Indaboski Bahose: Ihe iri ọtụtụ mmadụ amaghị maka Odumeje

29 Eprel 2020

Oge e ji agụ akụkọ nkeji 3

Ị jụọ ọtụtụ ndị mmadụ onye ụkọchukwu aha ya kacha ewu ewu na Naịjirịa ugbua, onye mbụ ị ga-anụ aha ya bụ Odumejeje.

Chukwuemeka Ohanemere bụ ụkọchukwu na-elekọta ụlọụka 'Mountain Of Holy Ghost Intervention And Deliverance Ministry' dị n'Ọnicha, Anambra steeti.

Odumejeje bụ ụkọchukwu ma bụrụkwa onye otiegwu. Egwu ya agasaala ọtụtụ steeti na Naịjirịa.

Aha a na-etu ya buru ibu nke gunyere: 'Lion', 'Liquid Metal', 'Indaboski Bahose' dịrị gawa.

Otu onye ma ya ọfụma na-achọghị ka a kpọọ aha ya gwara BBC ọtụtụ ihe ndị mmadụ amaghị maka odogwu nwoke a:

Odumeje bụ nwa nke atọ n'ime ụmụ isii nne na nna ya mụrụ
Ọtụtụ na-eche na ọ bụ onye Anambra steeti mana ọ bụghị eziokwu. Nne na nna Odumeje bụ ndị Orsu Ihiteukwa n'Imo steeti
Ụbọchị ncheta ọmụmụ ya pụrụ iche n'ihi na ọ bụ ụbọchị itoolu n'ọnwa nke itoolu (09/09), ya bụ abalị itoolu nke ọnwa Sepụtemba
Odumeje gụrụ akwụkwọ na 'Prudence Comprehensive Commercial College nke dị n'Ọdọakpụ ọnịcha
Egwuregwu bọọlụ na-amasị ya nke ukwu, nke na o cheburu echiche ịbụ onye ọgbaa bọọlụ oge ọ na-eto.
Ọ gbara odibo n'aka onye na-azụ ahịa akpụkpọ ahụ ụmụ anụmanụ nke bekee kpọrọ 'leather'
Odumeje dị afọ 19 oge e ji kpugheere ya na ọ ga-abụ onye amụma. Mana tupu ọ malite ime ekpere, ọ bụ onye isi ike ndị mmadụ ma nke ọma na Fegge, Ọnịcha bụ ebe ọ nọ too
Oge o chegharịrị, ọ malitere izisa oziọma nakwa ibu amụma n'okirikiri ogbe ha nke mere ka ndị enyi ya na mbụ na-achị ya ọchị ma na-akwa ya emu
Odumeje malitere dịka onye otu ekpere 'Charismatic' nke ndị ụka Katọlik tupu ọ malite ụlọekpere nke aka ya
Dịka akụkọ dị n'ọba ozi ụka ya si kwuo, ọ bụ n'afọ 2000 ka Odumeje malitere ụlọ ekpere ya n'uju
Ọ bụ nne ya nyere ya obere ego o ji malite ọrụ ụkọchukwu ya
Odumeje nwekwara nzere 'Doctorate' nke Mahadum Gregory dị n'Uturu, Abịa steeti nyere ya n'ihi ọrụ enyemaka ọ na-arụ
Odumeje alụọla nwaanyị ma mụta ụmụ anọ
Nwunye ya bụ onye Umuobom dị na Ideato South n'Imo Steeti

Ihe mere Odumejeje ji ewu ewu ugbua

Ya na ndị ejije Nollywood dị na mma. N'ọdị nso a, otu 'Actors Guild of Nigeria' kwanyeere Odumejeje ugwu dịka 'patron'
Ndị mmadụ na-ekwu na egwu ya na-atọwa isi.
Ọtụtụ na-ekwu na ọ naghị ezo omume ya ezo, ọ bụghị onye ihu abụọ
Etu o si asụ bekee na-atọ ọchị mana ọ chọghị ịma
Ọ bụ onye gara gara. Etu o si agụ egwu nakwa etu o si agba egwu na-akpa ndị mmadụ obi ọma
Ihe ya na-amasị ndị ntorobịa nke ukwu ọkachasị ụkwụ egwu ya.

Ihe ndị mmadụ na-ekwu maka Odumeje na soshal midia

Nkọwa foto, Mahadum 'Gregory University' nyere Odumeje nzere 'doctor of humanity'

Ụfọdụ na-ekwu na onye chọrọ obi aṅụrị gakwuru Odumeje

Skip X post, 1

Hapụ X ihe dị na ya?

Edemede a nwere ihe ndị si na X. Anyị na-achọ ka i nye anyị ikike tupu e tinye ihe ọbụla, dịka akụrụngwa cookies na tekịnụzụ ndị ọzọ nwereike ịdị na ya. I nwereike ịgụ X iwu cookie na iwu nzuzo tupu ị nabata ya. Iji kirie ihe nọ n'ime ya, họrọ 'nabata na gaa n'ihu'.

Warning: Third party content may contain adverts

End of X post, 1