Aba Power Plant: Etu ndị Aba ga na-akwụ ụgwọ ọkụ
- Onye dere ya, Ikechukwu Kalu & Okechukwu Omeire
- Ndị mere akụkọ a, Senior Journalist & Video Journalist
Ọkammụta Barth Nnaji bụ onye nwe ụlọọrụ ọkụ latrik n'Aba bụ Geometric Power akọwaala ihe ga-eme ka ọkụ a ghara ịnyụ anyụ.
Na mkparịtaụka pụrụiche ya na BBC Igbo nwere, ọ kọwara na ọ bụghị ihe raara ahụ ka ọkụ latrik na-enwu na-anyụghị anyụ n'Aba ma ọ bụrụ na mmanụ gaasị ga na-eru ha aka mgbe niile.
Nke a na-abịa dịka Osote onyeisiala Naịjirịa bụ Kashim Shettima gbapechara ụlọọrụ a ga-enye okpuruọchịchị itoolu dị n'Abia Steeti ọkụ n'ụbọchị 26 Febụwarị 2024.
O kwuru na ụlọọrụ ha nwere akụrụngwa 'turbine' atọ nke otu n'ime ha nwere ikike inye ọkụ latrik 47 megawatt.
O kwuru na ọ bụrụ ha nwete mmanụ gaasị zuruoke, ga-eme ka 'turbine' atọ a na-arụ ọrụ, na nke a pụtara na ọkụ anyụghị anyụ ga-adị, ebe ha ga-etinye nke fọrọ afọ n'igwe ọkụ 'national grid'.
Nwada Agatha Nnaji bụ nwunye ya ma bụrụkwa onye nchịkọta ụlọọrụ Geometric Power gbakwụnyere na ego ole ndị Aba ga-akwụ n'ụgwọ ọkụ latrik agaghị akarị ihe gọọmentị nyere n'iwu ka a na-agwụ.
O kwuru na ọ bụghị ụlọọrụ ha ka ọ dị n'aka ikwu ego ole ndị mmadụ ga-akwụ kama na ọ bụ ụlọọrụ Nigerian Electricity Regulatory Commission (NERC) na-ekpebi ego ole ndị mmadụ na-akwụ n'ọkụ latrik.
Ọkammụta Nnaji gara n'ihu kọwaa etu ụlọọrụ ha si malite njem ịrụ ụlọọrụ ga-enye ọkụ anyụghị anyụ n'Aba.
O kwuru na ha arụbuola igwe ọkụ n'Abuja mgbe Onyeisiala Olusegun Obasanjo na-achị, na ọ bụ oge ahụ ka ndị nwee ụlọọrụ n'Aba kpọtụrụ ha ka rụọ ụdịrị ihe a n'Aba.
Kirie ihe onyonyo a maka ihe ha kwuru n'uju;
