हिडच्या काळातील अव्यवस्थेचा मुद्दा निवडणुकीत काहीसा महत्त्वाचा ठरू शकतो. तसंच दिलेली आश्वासनं पाळली नसल्याचा मुद्दाही उपस्थित होऊ शकतो. बेरोजगारीचा मुद्दाही याठिकाणी अत्यंत महत्त्वाचा आहे.

पूर्वांचलमध्ये योगी आदित्यनाथ यांचा मतदारसंघ असलेल्या गोरखपूरमध्ये दरवर्षी मेंदूज्वरचा प्रकोप पाहायला मिळतो. यावर्षीही तो आढळून आला आहे.

सोशल मीडियावर राज्यातील रस्त्यांची दूरवस्था हा कायम चर्चेचा विषय असतो. पंतप्रधानांचा लोकसभा मतदारसंघ असलेल्या वाराणसी आणि आसपासच्या परिसरांतही विकासाचा मुद्दा उपस्थित होऊ शकतो. नुकत्याच झालेल्या पावसात वाराणसीचा बराचसा भाग पाण्याखाली गेला होता.

पंतप्रधानांनी वाराणसीचा विकास जपानच्या क्योटोच्या धर्तीवर करणार असं म्हटलं होतं. पण तसं झालं नाही हा मुद्दा अनेकदा उपस्थित केला जातो. काशी विश्वनाथ मंदिराचं काम अद्याप पूर्ण झालेलं नाही. मात्र राम मंदिराचं काम सुरू झालेलं आहे.

वाराणसीतील विणकरांचं काम कोव्हिडमध्ये ठप्प झालं आहे. संपूर्ण देशात लॉकडाऊनमुळं निर्माण झालेल्या समस्या वेगवेगळ्या आहेत. कोरोनाच्या काळात आरोग्य व्यवस्थेबाबतही अनेक प्रश्न निर्माण झाले होते.

गेल्या निवडणुकीतील परिस्थिती

2017 च्या उत्तर प्रदेश विधानसभा निवडणुकीत भाजपनं 403 पैकी 312 मतदारसंघात विजय मिळवत मोठं यश मिळवलं होतं. या विजयासह भाजप तब्बल 14 वर्षांनी उत्तर प्रदेशात सत्तेत आला.

403 जागांसाठी झालेल्या निवडणुकीत भाजपनं 39.67 टक्के मतं मिळवली होती.

समाजवादी पार्टीनं 47 तर बहुजन समाज पार्टीनं 19 जागांवर विजय मिळवला होता. तर काँग्रेसला केवळ सात जागा जिंकता आल्या होत्या.

गेल्या निवडणुकीपेक्षा वेगळं काय?

या निवडणुकीत गेल्या निवडणुकीपेक्षा सर्वात वेगळी बाब म्हणजे योगी आदित्यनाथ. 2017 मध्ये भाजपकडे राज्यात मुख्यमंत्रापदासाठी चेहरा नव्हता. मात्र यावेळी योगी आदित्यनाथ यांचा चेहरा आहे. त्यांच्याकडे सरकार चालवण्याचा पाच वर्षांचा अनुभवदेखील आहे.

त्याशिवाय समाजवादी पार्टी आणि बहुजन समाज पार्टी स्वतंत्र लढत आहेत. गेल्या वेळीही हे दोन्ही पक्ष स्वतंत्र लढले होते. मात्र 2019 मधील लोकसभा निवडणुकीत दोन्ही पक्ष एकत्र आले होते.

गेल्या विधानसभा निवडणुकीत काँग्रेस आणि समाजवादी पार्टी यांची आघाडी होती. यावेळी उत्तर प्रदेशात प्रियंका गांधी काँग्रेसचा चेहरा आहेत. तसंच असदुद्दीन ओवैसीही मैदानात असतील.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)