IPOB arrest Ghana: Ihe mere Ipob jiri arịọ gọọmentị mba ahụ biko

Otu Ipob esila n'ọnụ otu onye n'ime ha bụ Emeka Gift rịọ gọọmentị mba Ghana arịrịọ ịtọghapụ ọtụtụ n'ime ha ejichiri n'Accra.

N'ozi o depụtara na Facebook ya Emeka Gift gwara Nana Akufo-Addo na "ndị ezinaụlọ Ipob nke ndị uwoejii be ha tọọrọ bụ ndị na-achọ udo".

Cheta na akụkọ gbọwara na anwụchiri ụfọdụ ndị otu Ipob n'izuụka gara aga n'Accra mgbe ha na-eme nzụkọ n'ebe ahụ.

Mana o nwebeghi ihe ndị uweojii mba ahụ kwuru maka nke a rue ugbua.

N'ozi ahụ Gift gwara onyeisiala Akufo-Addo na ndị ahụ anwụchiri bụ ndị so ekpocha azacha ebe ha bi bụ Accra.

"Anyị na-arịọ gị tọghapụ ndị anyị na o nweghi iwu ha dara" ka o dere.

Gịnị mere eji nwuchie ha?

Akụkọ pụtara kwuo na ndị uweojii mba Gana nwụchiri ndị Ipob n'Accra dịka ha na-eme nzụkọ ọnwa ha.

O nwekwara ihe onyonyo na-efegharị nke ndị mmadụ na-ekwu bụ ndị Ipob ahụ nọ n'ime ụgbọala agụ egwu.

Rue ugbua, o dobeghi anya ihe mere e ji nwuchie ndị Ipob ahụ.

N'otu aka ahụ ndị isi Ipob bụ DOS wepụtara ozi na-ekwu na ha na-agbasị mbọ ike ịgbapụta ndị ahụ ejichiri na mba Gana.