Nogaba ibitero kuri Irani izindi ncuro zirenga ijana hamwe vyokenerwa – Trump
Perezida wa Reta Zunze Ubumwe za Amerika, Donald Trump, yavuze ko hamwe vyoba ngombwa yotera Irani incuro ijana zirenga kugira ayibuza kuronka ibirwanisho vya nikleyere.
Mu kiganiro yagiranye n’imwe mw’iradio zo muri Amerika, yamenyesheje ko iyo hataba ibikorwa yakoze, Israel hamwe n’akarere kose k’Ubuseruko bwo Hagati biba vyarazimanganye muri iki gihe.
Muri ico kiganiro, avuga ko yategetse ibitero ku bibanza n’inyubako vya Irani birangurirwamwo imigambi ya nikleyere igihe ico gihugu cari gisigaje indwi zibiri gusa ngo gikore ikirwanisho kirimbuzi.
Trump ashimangira kandi ko, n’ubwo ibinyamakuru bivuga ibitandukanye, Amerika ari yo igenzura umuhora wa Hormuz.
Yongeye kuvuga ko ubushobozi bwa Irani bwo kurasa misire no gukoresha ama ‘drones’ bwagabanutse cane, kandi ko ubutunzi bw’ico gihugu buri hafi gusenyuka.
Trump yise “icago” amasezerano yari yashitsweko mu 2015 hagati ya Irani n’ibihugu rutura harimwo Amerika ku butegetsi bwa Obama. Yabandanije avuga ko kuva ayo masezerano asinywe vyari bikenewe ko Irani ibuzwa kuronka ikirwanisho ca nikleyere.
Yise Irani “umuterabwoba wo mu Buseruko bwo Hagati”, yongerako ati: “Nk’uko twabibonye, Irani yaranateye ibihugu nka Qatar, Bahrain, Kuwait na Emirats Zunze Ubumwe z’Abarabu, ....”
Perezida wa Amerika yashimitse ku ciyumviro c’uko iyo Amerika itagira ico ikoze mu vya gisirikare, Irani yari kuba yarasenyuye ivyo bihugu vyose kandi yobaye iriko yitegurira gutera ubutaka bwa Amerika.
Izindi nkuru wosoma:
