Abubuwan da ke faruwa a Najeriya da sauran sassan duniya

Rahoto kai-tsaye

Nabeela Mukhtar Uba, A'isha Babangida and Haruna Kakangi

1. 22 Fabrairu 2024An samu hatsaniya a majalisar dokokin jihar Zamfara

   A Najeriya, yauwasu 'yan majalisar dokokin jihar Zamfara sun harzuka, game da abin da suka kira 'gazawar gwamnatin jihar wajen magance matsalar tsaro da ta addabi sassan jihar'.

   Har ma sun ayyana rufe majalisar dokokin, sai al'amuran tsaro sun inganta a jihar.

   Sai dai kuma wani bangare na 'yan majalisar dokokin jihar ya musanta wannan batu, yana mai cewa gwamnan jihar yana yin iya bakin kokarinsa ta fuskar tsaron, kuma majalisar na nan bude.

   Da alamu dai an fara zama irin na ’yan marina a majalisar dokokin jihar Zamfara, har wani bangare na 'yan majalisar ya bayar da sanarwar rufe majalisar, harsai yadda hali yayi.

   Ga rahoton AbdusSalam Ibrahim Ahmed

2. 22 Fabrairu 2024‘Yan sanda sun wargaza gungun masu fasa ƙwauri a Jamus

   'Yan sanda a Jamus sun ce sun "ruguza" daya daga cikin gungun masu fasa kwabri da ke aiki a ƙasashen Turai.

   An kama mutane 19 a Jamus bayan wani bincike da 'yan sandan Jamus da Faransa da Belgium suka yi na tsawon shekara guda.

   An gano ƙananan kwale-kwale masu yawa da rigunan kariya a yayin samamen a da aka kai wurare 28.

   Rundunar ‘yan sandan Europol ta ce gungun masu fasa kwaurin na iya aikawa da jiragen ruwa takwas zuwa Burtaniya a kowace rana.

   Daga cikin wadanda aka kama har da shugbannin gugun guda biyar,waɗanda ake zargi da shirya miyagun ayyuka ciki har da safaran ƴan’adam.

   Europol ta ce ’yan ƙungiyar sun cusa mutane kusan 55 a cikin wani kwale-kwale da aka ƙera don ɗaukar mutum 10 kuma sun karɓi tsakanin Yuro 1,000 ($1,082) zuwa Yuro 3,000 kan kowanne mutum ɗaya.

   'Yan kungiyar sun haɗa da 'yan asalin ƙasashen Iraki da Siriya kuma Kurdawa in ji masu binciken a ranar Alhamis.

3. 22 Fabrairu 2024Cutar zazzabin Lassa ta bulla asibitin sojoji na Kaduna

   Gwamnan jihar Uba Sani ya bayar da umarni ga ma'aikatar lafiyar jihar ta gudanar da bincike a asibitin sojoji da ke jihar sakamakon labarin bullar cutar zazzabin Lassa.

   Cikin wata sanarwa da sakataren yada labaran gwamnan jihar, Muhammad Lawal Shehu, ya fitar ya ce gwamnatin jihar ta samu labarin bullar cutar zazzabin Lassa a asibitin sojoji na '44 Nigerian Army Reference Hospital' da ke birnin Kaduna.

   Sanarwar ta ce kawo yanzu cutar ta kashe mutum hudu a cikin harabar asibitin, yayin da aka samu mutum uku da ke nuna alamun kamuwa da cutar.

   Tuni dai jami'an lafiyar jihar da hadin gwiwar hukumomin asibitin suka dauki matakai domin dakile bazuwar cutar.

   An dai dauki samfurin jinin mutanen da ake tunanin sun kamu da cutar domin aika wa hukumar dakile yaduwar cutuka ta kasar don gudanar da bincike.

   Alamomin cutar sun hada da zazzabi da gajiya, da ciwon kai da ciwon makogoro da ciwon tsoka da ciwon kirji da amai da gudawa da tari da kuma ciwon ciki.

   Mece ce cutar Lassa, kuma wadanne matakai ne na kariya?

   Cutar Lassa ta sake dawowa Najeriya

4. 22 Fabrairu 2024Ƙungiyar ƴan arewa na son Tinubu ya dawo da tallafin man fetur

   Wata Ƙungiyar arewa da ke sanya idanu kan harkokin tattalin arziƙi (Arewa Economic Forum), ta yi tsokaci kan halin da tattlin arzikin ƙasar ke ciki, inda ta yi kira ga shugaban ƙasa, Bola Ahmed Tinubu ya sake nazari kan manufar cire tallafin man fetur da kuma dakatar da raba kuɗaɗen da ake yi wa gwamnonin jihohi.

   Shugaban ƙungiyar, Alhaji Shehu Ibrahim Dandakata, wanda ya yi jawabi ga manema labarai a ranar Alhamis a Abuja, ya ce rashin bin diddigi da kuma rashin mai da hankali kan muhimman abubuwa da gwamnoni ke yi shi ya sa talauci da yunwa suka yi ƙamari a ƙasar.

   A madadin sake dawo da biyan tallafin man fetur, ƙungiyar ta yi kira ga shugaban ƙasa da ya nemo hanyoyn da za a tabbatar da cewa gwamnonin jihohi sun yi amfani da rarar kuɗaɗen da ake kasafta musu ta hanyoyin da suka dace domin kuɗaɗen su yi tasiri kan al’umma.

   Dandakata ya kuma buƙaci gwamnatin tarayya da ta duba halin da darajar kuɗin ƙasar ke ciki, ta kuma binciki dalilin da ya sa farashin dala ke tashi bayan duk wani taron kwamitin raba arzikin ƙasa (FAAC).

   Mene ne tallafin man fetur kuma me ya sa batun cire shi ke kaɗa hantar ƴan Najeriya?

   Mece ce gaskiyar mayar da tallafin man fetur a Najeriya?

5. 22 Fabrairu 2024Yadda aka rufe kasuwar 'yan chanji a Abuja

   'Yan kasuwar chanji da ke Abuja sun ce sun rufe kasuwar musayar kudin kasar waje da ke babban birnin kasar Abuja.

   Shugaban kungiyar 'yan kasuwar Abdullahi Abubakar Dauran ya shaida wa BBC cewa sun dauki matakin ne sakamakon yadda gwamnati ta bukaci hakan daga garesu.

   A baya-bayan nan dai jami'an tsaron kasar sun yi ta kai samame kasuwar a wani yunkuri na dakile tashin farashin dala a kasar.

   Shugaban 'yan kasuwar ya ce a bangarensu sun yi biyayya ga umarnin gwamnati, domin yana da yakinin cewa gwamnatin ta yi hakan ne da kyakkyawar manufa.

   Abin da ya kamata ku sani game da kuɗin intanet na Najeriya

   Manyan abubuwa biyar da suke durkusar da darajar naira

6. 22 Fabrairu 2024Babban hafsan sojin Najeriya ya gargaɗi masu neman a yi juyin mulki

   Babban hafsan tsaron Najeriya, Janar Christopher Musa ya gargaɗi masu kiraye-kirayen juyin mulki sakamakon matsin rayuwa, inda ya ce haƙuri abu ne mai muhimmanci a mulkin dimokuraɗiyya.

   Janar Musa ya bayyana hakan ne yau Alhamis, yayin da yake ganawa da ƴan jarida a birnin Fatakwal na jihar Ribas, bayan ƙaddamar da ayyukan wasu gine-gine.

   Babban hafsan sojin ya buƙaci masu furta irin waɗannan kalamai da su daina.

   An dai gudanar da jerin zanga-zangar nuna damuwa kan tsadar rayuwa a jihohin Kano da Oyo da Ogun a ƙasar ta Najeriya, yayin da mutane ke ci gaba da kokawa kan tsadar kayan masarufi.

   Najeriya na fama da hauhawar farashin kayan masarufi da sufuri da kuma ƙarancin kuɗaɗen shiga.

   Bugu da ƙari darajar takardar kuɗin naira na ci gaba da zubewa idan aka kwatanta da dalar Amurka, wadda ke da matuƙar tasiri a ɓangaren tattalin arziƙi na ƙasar.

   Ana dai ɗora alhakin wahalhalun da al'ummar ta Najeriyar ke fuskanta kan matakin shugaban ƙasar, Bola Tinubu na cire tallafin man fetur a ranar da ya karɓi mulki.

   Wannan dai ba sh ne karo na farko ba da sojojin Najeriya ke gargadin 'yan kasar da ke kiraye-kirayen juyin mulki a kasar.

   Tinubu ya naɗa sabbin hafsoshin tsaro a Najeriya

   Tasirin ɓangaranci a naɗin hafsoshin tsaron Najeriya

7. 22 Fabrairu 2024Sojojin Najeriya sun kashe kasurgumin dan fashi a Kaduna

   Jami’an tsaron Najeriya sun yi nasarar kashe wani ɗan bindiga da aka fi sani da Boderi Isyaku.

   Rahotanni sun ce an kashe shugaban ‘yan bindigar ne da wasu mayakan sa a wani artabu da dakarun sojojin Nijeriya, a yankin Bada/Riyawa da ke ƙananan hukumomin Chikun da Igabi na jihar Kaduna.

   Boderi ya shafe kusan shekara goma yana gudanar da munnan ayyuka yankunan a jihohin Kaduna da Neja, ta hanyar kai hare-hare, da kuma garkuwa da mutane.

   An alaƙata shi da kai hare-hare da dama a yankunan da suka haɗa da Sabon Birni da Rigasa da Buruku da Rijana da Kateri da hanyar Kaduna zuwa Abuja da kuma hanyar Kaduna zuwa Birnin Gwari.

   An kuma zarge shi da ƙulla alaƙa da ƙungiyoyin ta’addanci, tare da haɗa kai da su wajen kafa sansanoni a waɗannan yankunan.

   'Rashin haɗin kan gwamnatoci dama ce ga 'yan bindiga'

   ‘Yan bindiga sun hana mu girbe amfanin gona‘

8. 22 Fabrairu 2024Nijar ta ƙayyade farashin shinkafa a kasar

   Gwamnatin mulkin sojin Nijar ta ce ta kayade farashin kudin shinkafa a kasuwanin kasar.

   Gwamantin tace bayan dogon bincike da ta gudanar tsakanin masu ruwa da tsaki ta tsayar da farashin duba da yadda ba inda ake sayar da shinkafa sama da CFA Jika 13.

   Cikin wata sanarwa da ministan harkokin kasuwanci na kasar ya sanya wa hannu, ya gwamnatin kasar ta dauki matakin karyar da farashin shinkafar da ake shigar da ita cikin kasar.

   Sanarwar ta kuma kayyade sabon farashin da za a rika sayar da shinkafar a fadin kasar, daga jaka 16 da rabi ko 17, zuwa jaka 13 da rabi ko 14 a wasu jihohin kasar.

   Gwamnatin ta ce ta dauki matakin ne bayan tuntubar 'yan kasuwa da masu saye da sauran masu zirga-zirgar sufurin da sauran masu ruwa da tsaki.

   Ga cikakken rahoton daga Tchima Illa Issoufou.

   Farashin shinkafa zai tashin da bai taɓa ba cikin shekara 12 - MDD

   Abin da dokar ta-ɓaci kan samar da abinci ke nufi ga talakan Najeriya

9. 22 Fabrairu 2024Kalli yadda wasu tagwaye ke rayuwa a manne da juna

   Tun farko masana sun bayyana cewa yaran ba za su wuce tsawon ƴan kwanaki ba bayan haihuwar su, to amma a cikin kwanakin nan ne tagwayen suka yi bikin cika shekara bakwai a duniya.

   Ana tunanin cewa su ne kaɗai tagwayen da ke girma a manne da juna a faɗin nahiyar Turai.

10. 22 Fabrairu 2024Gwamnatin Benue ta bai wa baƙin makiyaya wa'adin mako biyu su fice daga jihar

    Gwamnatin jihar Benue da ke arewa ta tsakiyar Najeriya, ta bai wa Fulani makiyaya da ta ce baki ne da ke kwarara cikin jihar da kuma ake zargin na dauke da makamai wa’adin makonni biyu su fice a jihar ko su fuskanci fushin hukuma.

    Gwamnan jihar Hyacinth Alia ya kafa wani kwamiti na musamman da zai tabbatar da bin umurnin, sannan ya jaddada cewa har yanzu dokar nan da ta haramta kiwon dabbobi a sarari na ci gaba aiki.

    To sai dai kungiyar Miyetti Allah reshen jihar ta nesanta kanta da ‘ya’yanta da yin kowane hadin gwiwa da dukan wasu bata garin makiya a cikin jihar.

    Ga rahoton Zubairu Ahmad Kasarawa.

    Gwamnatin jihar Benue ta kaddamar da sabuwar rundunar tsaro

    Buhari yana takaici kan zarge-zargen da Gwamnan Benue yake yi masa

11. 22 Fabrairu 2024Majalisar dattawa Najeriya ta amince kafa kwamitin kudi na CBN

    Majalisar dattawan Najeriya ta tabbatar da nadin mutane 12 karkashin jagorancin gwamnan babban bankin kasar, Olayemi Cardoso,a matsayin mambobin kwamitin da za su kula da harkokin kudi a babban bankin Kasar CBN.

    Wannan tabbacin ya zo ne bayan wani rahoton kwamitin kula da harkokin banki da inshora da sauran cibiyoyin hada-hadar kudi na babban bankin ya gabatar a zaman majalisar da aka yi ranar Alhamis.

    Tabbatar da sabbin mambobin MPC ɗin na zuwa ne kwanaki kaɗan kafin taron tsare-tsaren babban bankin na farko karkashin sabon gwamnan bankin.

    An tsara taron ne a ranakun 26 da 27 ga Fabrairu, 2024.

    Membobin su ne:

    1. Olayemi Cardoso – Shugaba

    2. Muhammad Sani Abdullahi – Mamba

    3. Bala M. Bello – Mamba

    4. Emem Usoro – Mamba

    5. Philip Ikeazor - Mamba

    6. Lamido Yuguda - Mamba

    7.Jafiya Lydia Shehu – Mamba

    8. Murtala Sabo Sagagi – Mamba

    9. Aloysius Uche Ordu – Mamba

    10. Aku Pauline Odinkemelu – Mamba

    11. Mustapha Akinwumi – Mamba

    12. Bandele A.G. Amoo – Mamba

    A watan Nuwambar 2023, Cardoso, wanda shugaba Tinubu ya naɗa a matsayin gwamnan CBN a watan Satumba na 2023, ya ce taron na MPC bai yi tasiri ba a karkashin magabacinsa Godwin Emefiele.

    CBN ya ce a ci gaba da amfani da tsofaffin takardun kudi

    Shin kamfanonin kirifto ne ke haddasa tashin farashin dala a Najeriya ?

12. 22 Fabrairu 2024Wasu jihohin Indiya sun haramta sayar da alewar yara

    Wasu jihohi a Indiya sun fara haramta sayar da alewar yara ta "Sweet Camfo."

    A satin daya gabata ne Jihar Tamil Nadu dake Kudancin ƙasar ta saka dokar hana sayar da alawar bayan tabbatar da samun sinadarin da ke haddasa cutar cancer na Rhodamine-B a ciki yayin gwaji.

    Farkon watan nan ne wata ƙungiya a yankin Puducherry ta haramta alewar yayin da da wasu jihohin suka fara gwajin samfuranta.

    Alewar ta 'Sweet Camfo' da ake kira da buddi-ka-baal a Indiyance wanda ke nufin gashin tsohuwa sananniya ce tsakanin yara a duk faɗin duniya.

    Ana samunta a wajen wasan yara da sauran wuraren bukukuwa da yara kan halarta.

    Alewar na da farin jini tsakanin yara saboda yadda take kamar auduga sannan take narkewa da sauri a baki.

    Amma wasu hukumomi a Indiya sun ce haɗarinta ya fi yanda ake tsammani.

    A satin daya gabata jami'an jamai'a Hukumar Kula da Tsaftar Abin ta kasar suka kai wa masu sayar da alewar samame a bakin teku da ke birnin.

    Bincike ya nuna cewa sinadarin na Rhodamine-B da ake samu a alewar na ƙara haɗarin kamuwa da cutar cancer sannan ƙasar Birtaniya da California sun haramta amfani da shi wajen busar da abinci

13. 22 Fabrairu 2024Shin samamen jami’an tsaro a kasuwannin canji zai farfaɗo da darajar naira?

14. 22 Fabrairu 2024Karen shugaban Amurka ya ciji jami'an tsaro har sau 24

    Kwamanda, wato karen Shugaban Amurka, Joe Biden ya ciji jami’an Hukumar tattara bayanan sirri na Amurka akalla sau 24, kamar yadda sabbin takardu suka nuna.

    Bayanan sirrin Amurka sun nuna yadda karen - wanda daga Jamus aka samo shi - ya haifar da fargaba tsakanin masu tsaron fadar shugaban kasar.

    Lamarin da ya haifar da sauye-sauyen dabarun tsaron fadar shugaban kasar.

    Wani babban jami'in ya lura cewa cizon ya haifar da gyare-gyare a cikin dabaru, tare da shawarwari.

    Lamarin ya faru ne tsakanin Oktoban 2022 da Yuli 2023, wanda ya yi sanadin jikkatar jami'in tsaron a sassan jikinsa daban-daban.

    Takardun, wadanda aka samu ta hanyar bukatu na ‘Yancin Bada Labarai, sun nuna irin munin cizon da jami'in ya samu, wanda ya sa aka tsige karen daga Fadar White House a watan Oktoban bara.

    Karen Shugaba Biden ya sake cizon wani ma'aikacin Fadar White House

    An karrama gwarzon karen da ya ceto rayukan sojoji a Afghanistan

15. 22 Fabrairu 2024NLC ba ta tuntuɓe mu ba kafin ayyana yin zanga-zanga a fadin Najeriya - TUC

    Kungiyar Kwadago ta TUC ta yi ikirarin cewa kungiyar kwadago ta Najeriya NLC ba ta tuntube ta ba kafin ta kuduri aniyar gudanar da zanga-zangar kwanaki biyu a fadin kasar a ranakun 27 da 28 ga watan Fabrairun 2024.

    Babban sakataren kungiyar Nuhu Toro a wata wasiƙa da ya aike wa shugabannin NLC ya bayyana rashin jin dadinsa kan yadda kungiyar kwadago karkashin jagorancin Joe Ajaero ba ta tuntuɓi ƙungiyar ‘yan kasuwa da Festus Osifo ke jagoranta ba kafin ta dauki matakin.

    Kungiyoyin biyu dai sun bai wa gwamnati wa’adin kwanaki 14 da ta aiwatar da yarjejeniyar da suka kulla kan magance matsalar tattalin arziki da ke kara ta’azzara ƙasar, ko su tafi yajin aiki.

    Tuni dai hukumar tsaro ta farin kaya (DSS) ta buƙaci kungiyar ƙwadago ta NLC ta jingine yajin aikin da ta shirya yi ta kuma shiga tattaunawa a maimakon daukar matakan da za su iya tayar da zaune-tsaye, amma ƙungiyar da Ajaero ke jagoranta ta dage kan ci gaba da matakin da ta ɗauka na zuwa yajin aiki.

    • Yadda farashin kayan masarufi ya tashi a lokacin mulkin Tinubu
    • Kungiyar kwadago ta janye yajin aiki
    • An koma teburin tattaunawa tsakanin gwamnati da 'yan ƙwadago a Najeriya

16. 22 Fabrairu 2024Tallafin da gwamnatin Legas za ta yi don sassauta ƙuncin rayuwa

    Gwamnan jihar Legas, Babajide Sanwo-Olu ya bayyana wasu jerin matakai da gwamnatinsa za ta ɗauka domin kawo sassauci ga al’ummar jihar sanadiyyar matsin rayuwa da ake fuskanta a faɗin ƙasar.

    Matsin rayuwar da al’ummar Najeriya ke ciki dai ya janyo zanga-zanga a wasu jihohin ƙasar, ciki har da Kano da Oyo da kuma Osun.

    Ana ɗora alhakin tsadar rayuwar da mutane ke fuskanta ne a kan matakan da gwamnatin tarayyar ƙasar ta ɗauka na cire tallafin man fetur da kuma barin kasuwa ta tantance farashin dalar Amurka.

    Lamarin ya haifar da tashin gwauron-zabi na farashin kayan abinci da na masarufi da kuma rashin albarkar kuɗin da ke hannun al’umma.

    Sanadiyyar hakan ne gwamnan jihar Legas a ranar Alhamis ya gabatar da jawabi ga al’ummar jihar tare da sanar da ɗaukan wasu matakai, waɗanda ya ce za su taimaka wajen rage ƙuncin rayuwa da al’umma ke fuskanta.

    Wasu daga cikin matakan su ne:

    Rage ranakun aikin gwamnati zuwa uku a mako

    Gwamnan Sanwo-Olu ya sanar da cewa ma’aikatan gwamnati daga mataki na 1 har zuwa na 14 za su fara zuwa aiki kwana uku a mako.

    Ma’aikata daga mataki na 15 zuwa 17 kuma za su riƙa zuwa aiki sau huɗu a mako.

    To sai dai matakin bai shafi malaman makaranta ba, inda ya ce su, za su ci gaba da zuwa aiki na tsawon kawa biyar a mako.

    Gwamnan Sanwo-Olu ya ce gwamnati za ta yi duk abin da ya kamata domin ƙara wa malaman makarantar tallafin sufuri.

    Ciyar da mutum 1000 a kowace rana

    Gwamnan ya kuma bayyana aniyar gwamnatin ta ciyar da mutanen da ke rayuwa a jihar aƙalla 1000 a kowace rana.

    Ya ce “Za mu zabi masu sayar da abinci (Mama Put) domin samun damar ciyar da aƙalla mutum 1000 a kowace rana a ƙananan hukumomi 20 na jihar tsawon kwana 30 zuwa 60.”

    Samar da kasuwannin sayar da abinci cikin rahusa

    Gwamnan ya ce gwamnatin Legas za ta samar da kasuwannin sayar da abinci waɗanda ake yi wa laƙabi da ‘Sunday Markets.’

    A cewar sa: “Za mu buɗe kasuwanni Lahadi a manyan kasuwanni 42 da aka zaɓo a faɗin jihar.

    A irin waɗannan kasuwa za ku iya sayen abinci cikin farashi mai rangwame.”

    Ya ƙara da cewa “za a iya sayen kayan abinci waɗanda ba su zarce na naira 25,000 ba ne kawai.”

    Haihuwa kyauta

    Gwaman ya ce a yanzu kuma gwamnati za ta ɗauki nauyin mata masu haihuwa a asibitocin jihar.

    Ya ce za a gudanar da hakan ne a asibitocin gwamnati.

    Haihuwa kyautar za ta haɗa har da waɗanda za a yi wa tiyata a lokacin haihuwa.

    Haka nan gwamnati za ta yi rangwame a kan farashin wasu magunguna a asibitocin gwamnatin jihar.

    Rage farashin sufuri

    Sanwo-Olu ya kuma sanar da yin ragowa kan farashin sufuri na kashi 25%.

    Rangwamen, wanda zai fara aiki a ƙarshen makon nan zai shafi masu sufuri ne ta motocin safa da jiragen ƙasa da na ruwa na gwamnati.

    Haka nan gwamnan ya ce gwamnati na tattaunawa da ƙungiyoyin sufuri domin shawo kansu su rage nasu farashin.

    Gwanman dai ya ce gwamnati na sane da halin ƙunci da da al’umma ke ciki kuma ba ta manta da su.

    • Kalaman 'yan Najeriya bayan sake ƙara kuɗin man fetur
    • Ƙarin hauhawar farashin da aka daɗe ba a gani ba na gigita ƴan Najeriya

17. 22 Fabrairu 2024'Za a bayyana sabon shirin kawo ƙarshen yaƙi a Sudan'

    Mataimakin shugaban kasar Sudan Malik Agar ya bayyana cewa nan ba da jimawa ba za a sanar da wani sabon shiri na kawo karshen yakin kasar, in ji shafin Sudan Tribune da ke birnin Paris a ranar 21 ga watan Fabrairu.

    Agar wanda ke magana bayan ya gana da shugaban Uganda Yoweri Museveni a Kampala jiya, bai bayar da cikakken bayani kan shirin ba.

    Jami'in na Sudan ya fada a cikin wata sanarwa da ya fitar, cewa "ya amince da shugaban Uganda kan "sabon shirin kawo karshen yakin Sudan, wanda za a sanar a cikin kwanaki masu zuwa,"

    Kalaman nasa na zuwa ne bayan da shugaban Sudan Abdel Fattah al-Burhan, ya sha alwashi a ranar 20 ga watan Fabrairu cewa ba za a yi wata tattaunawa da dakarun RSF ba har sai an fatattaki kungiyar.

    Ana ci gaba da gwabza fada tsakanin sojoji ƙasar da RSF a cikin wata na 10 a sassa da dama na ƙasar.

    • Rikicin Sudan: Shugabanni sun ɗauki aniyar kawo ƙarshen rikici
    • 'An mayar da mata tamkar ganimar yaƙi a Sudan'

18. 22 Fabrairu 2024Sojojin Mozambik sun daƙile yunƙurin ɗaukar ma'aikata 'yan tsageru

    A jiya ne shugaban ƙasar Mozambique Filipe Nyusi ya sanar da cewa sojojin kasar sun dakile yunƙurin da masu tayar da ƙayar baya suka yi na daukar ma'aikata yara kanana a gundumar Chiure da ke arewacin kasar.

    Shugaban ya bayyana hakan ne a wata ganawa da manema labarai bayan wata ganawa da ya yi da manyan jami'an gwamnatin lardin Cabo Delgado.

    Ya ce masu tayar da ƙayar bayan sun koma yankunan kudancin lardin Cabo Delgado ne domin daukar matasa aikinsu.

    "A gaskiya, dole a yi tsammanin rikicin Ocua saboda suna son ɗaukar yara aikin ta'addanci," in ji Nyusi.

    Yankin ya sami ƙaruwar ayyukan tsageru a 'yan makonnin nan, inda kafafen yaɗa labarai na cikin gida suka danganta shi da wani kamfen na "kashe su a duk inda kuka same su" da kungiyar IS ta kaddamar a ranar 4 ga watan Janairu.

19. 22 Fabrairu 2024Shugaban Somaliland ya sha alwashin aiwatar da yarjejeniya da ƙasar Habasha

    Shugaban Somaliland Muse Bihi Abdi ya ce gwamnatinsa ta kuduri aniyar aiwatar da yarjejeniyar ruwa da ta rattabawa hannu da ƙasar Habasha a ranar 1 ga watan Janairu.

    A karkashin yarjejeniyar, Somaliland za ta yi hayar wani yanki mai nisan kilomita 20 a mashigin tekun Aden zuwa Habasha na tsawon shekaru 50, domin samun amincewa da ita a matsayin ƙasa mai cin gashin kanta.

    Shugaban ya yi wannan tsokaci ne jiya a lokacin da yake halartar wani taron da aka gudanar a babban birnin ƙasar Somaliland, Hargeysa, sa'o'i bayan majalisar ministocin Somaliya ta amince da yarjejeniyar tsaron teku da Turkiyya.

    Abdi ya buƙaci shugaban kasar Somaliya Hassan Sheikh Mohamud da ya taƙaita a cikin yankin da ke karkashin ikonsa, yana mai gargadin cewa Turkiyya da Masar "ba za su kai Somaliya ko'ina ba".

    Masar dai na nuna adawa da yarjejeniyar da Somaliland ta kulla da ƙasar Habasha.

    • Somaliland ta kafa dokar hana fyade a karon farko
    • Akwai yiwuwar fari ya kashe mutum 43,000 a Somalia a bara - MDD

20. 22 Fabrairu 2024Gwamnati za ta ƙara yawan mutanen da za ta bai wa tallafin kuɗi

    Gwamnatin Najeriya na shirin sake fara bai wa talakawan kasar da kuma mafiya rauni miliyan 12 kuɗaɗen tallafi.

    A halin yanzu, kusan mutane miliyan uku ne ke amfana da wadannan shirye-shiryen na tallafi, amma saboda tsadar rayuwa, gwamnati na sa ran karin iyalai miliyan 12 za su cancanci karɓan wadannan kudade.

    Ministan kudi da tattalin arziki, Wale Edun, ne ya sanar da wannan shirin yayin wani taron ma’aikata a Uyo, da ke jihar Akwa-Ibom.

    Ministan ya ce manufar ita ce a bayar da tallafin kuɗi ga al'ummar da ke fuskantar ƙalubalen tattalin arziki da domin magance buƙatunsu na gaggawa, ta yadda za a rage talauci.

    Shawarar sanar da shugaba Tinubu kan shawarar kwamitin ɗin kafin a kammala rahoton karshe shi ne a sanar da shi abubuwan da ke faruwa.

    Edun ya jaddada yin amfani da fasaha don tabbatar da biyan kuɗi mai inganci da gaskiya, da guje wa ayyukan hannu da jinkiri.

    • Rabon kuɗin rage raɗaɗin tallafin mai ya janyo taƙaddama a Najeriya
    • Yadda cire tallafin wutar lantarki a Najeriya zai shafe ku