Dexamethasone: Gịnị bụ ọgwụ a a sị nwereike ịgwọ coronavirus?

Ndị sayensị chọpụtara na ọgwụ dexamethasone nwere ike inye aka n'ịgwọ ndị bu ọrịa coronavirus.

Ndị ọkachamara na mba Briten kwuru na ọgwụ a so n'otu n'ime ọgwụ ndị a na-enyocha, e nwere olileanya na ọ ga-agwọnwu ọrịa a.

Mana ọtụtụ mmadụ na-ajụ kedụ ọgwụ bụ dexamethasone na ihe mere e ji sị na o nwereike inye aka n'ịgwọ coronavirus?

Otu onye ọkachamara n'ihe banyere ọgwụ ma bụrụkwa otu n'ime ndị ọkachamara n'okwu ọgwụ na West Afrịka bụ Blessing Nwagbara, kọwara ihe ọgwụ a bụ.

Gịnị bụ Dexamethasone?

Nwagbara sị na dexamethasone bụ otu n'ime ọgwụ ndị ụlọọrụ ahụike mbaụwa bụ World Health Organization (WHO) kpọrọ ọgwụ dị mkpa kamgbe afọ 1977.

Ọ bụ ọgwụ kwesịrị ịnọ n'ụlọọgwụ maọbụ ebe niile a na-ere ọgwụ n'ụwa. O so n'ọgwụ ndị a na-akpọ 'ọzọ Igbo ndụ'.

O so n'ọgwụ ndị a kpọrọ 'Corticosteriods' bụ ọgwụ ndị e ji agwọ ọrịa ahụ ọzịza dị iche iche.

Ọ bụghị ọgwụ a rụpụtara ọhụrụ, ọ bụ ọgwụ dị kamgbe ọtụtụ afọ.

Kedụ ọrịa e ji Dexamethasone agwọ?

Ihe e ji Dexamethasone agwọ kpọmkwem bụ ọrịa ahụ ọzịza a kpọrọ 'Edema' na bekee, ọkachasị nke metụtara n'akpịrị nakwa akụkụ ndị e ji eku ume (Brochus).

Nke pụtara na e ji ya agwọ ndị nwere ọrịa iku ume Asthma.

E ji dexamethasone agwọ ọzịza ahụ nke metụtara ọkpụkụ azụ nakwa nke ụbụrụ.

E nwerekwara ike iji ya agwọ ọzịza metụtara anya.

Ụdịrị Dexamethasone ole ka e nwere?

Nwagbara sị na e nwere dexamethasone dị iche iche nke gụnyere;

Nke mkpụrụọgwụ (Tablets), nke a na-agba agba (Injections) nakwa nke a na-atanye n'anya (Eye drop).

Ọ sị na ọgwụ a abụghị nke a na-aṅụ otu ugboro ma kwụsị ya, na tupu ị ṅụọ ya maọbụ kwụsị ya na ị ga-anata ntuziaka onye ọrụ ahụike.

Gịnị mere e ji sị na o nwereike ịgwọ coronavirus?

Nwagbara sị na ihe mere e ji sị na ọgwụ a nwereike inye aka n'ịgwọ coronavirus bụ maka etu o si arụ ọrụ.

Dexamethasone na-akwụsị ọzịza n'akpịrị nke na-egbochi onye na-arịa asthma maọbụ ọrịa iku ume ndị ọzọ ka ọ ghara iku ume.

N'otu aka ahụ ka a sị na o nwekwara ike inye aka gwọọ coronavirus bụ ọrịa iku ume, ọkachasị n'ahụ ndị o ji aka ọjọọ ji igwe (Ventilator) eku ume.

"Ọ bụrụ na dexamethasone nwere ịke ịkpọpe okpoko ikuku onye na-arịa Asthma, n'otu aka ahụ, o nwekwara ike ịkpọpe nke onye na-arịa coronavirus".

Ọghọm dị n'ịṅụ ọgwụ Dexamethasone

Nwagbara kwuru; "N'agbanyeghi na ọgwụ a juru ebe niile, ọ bụghị ya ga-eme ka mmadụ ṅụọ ya na-enweghi ntuziaka, maka ibute ọghọm".

Ọ sị na ụfọdụ ọghọm dị n'ịṅụ ọgwụ a gụnyere;

Ime ka mmiri dọkọrọ mmadụ n'ahụ (Fluid retention) nke nwereike ibute aka ọzịza, ụkwụ na ikpere ọzịza.

Oke agụụ ịgụ mmadụ nke mere na ọtụtụ ndị na-achọ ibu ibu na-eji aṅụkarị ya.

Ndị ọzọ gụnyere ịra ahụ n'ihi ụra, ịgbọ agbọ, afọ ọsịsa, ike ọgwụgwụ nakwa isi ọwụwa.

N'ikpeazụ, Nwagbara sị na ọ ga-adịkwa mma ma ọ bụrụ na gọọmentị Naịjirịa ga-enyocha ọgwụ Dexamethasone ma sị ka e were ya na-agwọ Coronavirus.

Maka na ọ bụ ọgwụ dị ọnụ ala ma jukwa ebe niile, nke mkpụrụ akarịghị naịra 50 ebe nke ọgbụgba akarịghị 200 naịra.