ગોરા થવા માટે ક્રીમ લગાવો છો તો જાણી લો આ વાતો

ક્રીમ લગાવવી ખરાબ આદત નથી પણ તમારે એ જરૂર વિચારવું જોઈએ કે તમે ક્રીમ કયા કારણસર લગાડો છો.

શરીરના કયા ભાગ પર તે લગાડવામાં આવી રહી છે અને ક્રીમમાં કયાં તત્ત્વો છે?

નિષ્ણાતોનું માનવું છે કે જો તમે આ બધી બાબતોને અવગણી રહ્યા છો તો તમારે આની આડઅસરો ભોગવવાનો વારો આવી શકે છે.

વાસ્તવમાં ક્રીમ બજારમાં આવે તે પહેલાં તેની કડક ચકાસણી કરવામાં આવતી હોય છે અને મોટાભાગની ક્રીમ આ માપદંડો પર ખરી ઊતરી શકતી નથી.

આવી ક્રિમોમાં પારા જેવા ખતરનાક પદાર્થ ઉમેરવામાં આવેલા હોય છે.

જો આમાં જરૂર કરતાં વધારે પારો ઉમેરવામાં આવ્યો હોય તો તે તમારા સ્વાસ્થ માટે જોખમી બની જાય છે.

આપને આ પણ વાંચવું ગમશે

વિશ્વ આરોગ્ય સંસ્થાના જણાવ્યા મુજબ ચારમાંથી ત્રણ મહિલા ડૉક્ટરની સલાહ લીધા વગર જ બ્લીચ વાપરે છે.

બ્રિટનની નેશનલ હેલ્થ સર્વિસનાં જણાવ્યા અનુસાર, ''મહિલાઓ ચહેરાના નિશાન ઢાંકવા અને સુંદરતા વધારવા માટે ઊજળા બનાવનારી ક્રીમનો ઉપયોગ કરે છે.''

આને ચામડી પરના ડાઘની સારવાર માટે પણ ઉપયોગ કરવામાં આવે છે.

ચામડી પર પડતા આ આછા ભૂરા રંગનાં ડાઘને ઝાંય પણ કહેવામાં આવે છે. જે ખાસ કરીને ગર્ભવતી મહિલાઓને થતા હોય છે.

ફેયરનેસ ક્રીમ કઈ રીતે કામ કરે છે?

ગોરા બનાવનારી ક્રીમ આપણા શરીરમાં ઉપલબ્ધ મેલેનિન પર અસર કરે છે.

આપણી ચામડીનો રંગ મેલેનિન પરથી નક્કી થતો હોય છે અને ફેયરનેસ ક્રીમ આ મેલેનિનને ઘટાડી દે છે.

મેલેનિનને કેટલીક રીતોથી ઘટાડી શકાય છે, જેમકે-

ક્રીમમાં બે પ્રકારના બ્લીચિંગ એજન્ટ હોય છે- હાઇડ્રૉક્વિનોન કે કૉર્ટિકોસ્ટેરૉઇડ્સ.

એક ત્વચા નિષ્ણાતના જણાવ્યા અનુસાર, '' ખંજવાળથી પરેશાન લોકોને કૉર્ટિકોસ્ટેરૉઇડ્સ કે ટૉપિકલ સ્ટેરૉઇડ્સ આપવામાં આવતા હોય છે."

"પણ ઘણા બધા લોકો ચામડીની કોઈ પણ સમસ્યા વગર જ આનો ઉપયોગ કરી રહ્યા છે. એટલે સુધી કે લોકો વર્ષોથી આને લગાડી રહ્યા છે.''

ક્રીમને કેટલી અને ક્યાં લગાડવી જોઈએ?

ડૉક્ટરોના જણાવ્યા અનુસાર જે ક્રીમમાં હાઇડ્રૉક્વિનોન હોય છે એને દિવસમાં બે વખત કરતાં વધારે ના લગાડવી જોઈએ.

એને માત્ર હાથ અન પગ પર જ લગાડવી જોઈએ, મોઢા પર એનો ઉપયોગ ના કરવો જોઈએ.

ઉપરાંત આઠ કે બાર અઠવાડિયા કરતાં વધારે સમય એનો ઉપયોગ ના કરવો જોઈએ.

કેટલાય લોકો ડૉક્ટરને પૂછ્યા વગર જ લાંબા વખત સુધી આનો ઉપયોગ કરે છે.

આ લોકો આ ક્રીમને આંખો અને મોઢાની આજૂબાજૂ પણ લગાડે છે જેને કારણે એમને આ ભાગોમાં બળતરા થઈ શકે છે.

કૉર્ટિકોસ્ટેરૉઇડ્સ વાળી ક્રીમોને નાજુક ભાગોમાં લગાડી શકાય છે કારણ કે આ ક્રીમ ખંજવાળ જેવી સમસ્યાની સારવાર માટે વાપરવામાં આવે છે.

છતાં પણ એ જાણવું જરૂરી છે કે આ ક્રીમમાં કૉર્ટિકોસ્ટેરૉઇડ્સની સાથે બીજા કયા-કયા ઘટક દ્વવ્યો ઉમેરવામાં આવ્યાં છે અને ક્રીમ કેવા પ્રકારની છે.

એ જરૂરી છે કે તમે ડૉક્ટરની સલાહ લીધા બાદ જ આવા ઉત્પાદનોનો ઉપયોગ કરો અને જણાવવામાં આવેલા નિર્દેશોનું પાલન કરો.

જો તમે આમ કરવાનું ચૂકો છો તો તમારે આનાં ગંભીર પરિણામો ભોગવવા પડી શકે છે.

ક્રીમની આડઅસરો

નેશનલ હેલ્થ સર્વિસના જણાવ્યા મુજબ બ્લીચિંગ એજન્ટ્સના દુરુઉપયોગથી ઘણા પ્રકારની આડઅસર થઈ શકે છે.

ડૉક્ટરના જણાવ્યા અનુસાર આનાથી બળતરા, સોજા, ચામડી ફાટવી જેવી સમસ્યા ઉદ્ભવી શકે છે.

ઘણા એવા કિસ્સા પણ સામે આવ્યા છે જેમાં ક્રીમની આડઅસર લાંબા સમય સુધી રહ્યી હોય.

જેમાં લોકોની ચામડી પાતળી પડી ગઈ હતી, શરીરમાં નસો ઉપસેલી જોવા મળી હતી, લિવર પર નિશાન જોવા મળ્યાં હતાં અને કિડની પર પણ ખરાબ અસર પડી હતી.

આ સિવાય ગર્ભાવસ્થા દરમિયાન ખોટી રીતે ક્રીમ વાપરવાથી શિશુને પણ નુકસાન થઈ શકે છે.

ડૉક્ટરની સલાહ લીધા વગર ક્રીમનો ઉપયોગ કરવાથી ગંભીર અને લાંબા સમય સુધી રહેનારી આડઅસર થઈ શકે છે.

બની શકે કે તમે ઊજળા થવા માટે ક્રીમ લગાડી રહ્યા હોવ અને એના બદલે વધારે કાળા થઈ જાવ.

ડૉક્ટરના જણાવ્યા અનુસાર આ પણ ફેયરનેસ ક્રીમની એક આડઅસર હોઈ શકે છે.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો