हैदराबादमध्ये 27 वर्षीय तरुणीला जिवंत जाळलं, लैंगिक अत्याचाराचा संशय
हैदराबादमध्ये 27 वर्षांच्या एका तरुणीला जिवंत जाळण्यात आल्याची घटना घडली आहे. तिच्यावर लैंगिक अत्याचार झाले असण्याची शक्यताही व्यक्त करण्यात येत आहे.
मृत तरुणी गुरांची डॉक्टर म्हणून काम करायची. हैदराबाद शहराच्या बाहेरील भागात ही घटना घडली आहे.
पोलिसांनी या प्रकरणी संशयित आरोपींना अटक केली आहे. त्यांची अधिक चौकशी सुरू आहे.
तेलुगू माध्यमातल्या वृत्तांनुसार, मृत तरुणी गच्चीबावली भागामध्ये नोकरीसाठी जात असत. प्रवासासाठी ती स्कूटीचा वापर करत. घटनेच्या दिवशी टोंडुपल्ली टोल प्लाझाजवळ स्कूटी पार्क करून ती टॅक्सीने पुढे गेली. पण ती परतली तेव्हा तिच्या स्कुटीचे टायर पंक्चर झालेले होते. म्हणून मग स्कूटी तिथेच टोल प्लाझाजवळ सोडून टॅक्सीने घरी परतण्याचं तिने ठरवलं.
टोल प्लाझाजवळच्या दोन जणांनी पंक्चर काढतो असे सांगत तिची स्कूटी नेली. मृत तरुणीनं आपल्या बहीण आणि भावाला फोनवरून याबाबत सांगितलं होतं. रस्त्यावर एकटं उभं रहायला भीती वाटतेय, अचानक काही लोक दिसू लागले आहेत आणि एक ट्रक आल्याचंही तिने फोनवर बोलताना सांगितलं होतं.
थोड्या वेळात परत फोन करते असं सांगून तिने बहिणीसोबतच संभाषण संपवलं, पण त्यानंतर फोन बंदच झाला.
मृत तरुणीच्या कुटुंबाने टोल प्लाझाजवळ तिचा शोध घेतला आणि त्यांनतर शमशाबाद पोलीस ठाण्यात ती बेपत्ता झाल्याची तक्रार दाखल केली.
शमशाबाद पोलीसांच्या शादनगर पोलीस ठाण्याच्या हद्दीत एका बांधकाम सुरू असलेल्या पुलाखाली अर्धवट जळलेला मृतदेह मिळाल्याचं गुरुवारी सकाळी पोलिसांना समजलं.
मृत तरुणीच्या घरच्यांनी सँडल, स्कार्फ आणि तिच्या अंतर्वस्त्रांवरून मृतदेहाची ओळख पटवली.
मृतदेहापासून 100 मीटरच्या अंतरावर तिची अंतर्वस्त्रं मिळाल्यानं तिच्यावर लैंगिक अत्याचार झाल्याचा संशय व्यक्त करण्यात येतोय.
सीसीटीव्ही फुटेज नुसार मृत तरुणीला टोल प्लाझा जवळच्याच निर्मनुष्य ठिकाणी नेण्यात आलं आणि कथितरित्या लैगिंक अत्याचार करण्यात आले.
पोलीस म्हणतात...
या प्रकरणाचा तपास सुरू असल्याचं शमशाबादच्या पोलीस अधीक्षकांनी सांगितलं. या प्रकरणी लैंगिक अत्याचार झाल्याच्या वृत्ताला पोलिसांनी अद्याप दुजोरा दिलेला नाही.
हेही वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)
