Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Amajonjora y'igikombe cy'isi cyo mu 2022: I Cairo Egypt yahatsindiye Senegal ifite igikombe cy'Africa
Igitego cyo ku munota wa kane Saliou Ciss wa Sénégal yatsinze ikipe ye i Cairo cyari gihagije ngo Misiri yegukane intsinzi y'igitego 1-0 mu mukino ubanza wo kwisobanura hagati y'aya makipe wo guhatanira itike yo gukina imikino y'igikombe cy'isi.
Ciss nta mahirwe na busa yagize ubwo ishoti ya Mohamed Salah yakubitwaga n'umunyezamu Edouard Mendy igakubita ku mutambiko w'izamu, mbere yuko umupira ukubita kuri uyu myugariro wa Sénégal ukajya mu izamu.
Uyu mukino wafashwe nko gusubiramo umukino wa nyuma w'igikombe cy'Afurika cy'ibihugu (CAN/AFCON) - watsinzwe na Sénégal kuri za penaliti nyuma yuko wari warangiye amakipe yombi anganya 0-0 - no kubera uburyo wari urimo kwigengesera cyane nk'uwo wabaye mu kwezi kwa kabiri, haboneka uburyo bucye bwavamo igitego kuri buri ruhande.
Ni umukino wari urimo ba rutahizamu babiri bakomeye ba Liverpool Salah na Sadio Mané, ku ruhande rwa Sénégal, ariko nta n'umwe muri bo wigaragaje cyane.
Nyamara ariko, ku munsi wo ku wa gatanu wari wiganjemo amakipe yo muri Afurika y'amajyaruguru - Algeria na Tunisia na zo zatsinze 1-0, nubwo zari zasuye, na Maroc ibona igitego cyo hanze mu mukino yanganyijemo na Repubulika ya Demokarasi ya Congo wabereye i Kinshasa - kutagira amahirwe kwa Ciss kwatumye Misiri na yo igera ku bikorwa byakozwe n'abaturanyi bayo bo kuri uyu mugabane w'Afurika.
Aya makipe azongera guhura ku wa kabiri mu mukino wo kwishyura, izatsinda ikazabona itike yo gukina imikino y'igikombe cy'isi muri Qatar mu kwezi kwa cumi na kumwe.
