Kalli yadda ambaliyar ruwa ta shafe wasu biranen Libiya

Sama da mutum 5,300 ne aka yi amannar cewa sun mutu sanadiyyar ambaliyar ruwa a birnin Derna na ƙasar Libiya, kamar yadda hukumomi suka ce.

Wani minista na gwamnatin Libiya, Hishan Chkiouat, ya ce "teku na ci gaba da tunkuɗo gomman gawarwaki."

Ana ta kiraye-kirayen samun ƙarin agaji yayin da ake nannaɗe gawarwaki a cikin ledoji tare da binne wasu a manyan ƙaburbura.

Akwai wuraren da ambaliyar ruwa ta yi wa mummunar barna a birnin Derna da ke gabashin Libya bayan da madatsar ruwa ta karye.

Akalla mutam dubu 34 sun rasa muhallansu a yankunan da ambaliyar ta fi barna, kazalika wasu hotuna sun nuna irin mummunar barnar da aka samu a yankunan, da kuma yadda tsaunuka da baraguzan gini suka murkushe motoci.

Akwai kayan tallafin da suka fara isa kasar, to amma saboda rarrabuwar kawunan da a ke fama da su a tsarin siyasar kasar musamma a gabashi da kuma yammaci, firaiministan kasar a Tripoli ya ce za su karbi kayan tallafin da suka zamo wajibi ne kadai.