Aigle Noir y’i Burundi ivuga ko itazitabira Kagame Cup izabera mu Rwanda

Inyandiko gusa
Aigle Noir ivuga ko itazitabira Kagame Cup

Ahavuye isanamu, Facebook / Aigle Noir

Insiguro y'isanamu, Aigle Noir ivuga ko itazitabira Kagame Cup

Club Sportif Aigle Noir y'i Burundi yatangarije ishyirahamwe ry'umupira w'amaguru mu Burundi ko itazitabira irushanwa rya CECAFA Kagame Cup rizabera mu Rwanda mu kwezi gutaha.

Iri rushanwa ryaherukaga kubera mu Rwanda mu mwaka wa 2010, ibihugu by'u Rwanda n'u Burundi bidafitanye amakimbirane ya politiki.

Ni irushanwa ry'amakipe yabaye aya mbere mu karere k'ibiyaga bigari ritegurwa na CECAFA kuva mu myaka ya 1967, kuva mu 2002 rikaba ryitirirwa Perezida Kagame w'u Rwanda uritera inkunga.

Ku mugoroba wo ku munsi w'ejo ku wa gatanu, ikipe ya Club Sportif Aigle Noir yatwaye igikombe cya shampiyona y'i Burundi, yasohoye ibaruwa - iri no ku rubuga rwa Facebook rw'iyi kipe - imenyesha ishyirahamwe ry'umupira w'amaguru ryaho ko itazitabira iri rushanwa.

Muri iyi baruwa, ubuyobozi bw'iyi kipe buvuga ko mu matariki y'iri rushanwa, iyi kipe izaba iri mu mikino ya gicuti muri Uganda na Tanzaniya, yitegura shampiyona itaha y'u Burundi.

Na Simba ni uko

Ku munsi w'ejo ku wa gatanu kandi, Simba Sports Club yatwaye igikombe cya Tanzaniya - ikinamo abakinnyi b'u Rwanda Haruna Niyonzima na Meddie Kagere - yatangaje ko itazitabira iri rushanwa kuko izaba irimo yitegura shampiyona itaha.

CECAFA Kagame Cup y'uyu mwaka iteganyijwe kuba hagati y'itariki ya 7 n'iya 21 y'ukwezi gutaha kwa karindwi i Kigali.

CECAFA iritumiramo amakipe yabaye aya mbere mu bihugu bya Kenya, u Burundi, u Rwanda, Ethiopia, Uganda, Tanzaniya, Zanzibar, Djibouti, Eritrea, Sudani, Somalia na Sudani y'epfo.

Skip Ibisomwa cane and continue reading
Ibisomwa cane

End of Ibisomwa cane

Uyu mwaka, CECAFA yari yatumiye n'ikipe ya Young Africans yo muri Tanzaniya.

Yatumiye kandi amakipe ya Zesco United yo muri Zambia, AS Vita Club na DC Motema Pembe zo muri Repubulika ya Demokarasi ya Kongo zamaze kwemeza ko zizitabira, nkuko CECAFA ibitangaza.

U Rwanda ruzakira iyi mikino ruzahagararirwa na Rayon Sports, APR FC na Mukura VS.

Uganda yo izahagararirwa na Kampala Capital City Authority (KCCA) yatwaye igikombe uyu mwaka.

Ikipe yegukanye iri rushanwa ihembwa amadolari 30000 y'Amerika.