Шектүү мүрзөдөн кармалды. Би-Би-Си кызматкеринин аялы менен эки кызынын өлүмү

Лондон шаарында Би-Би-Синин комментатору Жон Ханттын аялын жана эки кызын арбалет менен атып өлтүрүп кетишти.

Кол салууга шектелген киши окуя болгон жерден из жашырып кеткенге үлгүргөн, бирок бир нече сааттан кийин кармалды.

Полициянын маалыматына караганда, шейшемби күнү кечинде 61 жаштагы Кэрол Хант жана анын кыздары – 28 жаштагы Ханна менен 25 жаштагы Луиза оор абалда өз үйүндө табылган. Полиция менен тез жардам кызматкерлеринин аларды аман алып калуу аракетинен майнап чыккан эмес. Үч жарадар тең окуя болгон жерде жан берген.

Адам өлтүрүү тууралуу маалымат түшкөндөн көп өтпөй полиция 26 жаштагы Кайл Клиффордду издөөгө киришкен.

Укук коргоо органдары кол салуу учурунда кылмышкер арбалетти эле эмес, башка куралдарды да колдон болушу мүмкүн деп жатат.

Полиция ири операция жүргүзүп, кылмышка шектелип жаткан Клиффордду байланышка чыгууга үндөдү. Бир күн кечке жүргүзүлгөн издөө иштеринен кийин шектүү Лондондогу көрүстөндүн биринен колго түшкөн.

Анын жаракаттары бар экени айтылууда, бирок кармоо учурунда полиция шектүүгө карата курал колдонгон эмес. Полиция кылмышка эмне себеп болгонун азырынча ачыктай элек. Бирок шектүү киши колдуу болгон үч аялды тааныганы айтылууда.

Би-Би-Си билдиргендей, Клиффорд Британ армиясында кыска убакыт кызмат өтөгөн, бирок 2022-жылы кызматын тапшырган.

Жон Хант Би-Би-Си Five Live радиосунда спорттук оюндарга түз ободо комментаторлук кылчу. (SA)