Newcastle ta ɓaro da Ipswich daga Premier League

Karanta rubutu kawai domin rage cin data

26 Aprilu 2025

Lokacin karatu: Minti 1

Ipswich Town ta yi ban kwana da Premier League ta bana, za ta koma buga Championship a baɗi, sakamakon rashin nasara a 3-0 a hannun Newcastle.

Ranar Asabar Newcastle ta doke Ipswich Town a wasan mako na 34 a babbar gasar tamaula ta Ingila da suka kara ranar a St James Park.

Alexander Isak ne ya fara cin ƙwallo a bugun fenariri tun kan hutu, kuma na 22 da ya zura a raga a Premier League ta bana.

Karon farko da wani ɗan wasan Newcastle ya ci ƙwallo 22 a kakar tamaula, tun bayan Alan Shearer da ya zura 22 a 2003/04.

Dan Burn ne ya kara na biyu bayan da suka sha ruwa suka koma wasa, daga baya Will Osula ya ci na uku a karawar da Eddie Howe ya koma aiki bayan jinya a asibiti, sakamakon cutar Nimoniya.

Ipswich ta karasa karawar da ƴan ƙwallo 10 a cikin fili, bayan da aka bai wa Ben Johnson jan kati tun kan hutu.

Shi ne na biyar a Ipsswich da aka kora a fili a lokacin wasa a kakar nan, Arsenal ce take da ƴan wasa da aka bai wa jan kati da yawa a Premier League 2024/25.

Rashin nasara da Ipswich ta yi a gidan Newcastle ya sa an samu dukkan ukun da za su koma buga Championship a baɗi, saura wasa huɗu-huɗu a kare kakar nan.

Skip Wanda aka fi karantawa and continue reading

Wanda aka fi karantawa