KAI TSAYE, Abubuwan da ke faruwa a Najeriya da sauran sassan duniya 27/02/2026

Rahoto kai-tsaye

Daga Aisha Babangida da Abdullahi Bello Diginza

1. Mintuna 19 da suka wuceKotu ta ba da belin Malami

   

   Asalin hoton, Abubakar Malami

   Babbar kotun tarayya da ke Abuja ƙarƙashin jagorancin mai shari’a Joyce Abdulmalik, ta amince da belin tsohon ministan shari'a, Abubakar Malami tare da ɗansa Abdulaziz Malami, kan kuɗin naira miliyan 200,

   Sai dai kotun ta umarce su da a tsare su a gidan yarin Kuje har sai sun cika sharuddan belin da aka gindaya musu.

   Mai shari’ar ta bayar da belin ne bayan ta saurari hujjojin neman beli da lauyansu, Joseph Daudu ya gabatar.

   Kotun ta ce dole ne kowannensu ya gabatar da mutane biyu a matsayin masu tsaya musu, inda ɗaya daga cikinsu dole ne yana da fili a unguwar Maitama ko Asokoro.

   Haka kuma sai an ajiye takardun mallakar filin tare da fasfo din masuntsaya musu a wurin Mataimakin Magatakardan kotu.

   Kotun ta kuma umarci Malami da ɗansa su miƙa fasfonsu da hotunansu ga kotu.

   An sanya ranar 4 ga Maris domin fara shari’ar.

   Hukumar tsaro ta farin kaya,DSS ce ta gurfanar da su kan tuhume-tuhume guda biyar da suka shafi zargin tallafawa ta’addanci da mallakar makamai ba bisa ka’ida ba.

2. Mintuna 53 da suka wuce'Rashin lantarkin Najeriya na da nasaba da ƙarancin isar gas a tashoshin samarwa'

   

   Asalin hoton, Getty Images

   Hukumar kula da sauye-sauyen gwamnati kan samar da lantarki a Najeriya, NISO ta bayyana cewa matsalar ƙarancin wutar lantarki da ake fuskanta a ƙasar na da nasaba da ƙarancin isar gas zuwa tashoshin samar da wuta.

   A cewar hukumar, matsakaicin ƙarfin samar da wuta a yanzu na kusan megawatt 4,300 ya dogara ne da ƙarancin gas da ake samu a tashoshin samarwa.

   Hukumar ta ce tashoshin ne ke suke samar da mafi yawan wutar lantarki a ƙasar, don haka duk wani tangarda ko ƙaranci a isar gas yana tasiri kai tsaye kan ƙarfin samar da wuta da kuma yawan wutar da ke shiga kamfanin rarraba wutar.

   Hukumar ta yi alƙawarin ci gaba da aiki tare da masu ruwa da tsaki don ganin an dawo da cikakken isar wuta da zarar isar gas ta inganta kuma ƙarfin samarwa ya dawo yadda ya kamata.

   Duk da cewa wannan yanayi na iya haifar da matsala ga masu amfani da wuta, NISO ta yi kira ga jama’a da su fahimci halin da ake ciki a yanzu.

3. Sa'a 1 da ta wuceFadar shugaban Najeriya ta yi wa Atiku shaguɓe kan komawar Fintiri APC

   

   Asalin hoton, Getty Images

   Fadar shugaban ƙasa ta yi wa tsoho mataimakin shugaban ƙasa, Atiku Abubakar shaguɓe bayan sauya sheƙar gwamnan Adamawa, Ahmadu Fintiri, zuwa jam’iyyar APC, tana mai cewa matakin babbar koma baya ne ga burinsa na takarar shugaban ƙasa.

   Mai ba shugaban ƙasa shawara kan harkokin yaɗa labarai, Bayo Onanuga, ne ya bayyana hakan a wata sanarwa da ya wallafa a shafin sada zumunta nsa na X ranar Juma’a.

   Ya ce sauya sheƙar Fintiri na nuna cewa Atiku ba shi da cikakken farin jini a jiharsa ta asali.

   Sanarwa ya ƙara da cewa "gwamna Finitri ya ɗauke wa Atiku duk wata ƙarfinsa ta jiharsa zuwa jam’iyyar shugaba Bola Tinubu ta APC.

   A cewar sanarwar, "ɗan takarar da ba shi da ƙarfi a garinsa ba zai iya tallata kansa ga sauran yankuna ba."

   Fadar shugaban ƙasar ta kuma shawarci Atiku da ya yi tunanin yin ritaya daga siyasar jam’iyya, tare da komawa “gidansa na biyu” da ke hadaddiyar Daular Larabawa musamman a birnin Dubai.

   Sanarwar ta kuma bayyana cewa yayin da zaɓen shugaban ƙasa ke ƙaratowa cikin ƙasa da shekara guda, sauya sheƙar Fintiri na daga cikin manyan matsalolin da ka iya shafar shirin Atiku na sake tsayawa takara, tana mai cewa wannan lamari babbar barazana ce ga burinsa na siyasa.

4. Sa'o'i 2 da suka wuceTinubu ya amince da sabunta wasu manyan titunan ƙasar uku

   

   Asalin hoton, Getty Images

   Shugaba Najeriya, Bola Tinubu ya amince da sabunta wasu manyan titunan tarayya a jihar Neja.

   Titunan da za a sabunta sun haɗa da itin Mokwa–Bida mai tsawon kilomita 120 da na Mokwa–Makera mai tsawon kilomita 63, da kuma titin Bida–Lanbata mai tsawon kilomita 123.5 wanda idan aka hada Jimillar tsawo da nisan titunan guda uku zai kai kilomita 306.5.

   A cikin wata sanarwa da ministan ayyuka David Umahi ya fitar ta hannu mai taimaka masa a harkokin yada labarai, shugaba Tinubu ya amince har da tsawaita titin Bodo–Bonny domin haɗawa da Titin Gabashin kasar zuwa amma

   Sanarwar ta ce za a kuma sanya fitilun tituna masu amfani da hasken rana a titunan.

   Minista David Umahi a sanarwar ya nuna godiya ga Shugaba Tinubu bisa ƙoƙarinsa na sake gina irin waɗannan titunan da suke cikin muhimman hanyoyin tattalin arziki na ƙasa, waɗanda za su ƙara haɗin kai da kasuwanci, da ci gaban ƙasa.

5. Sa'o'i 3 da suka wuceSojojin Najeriya sun daƙile yunƙurin satar mutane a hanyar Enugu zuwa Otukpo

   

   Asalin hoton, Getty Images

   Rundunar sojin Najeriya ta ce sojojinta sun daƙile wani yunƙurin satar mutane a hanyar Enugu–Otukpo, inda suka ceto mutum uku ba tare da wani rauni ba.

   A cikin sanarwar da ta fitar a shafina na X, rundunar ta ce lamarin ya faru ne a ranar 25 ga Fabrairun 2026, lokacin da sojoji ƙarkashin Operation WHIRL STROKE suke gudanar da sintirinsu na dare daga sansaninsu da ke Otukpo.

   A yayin sintirin ne sojojin suka samu sahihan bayanai kan motar fasinjoji da ta saci mutanen inda sojojin suka tafi wurin nan take, suka bi sawun motar inda suka kama masu satar mutanen a hanyarsu ta tserewa.

   Sanarwar ta ce ba a samu wata arrangama tsakanin sojojin da masu garkuwa da mutanen ba saboda sun tsere inda suka bar mutanen da suka sace.

   Kakakin rundunar ya shawarci direbobi da su lura da rashin motsin motoci a tazara mai kimanin kilomita biyu da kuma dakata wa don tantance yanayi idan akwai abin da bai dace ba.

6. Sa'o'i 3 da suka wuceChina ta buƙaci a shiga tattaunawa kan yaƙin Afghanistan da Pakistan

   

   Asalin hoton, Getty Images

   Ma’aikatar harkokin wajen China ta bayyana matuƙar damuwa kan tashin hankalin da ke ƙaruwa a kan iyakar Afghanistan da Pakistan inda ta buƙaci ƙasashen biyu su “warware duk wata matsala da bambance-bambance da nufin kawo ƙarshen yaƙin ta hanyar tattaunawa da sulhu.

   Ma’aikatar ta ce China tana “ƙoƙarin shiga tsakani wajen sasanta rikicin ta hanyoyi nata, kuma a shirye take ci gaba da taka rawar gani don rage tashin hankali da inganta dangantakar ƙasashen biyu.”

   Mai magana da yawun ma’aikatar, Mao Ning, ya ce "samun ƙaruwa a rikicin zai haifar da lahani da asara ga kasashen biyu."

   China ta nuna cewa kawo ƙarshen rikicin “yana cikin muhimman muradun ƙasashen biyu da al’ummominsu, kuma zai taimaka wajen tabbatar da zaman lafiya da kwanciyar hankali a yankin.”

7. Sa'o'i 4 da suka wuceAni yi zanga-zanga kan hukuncin gwamnatin Habasha na cire wasu yankuna daga ikon Tigray

   

   Asalin hoton, AFP via Getty Images

   Manyan zanga-zanga sun ɓarke a yankin Tigray na Habasha bayan gwamnatin tarayya ta yanke hukuncin cire wasu ƙananan yankuna guda biyar daga ƙarƙashin ikon gudanarwar Tigray a zaɓukan ƙasa masu zuwa.

   Masu zanga-zangar sun taru a Mekelle da sauran birane, suna sukar matakin a matsayin “hukunci mai haɗari” da kuma “sanarwar shiga yaki.”

   Majalisar Tarayya ta yanke hukunci cewa yankunan da ake taƙaddama a kansu da suka hada da Korem Ofla, Raya Alamata, Humera, Adi Remets, da Tselemti ba za su kasance ƙarƙashin ikon Tigray ba.

   Hukuncin ya haifar da ƙiyayya daga yankin Tigray da jam’iyyun siyasa, da ƙungiyoyin farar hula, waɗanda suka bayyana shi a matsayin abin da bai dace ba da sabawa yarjejeniyar Pretoria da ta kawo ƙarshen yakin Tigray a 2022.

   A gefe guda kuma jam’iyyar adawa ta NaMA ta yi maraba da hukuncin, tana cewa tana goyon bayan matsayar Majalisar Tarayya.

8. Sa'o'i 5 da suka wuceAmurka ta yanke wa ɗan ƙasar hukuncin ɗaurin rai da rai kan lalata da yara a Burkina Faso

   

   Asalin hoton, Getty Images

   Amurka ta yanke wa wani ɗan ƙasar mai suna Fode Sitafa Mara da ke da shekara 41 hukuncin ɗaurin rai da rai bayan an same shi da laifin lalata da wasu ’yan mata biyu ƙanana yayin da yake aiki a ofishin jakadancin Amurka da ke Burkina Faso.

   Ma’aikatar shari’ar Amurka ta ce an yanke masa hukuncin ne ranar Laraba bayan shari’ar makonni biyu da aka gudanar a watan Oktoban 2025 a wata kotun tarayya da ke Maryland.

   Alƙalai sun same shi da laifuka huɗu na cin zarafin ƙananan yara mata ta hanyar lalata da kuma yunƙurin jan hankalinsu tare da yunƙurin hana gudanar da bincike.

   Masu gabatar da ƙara sun bayyana cewa laifukan sun faru ne tsakanin shekarun 2022 da 2023 a Ouagadougou, inda yake aiki a ofishin jakadancin Amruka a Ouagadougou.

   Shaidu sun nuna cewa an aikata laifukan ne a wani gida da aka tanada domin ma’aikatan diflomasiyya na Amurka.

   Rahotanni sun ce waɗanda aka cutar sun kasance ’yan mata masu shekaru 13 da 15 a lokacin da lamarin ya fara, kuma sun fito daga marasa galihu. ne

   Masu gabatar da ƙara sun ce mutumin ya yi amfani da halin da suke ciki wajen cin zarafinsu tsawon kusan shekara guda.

9. Sa'o'i 5 da suka wuceShugabannin MDD sun yi tsokaci kan rikicin Afghanistan da Pakistan

   

   Asalin hoton, Getty Images

   Shugaban Majalisar Dinkin Duniya, Antonio Guterres, da shugaban hukumar kare haƙƙin bil’adama, Volker Türk, sun yi tsokaci kan halin da ake ciki a rikicin da ya barke tsakanin Afghanistan da Pakistan.

   Guterres ya yi kira ga ƙasashen biyu da su bi doka da ƙa’idojin kasa da kasa ba tare da tangarda ba, musamman ma dokokin jin ƙai na kasa da kasa.

   A nasa bangaren kum, Türk ya yi kira ga Afghanistan da Pakistan da su shiga tattaunawa don shawo kan rikice-rikicen kan iyaka da harin jiragen saman da ke kashe mutane,

10. Sa'o'i 5 da suka wuceGwamnan Adamawa Ahmadu Fintiri ya koma APC

    

    Asalin hoton, Ahmadu Fintiri/X

    Gwamnan jihar Adamawa, Ahmadu Umaru Fintiri, ya sanar da sauya sheƙarsa zuwa jam’iyyar APC a hukumance.

    A jawabin da ya yi wa al’ummar jiha a ranar Juma’a, gwamnan ya ce ya ɗauki matakin ne tare da duka mambobin majalisar zartarwarsa da manyan jiga-jigan jam’iyyar adawa ta PDP, kamar yadda jaridun ƙasar suka ruwaito.

    Sauya shekar tasa na zuwa ne a daidai lokacin da ake ci gaba da ganin sauya sheƙar wasu gwamnoni da jiga-jigan jam’iyyun adawa zuwa jam’iyyar APC mai mulki a Nigeria.

    Har yanzu dai babu cikakken martani daga shugabannin jam’iyyar PDP na ƙasa dangane da matakin gwamnan.

    A baya-bayan nan ne dai Shugaban Najeriya Bola Tinubu ya kai ziyarar aiki jihar, tare da ƙaddamar da wasu ayyukan da gwamnan ya gabatar, matakin da wasu ke ganin tamkar zawarcin gwamnan ne.

    Matakin gwamnan na zuwa ne kwana biyu bayan kakakin majalisar dokokin jihar, Bathiya Wesley, ya fice daga PDP tare da wasu mambobin majalisar 13.

11. Sa'o'i 6 da suka wuceIran ta yi tayin shiga tsakanin rikicin Pakistan da Taliban

    

    Asalin hoton, Getty Images

    Ministan harkokin wajen Iran, Abbas Araghchi, ya ce ƙasarsa a shirye take ta taimaka wajen “sauƙaƙa tattaunawa” tsakanin Pakistan da Afghanistan bayan da rikici ya barke tsakanin kasashen biyu..

    Ya kuma yi kira ga ƙasashen biyu da su “warware bambance-bambancensu ta hanyar kyakkyawar makwabtaka da tattaunawa.”

    A baya, Iran ta riga ta ba da tayin shiga tsakanin ƙasashen biyu a matsayin mai shiga tsakani yayin da zaman dar-dar kan iyakar ƙasahen ke ƙaruwa

12. Sa'o'i 6 da suka wuceYaƙi ya ɓarke tsakanin Pakistan da Taliban

    

    Asalin hoton, Getty Images

    Jiragen yaƙin Pakistan sun kai hare-hare cikin ƙasar Afganistan, inda suka yi ruwan bama-bamai a wasu sassan Kabul da Kandahar da Paktia, yayin da ƙasashen biyu ke ci gaba da gwabza faɗa tsakaninsu.

    Pakistan ta ce ta kai hare-hare ta sama da ƙasa kan yankunan Taliban da hedkwatar soji da wata cibiyar adana makamai.

    Wani saƙon da ministan tsaron Pakistan, Kwaja Asif ya wallafa a shafinsa na sada zumunta ya ce yanzu sun fara yaƙi da Afghanistan yana mai cewa haƙurinsu ya ƙare. Tun da farko Taliban ta ce dakarunta sun kai hari kan jami'an tsaron kan iyakar Pakistan.

    Wasu majiyoyi na Taliban sun ce aƙalla sojojin Pakistan 10 aka kashe, Pakistan kuma ta ce ta kashe dakarun Afgahnistan sama da 70.

13. Sa'o'i 6 da suka wuceYadda dajin Kainji ke neman zama maɓoyar ƙungiyoyin ƴanbindiga a Najeriya

    

    Asalin hoton, Reuters

    A farkon watan Fabrairun shekarar 2026 ne mahara sama da 100 suka yi dirar mikiya sanye da kayan sojoji a ƙauyukan Woro da Nuku da ke jihar Kwara da ke arewa ta tsakiya a Najeriya, inda suka kashe sama da mutum 75.

    Sun dira a ƙauyukan ne da yammacin ranar Talata a daidai lokacin da manoman ƙauyukan suke komawa gida daga gonakinsu.

    Babban abin da ya ja hankali shi ne yadda maharan suka aika da wasiƙar zuwa garin domin "wa'azi", sannan suka shiga, suka yi aika-aikarsu, sannan suke fice ba tare da fuskantar matsala ba.

    Bayan harin ne gwamnatin Najeriya ta zargi mayaƙan Boko Haram da kai harin, duk da cewa ƙungiyar ba ta ɗauki alhaki ba, duk da cewa ta fi gudanar da ayyukanta a arewa maso gabashin Najeriya.

    A lokacin ne mutane suka fara tambayar wai daga ina maharan suka taso, kuma su wane ne su?

    Karanta cikakken labarin

14. Sa'o'i 6 da suka wuceJam'iyyun adawa sun yi watsi da sabuwar dokar zaɓe

    

    Asalin hoton, Atiku Abubakar/X

    Jagororin manyan jam’iyyun adawa a Najeriya sun yi watsi da sabuwar dokar zaɓe ta 2026 da aka yi wa gyara wadda shugaba Bola Ahmed Tinubu ya sanya wa hannu kwanan nan.

    Sun buƙaci majalisar Najeriya ta gaggauta fara sabon tsarin gyara dokar, suna zargin jam’iyyar APC da shirin amfani da gyaran wajen yin magudi a zaɓen 2027.

    Tinubu ya rattaɓa hannu kan dokar ne bayan majalisar dokoki ta yi mata gyara, amma tun kafin hakan ake ta ce-ce-ku-ce da zanga-zanga daga ɓangaren adawa da ƙungiyoyin farar hula.

    Waɗannan ɓangarori sun dage cewa wajibi ne a riƙa tura sakamakon zaɓe kai tsaye ta na’ura maimakon tanadin amfani da tsarin takarda da ’yan majalisa suka saka.

    A wata sanarwa bayan wani taron manema labarai da aka gudanar a Abuja ranar Alhamis, tsohon mataimakin shugaban ƙasa Atiku Abubakar ya ce "shi da sauran shugabannin adawa ba su amince da sabuwar dokar ba saboda an gaggauta amincewa da ita ba tare da la’akari da muradun jama’a ba.:

    Ya kuma nuna goyon baya ga shugaban jam’iyyar NNPP, Dr Ajuji Ahmed, wanda ya soki sashe na 60(3) da ke bai wa hukumar INEC damar amfani da tsarin takarda maimakon nuna sakamakon zabe kai tsaye ta na’ura idan aka ce an samu tangardar na'ura.

    A cewarsu, sabuwar dokar ta sabawa dimokuraɗiyya kuma yunƙuri ne na rage gaskiya da sahihancin zaɓe..

15. Sa'o'i 7 da suka wuceInec ta sauya ranar zaɓen shugaban Najeriya na 2027

    

    Asalin hoton, Inec/X

    Hukumar zabe mai zaman kanta ta Najeriya (INEC) ta sanya sabbin ranakun gudanar da zaben shugaban kasa da gwamnoni da kuma na ’yan majalisun tarayya da na jihohi na kasar na 2027.

    Hakan na zuwa ne mako biyu bayan hukumar ta fitar da jadawalin zaben na farko, wanda ya sha suka daga bangarori da dama kasancewar ranakun da hukumar ta sanar za su iya fadawa cikin watan azumin Ramadana na shekarar 2027.

    Lamarin ya kai ga cewa majalisar dokokin kasar ta yi gyara ga dokar zaben kasar game da lokaci mafi kankanta na sanar da ranar gudanar da zabe.

    A jadawalin farko da hukumar ta fitar, ta sanya ranar 20 ga watan Fabarairun 2027 a matsayin ranar zaben shugaban kasa da na ‘yan majalisar dokokin tarayya, sai kuma 6 ga watan Maris 2027 a matsayin ranar zaben gwamnonin jihohi da na ‘yan majalisar dokokin jihohi.

    Sa dai a cikin sanarwar da hukumar ta fitar ranar Alhamis, 26 ga watan Fabarairun 2025, wadda ta samu sa hannun shugaban kwamitin wayar da kan masu kada kuri’a Mohammed Kudu Haruna, ta ce: “bayan yin gyara ga dokar zabe ta 2022, da kuma amincewa da dokar zabe ta 2026, hukumar ta yi gyara tare da sauye-sauye ga lokutan shirye-shiryen zabe da kuma na zabukan domin ya yi daidai da tsarin sabuwar doka”.

    Karanta cikakken labarin

16. Sa'o'i 7 da suka wuceAssalamu alaikum

    Masu bin shafin BBC Hausa kai-tsaye barkanmu da safiyar wannan rana ta Juma'a da ake kira da juma'atu babban rana.

    Kamar kullum, yau ma za mu kawo muku abubuwan da ke faruwa a Najeriya da sauran sassan duniya.

    Aisha Babangida ke fatan sake kasancewa da ku a daidai wannan lokaci.

    Za ku iya leƙawa shafukan sada zumuntanmu na intanet, da facebook da X da kuma whatsapp domin karanta sauran labarai da kallon bidiyo da tafka muhawara.