મનુ ભાકર પેરિસ ઑલિમ્પિકમાં ત્રીજા મેડલથી ચૂક્યાં, 25 મીટર પિસ્તોલ સ્પર્ધામાં ચોથા ક્રમે રહ્યાં
ઇમેજ સ્રોત, GETTY IMAGES
ભારતીય નિશાનબાજ મનુ ભાકર પેરિસ ઑલિમ્પિકીમાં પદકોની હેટ્રિક ના લગાવી શક્યાં. તેઓ મહિલા વર્ગ 25 મીટરમાં પિસ્તોલ સ્પર્ધામાં ચોથા ક્રમે રહ્યાં
આ પહેલાં તેમણે 10 મીટર ઍર પિસ્તોલ સ્પર્ધા અને મિક્સ્ડ 10 મીટર ઍર પિસ્તોલ ટીમ સ્પર્ધામાં કાંસ્ય પદક જીત્યું હતું.
તેમણે મિક્સ્ડ ટીમ ઇવેન્ટમાં સરબજોતસિંહ સાથે કાસ્ય પદક મેળવ્યું હતું.
મનુ ભાકર એક ઑલિમ્પિકમાં બે મેડલ જીતનાર પ્રથમ ભારતીય છે.
મનુ ભાકર કોણ છે?
ઇમેજ સ્રોત, Getty Images
વર્ષ 2020માં મનુ ભાકરે 'બીબીસી ઇમર્જિંગ પ્લેયર ઑફ ધ ઇયર 2020'નો પુરસ્કાર જીત્યો હતો. આ સન્માન મેળવતી વખતે તેમણે દેશ માટે વધુમાં વધુ મેડલ જીતવાની નેમ વ્યક્ત કરી હતી.
પોતનાં પ્રાસંગિક ઉદ્દબોધનમાં મનુ ભાકરે કહ્યું હતું, "જ્યારે મને જાણવા મળ્યું કે તમે લોકો લાઇફ ટાઇમ અચિવેન્ટ ઍવૉર્ડની સાથે મને ઇમર્જિંગ ઇન્ડિયન સ્પૉર્ટ્સવુમનનો પુરસ્કાર આપી રહ્યાં છો, તો મને ખૂબ જ સારું લાગ્યું હતું."
"લાઇફ ટાઇમ અચિવમેન્ટ ઍવૉર્ડ મેળવવા માટે તમારે લાંબા સમય સુધી સારું પ્રદર્શન કરવું પડે, ત્યારે તે સન્માન મળે. જ્યારે સારું કરી શકે તેમ હોય, જે દેશ માટે વધુ મેડલ મેળવી શકે તેમ હોય, તેમને ઇમર્જિંગ ઍવૉર્ડ મળે છે."
'બીબીસી ઇન્ડિયન સ્પૉર્ટ્સ વુમન ઑફ ધ ઇયર' હેઠળ 'બીબીસી ઇમર્જિંગ પ્લૅયર ઑફ ધ ઇયર 2020' ઍવૉર્ડ કૅટેગરી હેઠળ આશાસ્પદ મહિલા ખેલાડીઓને સન્માનિત કરવામાં આવે છે.
End of સૌથી વધારે વંચાયેલા સમાચાર
'બીબીસી ઇન્ડિયન સ્પૉર્ટ્સવુમન ઑફ ધ ઇયર'નો હેતુ ભારતનાં મહિલા ખેલાડીઓને તેમની સિદ્ધિઓ માટે સન્માનિત કરવાનો, મહિલા ખેલાડીઓનાં પડકારો વિશે ચર્ચા કરવાનો તથા તેમની સાંભળેલી કે નહીં સાંભળેલી કહાણીઓને દુનિયા સામે લાવવાનો છે.
બીબીસી ઇન્ડિયન સ્પૉર્ટ્સવુમન ઑફ ધ ઇયર કાર્યક્રમમાં સન્માન મેળવતી વખતે મનુ ભાકરે જે વાત કહી હતી, તેને પોતાના ઇરાદા સાથે જોડીને એક તાંતણે બાંધી દીધી છે.
...અને મનુએ કમબૅક કર્યું
ઇમેજ સ્રોત, Getty Images
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
પેરિસ ઑલિમ્પિકમાં મનુ ભાકરનું દમદાર પ્રદર્શન એ નિષ્ફળતા બાદ જોરદાર કમબૅકની કહાણી પણ છે.
વર્ષ 2021માં જાપાનમાં ઑલિમ્પિક રમતોત્સવ ઉજવાયો હતો, જે ટોકિયો 2020 તરીકે ઓળખાય છે. એ સમયે મનુ 19 વર્ષનાં હતાં, તેમની ઉપર દેશને ભારે આશાઓ હતી, પરંતુ મનુના ઇરાદા ડગી ગયા હતા અને તેઓ પદક માટેની સ્પર્ધામાં સામેલ થઈ શક્યાં ન હતાં.
આ તેમના માટે ખૂબ જ આંચકાજનક હતું. હારની નિરાશાની વચ્ચે તેઓ આશા ગુમાવવા લાગ્યાં હતાં અને તેમનું મન શૂટિંગની રમતમાંથી ઉઠવા લાગ્યું હતું. બૉક્સિંગ, ઍથ્લૅટિક્સ, સ્કૅટિંગ, જુડો તથા કરાટે જેવી રમતોને અજમાવ્યા બાદ તેમણે 14 વર્ષની ઉંમરે શૂટિંગ સ્વીકાર્યું હતું.
વર્ષ 2016માં મનુ ભાકરે શૂટિંગમાં હાથ અજમાવવાનું નક્કી કર્યું હતું. એ પછી તેમના પિતા રામકિશન ભાકરે મરીન એંજિનિયરની નોકરી છોડી દીધી અને દીકરીનાં સપનાં પૂર્ણ કરવા માટે દિવસરાત એક કરી દીધી.
પાંચ વર્ષમાં મનુને અનેક સફળતાઓ મળી. વર્ષ 2017માં નેશનલ શૂટિંગ ચૅમ્પિયનશિપની 10 મીટર ઍર પિસ્ટલ સ્પર્ધામાં તેમણે વિશ્વમાં પ્રથમ ક્રમે રહેલાં હીના સિદ્ધુને હરાવ્યાં હતાં.
વર્ષ 2018માં વૂમન્સ વર્લ્ડકપમાં મનુએ 10 મીટર ઍર પિસ્ટલમાં એક જ દિવસમાં બે ગોલ્ડમેડલ જીત્યાં હતાં. આ માટે તેમણે બે વખતનાં વર્લ્ડ ચૅમ્પિયન મૅક્સિકોના નિશાનચી અલજાંદ્રા જવાલાને હરાવ્યાં હતાં.
વર્ષ 2019માં તેમણે ઑલિમ્પિક 2020 માટેનું સ્થાન મેળવ લીધું હતું, જેના કારણે તેમનાંમાં થોડો ઍટિટ્યૂટડ પણ આવી ગયો હતો. જોકે, નિશાનબાજીની દુનિયામાં તેમનો સિતારો ચમકી રહ્યો હતો.
ટોકિય ઑલિમ્પિક દરમિયાન ભારતીય રમતો ઉપર નજર રાખનારા દરેક રસિકની નજર મનુ ભાકરના પર્ફૉર્મન્સ ઉપર હતી, પરંતુ એક ઇવેન્ટ દરમિયાન તેમની પિસ્ટલ બગડી ગઈ હતી, એ પછી તેમનું ઑલિમ્પિકઅભિયાન પાટા ઉપરથી ઉતરી ગયું હતું અને બાકીની કસર ઍટિટ્યૂડે પૂરી કરી હતી.
આશાઓના અશ્વ ઉપર સવાર મનુ ભાકર પોતાની નિષ્ફળતાને પચાવી ન શક્યાં અને અસફળતાનો દોષ તેમના તત્કાલીન કૉચ જશપાલ રાણાને દીધો. પૂર્વ કૉચ રાણાએ મનુના નિવેદનને 'અપરિપક્વ' ગણાવ્યું, એ પછી બંનેના રસ્તા અલગ થઈ ગયા.
એ પછી રમત પ્રત્યે મનુ ભાકરનું મન ઉતરી રહ્યું હતું. અનેક મીડિયા ઇન્ટરવ્યૂ દરમિયાન તેમણે સ્વીકાર્યું હતું કે તેઓ શૂટિંગ છોડીને ભણતર માટે વિદેશ જવાનું વિચારવા લાગ્યાં હતાં. જોકે, પેરિસ ઑલિમ્પિક જેમ-જેમ નજીક આવની રહ્યો હતો, તેમ-તેમ તેઓ પોતાને એક તક આપવા વિશે પણ વિચારી રહ્યા હતા.
