Intamba z'u Burundi zanganyije na Taifa Stars ya Tanzania mu majonjora y'igikombe cy'isi

Intamba mu Rugamba z'u Burundi zimaze kunganya na Taifa Stars ya Tanzania igitego 1 - 1 mu mukino ubanza w'amajonjora wo gushaka itike y'igikombe cy'isi cya 2022 kizabera muri Qatar.

Uyu mukino waberaga ku kibuga cyitiriwe intwari i Bujumbura, igice cya mbere cyaranzwe no guhusha amahirwe y'ibitego ku mpande zombi, mu mukino wari unogeye ijisho.

Intamba mu Rugamba imbere y'abafana bazo zagerageje kwiharira umupira kurusha Taifa Stars mu gice cya mbere.

Mu gice cya mbere ariko Tanzania yahushije uburyo bwari bwabazwe ubwo rutahizamu Mbwana Samatta yasigaragana n'umunyezamu Jonathan Nahimana uyu agakuramo umupira wa Samatta.

Hari ku makosa yo guhererekanya umupira kw'abakinnyi b'inyuma b'Intamba mu Rugamba. Igice cya mbere cyarangiye ari ubusa ku busa.

Intamba ni zo zaje gufungura amazamu ku munota wa 81 w'umukino ku gitego cyinjijwe na Amissi Cédric ku mupira yari aherejwe neza na Mohamed Amissi wari winjiye mu kibuga asimbuye Bienvenue Kanakimana.

Ntibyateye kabiri ariko kuko ku munota wa 84 Tanzania yishyuye ku gitego cyinjijwe na Simon Msuva, bivuye ku gusohoka nabi k'umunyezamu Nahimana Jonathan.

Umukino wo kwishyura w'Intamba na Taifa Stars uteganyijwe nyuma y'icyumweru kimwe tariki 8 z'uku kwezi kwa cyenda muri Tanzania.

Muri iyi mikino kandi Amavubi y'u Rwanda yo azakina na Seychelles ejo ku wa kane, umukino uzabera mu birwa bya Seychelles aho iyi kipe yamaze kugera.

Mu kwezi gutaha kwa cumi Intamba mu Rugamba zizakina n'Imisambi ya Uganda mu mikino yo gushaka umwanya mu irushanwa nyafurika ry'abakina imbere mu bihugu byabo, CHAN.

Muri iyi mikino yo gushaka umwanya muri CHAN Amavubi nayo azakina na Ethiopia mu kwezi kwa cumi.