पुतिन उत्तर कोरिया दौऱ्यावर, किम जोंग उन यांनी केलं युक्रेनवरील रशियन आक्रमणाचं समर्थन

रशियाचे राष्ट्राध्यक्ष व्लादिमीर पुतिन बुधवारी (19 जून) उत्तर कोरियामध्ये पोहोचले आहेत. तिथं त्यांचं जोरदार स्वागत झालं.

स्वागत समारंभानंतर राष्ट्रपति पुतिन आणि उत्तर कोरियाचे नेते किम जोंग उन यांच्यात चर्चा झाली.

रशियन वृत्तसंस्थेच्या हवाल्याने रॉयटर्सने आपल्या वृत्तात म्हटलं की, दोन्ही नेत्यांच्या दरम्यान दोन तास चर्चा झाली.

किम जोंग उन यांनी युक्रेनमध्ये रशियन आक्रमणाचं समर्थन केलं आहे. रशियन वृत्तसंस्था इंटरफॅक्सच्या एका रिपोर्टनुसार त्यांनी म्हटलं की, उत्तर कोरियाचा उद्देश हा ‘रशियासोबत धोरणात्मक संबंध’ अधिक मजबूत करणं हा आहे.

पुतिन यांनी दोन्ही देशांदरम्यानच्या जुन्या मैत्रीचा उल्लेख केला. जवळपास 24 वर्षांनंतर रशियाचे राष्ट्राध्यक्ष उत्तर कोरियाला गेले आहेत. याआधी 2000 साली पुतिन यांनी उत्तर कोरियाचा दौरा केला होता.

रशियन माध्यमसंस्था आरआयएच्या वृत्तानुसार दोन्ही नेत्यांनी व्यापक धोरणात्मक सहकार्य करारावर स्वाक्षरी केली.

पुतिन यांचे सल्लागार यूरी उशाकोव्ह यांनी मंगळवारी (18 जून) रशियन माध्यमांना सांगितलं की, या करारात नेमकं काय म्हटलं आहे, त्याबद्दल अजून नेमकी माहिती नाहीये.

या दोन्ही नेत्यांची शेवटची भेट सप्टेंबरमध्ये रशियाच्या वॉस्तोश्नी कॉस्मोड्रोम शहरात झाली होती, परंतु 2000 सालानंतर पुतिन पहिल्यांदाच प्योंगयांगला भेट देत आहेत.

अमेरिकेने म्हटलंय की, या दोन्ही नेत्यांच्या भेटीने चिंतेचं वातावरण निर्माण झालं आहे.

पण रशियाने या कार्यक्रमाचे वर्णन 'मैत्रीपूर्ण भेट' असं केलं असून रशियन माध्यमांनी दिलेल्या वृत्तानुसार, पुतिन आणि किम यांची ही भेट सुरक्षा मुद्द्यांबाबत असेल. यात दोन्ही देशांच्या भागीदारी करारावर स्वाक्षरी केली जाईल.

पुतिन यांच्या भेटीदरम्यान किम इल सुंग चौकात परेड होण्याची शक्यता आहे. तसेच, पुतिन प्योंगयांगमधील एका संगीत कार्यक्रमाला भेट देतील. शिवाय उत्तर कोरियामधील एकमेव ऑर्थोडॉक्स चर्च, लाईफ-गिविंग ट्रिनिटीला भेट देतील अशी शक्यता आहे.

पुतिन प्योंगयांगमधील कुमसुसान अतिथीगृहात मुक्काम करणार असल्याचं वृत्त आहे.

2019 मध्ये चीनचे नेते शी जिनपिंग यांनी उत्तर कोरियाचा दौरा केला होता. तेव्हा ते याठिकाणी मुक्कामाला होते.

बीबीसी मराठीवरील बातम्यांसाठी बीबीसीच्या व्हॉट्सअप चॅनेलला जॉइन व्हा.

उत्तर कोरियात पुतिन यांचं स्वागत

रशियाचे राष्ट्रपती व्लादिमिर पुतिन उत्तर कोरियामध्ये पोहोचले आहेत. उत्तर कोरियाचे राष्ट्रपती किम जोंग उन यांनी त्यांचं स्वागत केलं.

उत्तर कोरियातील प्योंगयांगमध्ये पुतिन यांच्या स्वागतासाठी मोठ्या संख्येने लोक रस्त्याच्या कडेने जमले होते. त्यांच्या हातात रशिया आणि उत्तर कोरियाचे झेंडे होते.

अधिकृत स्वागत समारंभासाठी पुतिन आणि किम जोंग उन प्योंगयांगमधील सेंट्रल स्क्वेअर इथे पोहोचले. कोरियाच्या शिष्टमंडळात किम यांची बहीण किम यो जोंग याही सहभागी होत्या.

रशियन टुडेनुसार स्क्वेअरवर स्थानिक रहिवाशांची गर्दी होती. ते रशियन राष्ट्राध्यक्षांच्या स्वागतासाठी आले होते. तिथे काही सैनिकांच्या तुकड्याही होत्या. या दरम्यान स्थानिक मिलिट्री ऑर्केस्ट्राने दोन्ही देशांच्या राष्ट्रगीताची धून पण वाजवली.

चीननेही पुतिन आणि किम यांच्या या भेटीचं स्वागत केलं आहे. पुतिन यांनी एक महिना आधी चीनचा दौरा केला होता. याच दरम्यान त्यांनी घोषणा केली होती की, त्यांच्यात आणि शी जिनपिंग यांच्यात भावांप्रमाणे सख्य आहे.

पुतिन यांच्या प्योंगयांग यात्रेबद्दल विचारल्या गेलेल्या एका प्रश्नाचं उत्तर देताना चिनी परराष्ट्र मंत्रालयाचे प्रवक्ते लिन जियान यांनी म्हटलं होतं की, आमची ज्यांच्यासोबत पारंपरिक मैत्री आहे, त्यांच्यासोबत संबंध वाढविण्याच्या, दृढ करण्याच्या प्रयत्नांचं स्वागत करत आहे.

रशियाच्या राष्ट्राध्यक्षांनी त्यांच्या भेटीपूर्वी युक्रेनमधील रशियन युद्धाला 'खंबीरपणे पाठिंबा दिल्याबद्दल' उत्तर कोरियाचे कौतुक केले आहे.

उत्तर कोरियाच्या सत्ताधारी पक्षाचे मुखपत्र असलेल्या रॉडोंग सिनमुनमध्ये छापलेल्या लेखात त्यांनी 'अमेरिकेचा दबाव, ब्लॅकमेल आणि लष्करी धमक्या' असे शब्द वापरले आहेत आणि तरीही उत्तर कोरियाच्या हितसंबंधांचे रक्षण करण्याच्या प्रयत्नांना पाठिंबा देण्याचे वचन दिले आहे.

त्यांनी उत्तर कोरियासोबत युरोपद्वारे नियंत्रित नसलेला व्यापार आणि सुरक्षा व्यवस्था निर्माण करण्याचे वचन दिले आहे.

किम यांनी गेल्या आठवड्यात असं म्हटलं होतं की, त्यांचे रशियाबरोबरचे संबंध 'कॉम्रेड-इन-आर्म्सच्या अतूट नातेसंबंधात विकसित झाले आहेत.'

गेल्या वर्षी या दोन्ही नेत्यांच्या भेटीदरम्यान पुतिन म्हणाले होते की त्यांनी उत्तर कोरियाशी लष्करी सहकार्यासाठी 'शक्यता' पाहिली आहे. यावर किम यांनी रशियाच्या अध्यक्षांना युक्रेनमध्ये 'विजय' मिळावा अशा शुभेच्छा दिल्या होत्या.

व्हाईट हाऊसने आपल्या निवेदनात म्हटलंय की, रशिया आणि उत्तर कोरिया यांच्यातील घनिष्ट संबंधांमुळे अमेरिका चिंतित आहे.

राष्ट्रीय सुरक्षा परिषदेचे प्रवक्ते जॉन किर्बी यांनी सोमवारी पत्रकारांशी बोलताना सांगितलं की, "आम्हाला पुतिन यांच्या दौऱ्याबद्दल कसलीही चिंता वाटत नाही. आम्हाला या दोन देशांमधील घट्ट होत जाणाऱ्या संबंधांची चिंता आहे."

2000 मध्ये पुतिन यांच्या अध्यक्षीय कारकीर्दीच्या सुरूवातीलाच त्यांनी किमचे वडील, किम जोंग इल यांची भेट घेतली होती. आता रशियाने युक्रेनवर आक्रमण केल्यापासून या दोन्ही देशांमधील संबंध वाढले आहेत.

उत्तर कोरियाने रशियाला दारूगोळा आणि इतर शस्त्रास्त्र पुरवल्याचा आरोप अमेरिका आणि दक्षिण कोरियाने केला होता. अन्न, लष्करी मदत आणि तंत्रज्ञानाच्या बदल्यात ही मदत करण्यात आली होती. मात्र उत्तर कोरिया आणि रशिया या दोघांनीही अशा मदतीचे दावे नाकारले आहेत.

उत्तर कोरियानंतर पुतिन व्हिएतनामला भेट देण्याची शक्यता आहे. हे दोन्ही देश व्यापारासारख्या मुद्द्यांवर चर्चा करतील अशी अपेक्षा आहे.