5G байланышы дүйнөнү өзгөртөбү?
Сүрөттүн булагы, Getty Images
Түштүк Корея жана АКШда биринчи жолу 5G технологиясы ишке кирди. Ал смартфон колдонуучулардын мүмкүнчүлүктөрүн кеңейтет деп айтылууда.
"Самсунг" компаниясы Galaxy S10 смартфондору 5G байланышына кошулганда, интернет жыйырма эсеге тездейт деп билдирди.
Бир нече өлкө 5G технологиясын өнүктүрүп, өлкөгө жайылтууну көздөп турат. 5G айдоочусуз унааларды колдонуу үчүн да маанилүү экени айтылууда.
Бирок жаңы технология коопсуздукка коркунуч жаратат дегендер да бар.
Сүрөттүн булагы, Getty Images
5G деген эмне?
5G смартфондогу интернет байланышын түзгөн технологиянын бешинчи мууну. Чөнтөк телефон колдонуучулар тез жана туруктуу интернет байланышына мүмкүнчүлүк алат.
Талдоочулар 4G байланыштан 5G технологиясына өтүү чоң секирик болоорун белгилешүүдө.
Сүрөттүн булагы, Getty Images
Биринчи муун деп саналган 1G технологиясы үн менен байланышууга мүмкүнчүлүк түзгөн, 2G текст, 3G сүрөт, ал эми 4G байланышы менен видео аркылуу баарлашып калдык.
Бешинчи муун деп саналган 5G интернетти он эсеге чейин тездетет. "Самсунг" компаниясы болсо алардын смартфондору менен интернет жыйырма эсе тез болоорун айтууда.
Технология айрым өлкөлөрдө сыноодон өтүп жатат. Жакын арада айрым компаниялар аны кеңири жайылта баштайт.
Түштүк Кореяда өткөн аптада үч компания 5G кызматын сунуштады. АКШда болсо Verizon компаниясы эки шаарда 5G кызматын сунуштай баштады.
5G коопсуздукка корунуч жаратабы?
5G байланыштын инфраструктурасы кытайлык Huawei компаниясынын катыштыгы менен түзүлгөндүктөн, айрым мамлекеттер коопсуздук маселесин көтөрүүдө.
Сүрөттүн булагы, Getty Images
Буга чейин жаңы технологиялардын гиганты Huawei Кытайга тыңчылык кылууга көмөктөшөт деп АКШ билдирген. Кошмо штаттары бир нече жылдан бери Huawei компаниясына каршы далилдерди топтоп келди. Алардын пикиринде, кытайлык компания Бээжиндин буйругун аткарып, технология жаатында уурулук кылат. Huawei болсо мындай дооматтарды четке кагууда.
АКШдан тышкары, Австралия менен Жаңы Зеландия Huawei компаниясынын ишмердүүлүгүнө чектөө киргизип, бул компания сунуштаган 5G байланышынан баш тарткан.
5G технологиясын көзөмөлдөө коммуникация тармагынын маанилүү бөлүктөрүн башкаруу катары саналат. Талдоочулардын айтымында, 5G байланышы аркылуу Huawei сыяктуу компниялар тыңчылык кылууга мүмкүнчүлүк алат. Келечекте айдоочусуз унаалардан тарта үйдөгү электрондук жабдыктарга чейин 5G технологиянын жардамы менен иштеп калат.
Ага карабастан мобилдик операторлордун тыңчылык кылганы тууралуу бир дагы факты каттала элек. (AT)
