Train 18 : વંદે ભારત એક્સપ્રેસ મોદીએ લીલીઝંડી આપ્યાને બીજે જ દિવસે ટૂંડલામાં ખોટકાઈ

મોદીએ લીલીઝંડી આપ્યાને બીજે જ દિવસે વંદે ભારત એક્સપ્રેસ ખોટકાઈ ગઈ છે અને તેને અર્ધે રસ્તે પાછી વાળી દિલ્હી લાવવામાં આવશે.

સમાચાર સંસ્થા એએનઆઇએ આ અંગે ટ્ટીટ કરીને રેલવે મંત્રાલયના હવાલાથી લખ્યું કે વંદે ભારત એક્સપ્રેસ ટૂંડલાથી 18 કિલોમીટર દૂર ઊભી છે.

ટ્રેક પર પશુઓને લીધે મુસાફરી ખોરવાઈ હોવાની સંભાવના છે. ટ્રેનનું કોમર્સિયલ પરિવહન 17 ફેબ્રુઆરીથી શરુ થશે. અવરોધોને હટાવીને ટ્રેન 8.15 વાગે સવારે દિલ્હી પહોંચશે.

જોકે, ટ્રેન ઉપર સવાર ઇન્ડિયન એક્સપ્રેસના પત્રકારે, છેલ્લા ડબ્બાઓમાં બ્રેક જામ થવાની, શંકાસ્પદ અવાજોની, ધૂમાડા નીકળવાની તેમજ વીજ પુરવઠો ખોરવાયો હોવાની માહિતી આપી છે.

ટ્રેનને વારાણસીથી દિલ્હી પરત લાવવામાં આવી રહી હોવાનું પણ સમાચાર પત્રની વેબસાઇટ નોંધે છે.

સોશિયલ મીડિયા પર ઊડી મજાક

બહુચર્ચિત હાઇસ્પીડ ટ્રેન શરુ થયાને બીજે જ દિવસે ખોટકાતા ટ્ટિટર પર અનેક લોકો તેની મજાક ઊડાવતા પણ જોવા મળ્યા હતા.

પત્રકાર રાજેશ મહાપાત્રએ લખ્યું કે આ સરકારમાં બધુ જ બ્રેકિંગ ડાઉન થઈ રહ્યું છે.

કૉંગ્રેસની કમ્યુનિકેશન ટીમના સભ્યએવા રચિત સેઠે લખ્યું કે આ મોદી સરકાર જેવું છે જેની શરુઆત હાઇપ અને હાઇપરથી થાય છે અને છેવટે એ જુમલા તરીકે પડી ભાંગે છે.

ધ હિંદુના પોલિટિકલ એડિટર નિસ્તુલા હેબ્બરે લખ્યું કે વિકાસ દિલ્હીથી શરુ થયો અને ટૂંડલામાં અટવાયો. ટ્ર સ્ટોરી.

કૉંગ્રેસના કાર્યકર એવા પ્રવેશ શર્માએ લખ્યું કે ટ્રેન 18 ટૂંડલામાં ખોટકાઈ. આ મોદીનો વધુ એક જોક છે.

અમુક ટ્ટીટમાં તો ગુજરાતની વિધાનસભાની ચૂંટણીમાં વડા પ્રધાન ઉડાવેલા સી પ્લેનને પણ યાદ કરવામાં આવ્યું હતું.

સંજીવ હરિહરન નામની વ્યકિતએ વંદે..નોટ ઇવન વન ડૅ એવી કૉમેન્ટ કરી હતી.

ઉલ્લેખનીય છે કે રેલવે મંત્રી પિયુષ ગોયલે ટ્રેનની સત્તાવાર માહિતી ટ્ટિટ કરી હતી. જેમાં તેમણે 17 તારીખથી ટિકિટ બુકિંગ કરવાનું કહ્યું હતું.

ઉલ્લેખનીય છે કે -18 કે જેને 'વંદે ભારત એક્સપ્રેસ' નામ આપવામાં આવ્યું છે તે દેશની પહેલી એંજિન વગરની ટ્રેન છે કે જે નવી દિલ્હીથી વારાણસી સુધીનો પ્રવાસ ખેડશે.

ટેકનિકલ વિશેષતાઓનાં કારણે વંદે ભારત એક્સપ્રેસ સામાન્ય ટ્રેન કરતા વધારે ગતિશીલ હશે અને તેની મહત્તમ ઝડપ 160 કિલોમિટર પ્રતિકલાકની હશે.

આ ટ્રેનને સ્વદેશી સેમી હાઈ-સ્પીડ ટ્રેન ગણાવવામાં આવી રહી છે.

તમે આ વાંચ્યું કે નહીં?

વંદે ભારત એક્સપ્રેસની જાણવા જેવી બાબતો

એનડીટીવીના અહેવાલ મુજબ, વંદે ભારત એક્સપ્રેસ નવી દિલ્હીથી સવારે છ કલાકે ઉપડશે અને વારાણસી સુધીનું અંતર નવ કલાક 45 મિનિટમાં કાપશે.

આ ટ્રેન કાનપુર અને પ્રયાગરાજ એમ બે સ્ટેશન પર જ રોકાશે.

આ ટ્રેન અઠવાડિયામાં પાંચ દિવસ મંગળવાર, બુધવાર, શુક્રવાર, શનિવાર અને રવિવારના રોજ ચાલશે. બાકીના બે દિવસ ટ્રેનનું સમારકામ કરવામાં આવશે.

'મેક ઇન ઇન્ડિયા' અંતર્ગત વંદે ભારત ટ્રેનનું નિર્માણ ભારતમાં જ થયું છે અને તેને 18 મહિનામાં બનાવવામાં આવી છે.

ટ્રેનનું નિર્માણ ICF (ઇન્ટિગ્રલ કોચ ફૅક્ટરી) ચેન્નાઈ દ્વારા રૂ. 97 કરોડના ખર્ચે કરવામાં આવ્યું છે.

વર્ષ 2018માં બનવાના કારણે આ ટ્રેનને T-18 નામે ઓળખ મળી હતી.

વંદે ભારત એક્સપ્રેસની ખાસિયત

એનડીટીવીમાં પ્રકાશિત અહેવાલ મુજબ બાકી ટ્રેનની જેમ ન તો તેના ડબ્બા બદલવામાં આવે છે અને ન તો તેમાં એંજિન લાગેલું હોય છે.

એક ટ્રેનનાં બધાં જ કંપોનેન્ટ્સ મળીને તે એક સેટની જેમ ચાલે છે.

આ ટ્રેનની આખી બૉડી ખાસ એલ્યૂમિનિયમની બનેલી છે એટલે કે ટ્રેનનું વજન ખૂબ હલકું રહે છે.

તેને તુરંત જ બ્રેક લગાવીને રોકવી પણ સહેલી હશે અને તેને તુરંત જ તેજ ગતિ પણ આપી શકાય છે.

ટ્રેનની અન્ય ખાસિયતોની વાત કરવામાં આવે તો :

વંદે ભારત એક્સપ્રેસનું ભાડું અને ભોજન

એનડીટીવીના અહેવાલ મુજબ વંદે ભારત એક્સપ્રેસની ચેર કાર ટિકિટનું ભાડું આશરે 1760 રૂપિયા, જ્યારે ઉચ્ચ શ્રેણીનું ભાડું 3310 રૂપિયા નક્કી કરાયું છે.

ભોજનની વાત કરીએ તો નવી દિલ્હીથી વારાણસી જવા માટે યાત્રિઓએ ઉચ્ચ શ્રેણીમાં સવારની ચા, નાશ્તા અને લંચ માટે 399 રૂપિયા આપવાના રહેશે.

જ્યારે ચેર કારના યાત્રિઓએ તેના માટે 344 રૂપિયા ચૂકવવા પડશે.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો