Uhagarariye Gareth Bale avuga ko uko afashwe n'abafana ba Real Madrid ari 'agasuzuguro'

Uhagarariye Gareth Bale avuga ko uko uyu mukinnyi ari gufatwa na bamwe mu bafana ba Real Madrid "nta kindi kitari agasuzuguro".

Bamwe mu bafana bari ku kibuga Santiago Bernabéu cya Real Madrid bakomereye uyu rutahizamu ukomoka mu gihugu cya Wales - kimwe mu bigize ubwami bw'Ubwongereza - ubwo yasimburwaga ku munota wa 61 mu mukino wo ku wa gatandatu w'icyumweru gishize Real Madrid yatsinzwe na Barcelona igitego 1-0.

Jonathan Barnett, uharagarariye Bale, yagize ati: "Iki gisekuru cy'abafana ba Real bazahora birahira ibitego bya Gareth mu myaka iza".

"Bagakwiye guterwa isoni na bo ubwabo. Abo bafana bagakwiye kuba bari gusoma ibirenge bye".

Bale w'imyaka 29 y'amavuko, yageze muri Real mu mwaka wa 2013 avuye muri Tottenham, aguzwe miliyoni 85 z'amapawundi. Hamwe na Real, amaze gutsindira ibikombe bine bya Champions League n'igikombe kimwe cya shampiyona ya La Liga y'aha muri Espanye.

Amaze gutsinda ibitego 13 mu mikino 33 amaze gukinira iyi kipe muri uyu mwaka w'imikino.

'Nta ho azajya kuri iyi mpeshyi'

Ariko nubwo afitanye n'iyi kipe kontaro yo kuyikinira kugera mu mwaka wa 2022, hashize ibyumweru hibazwa kuri ejo hazaza he muri iyi kipe.

Barnett wongeyeho ati: "Gareth akwiye kubahwa cyane bishoboka. Uko abafana ba Real bari kumufata nta kindi kitari agasuzuguro".

"Mu myaka itandatu amaze muri Espanye, yatsindiye buri kimwe cyose. Ni umwe mu bakinnyi b'intyoza ku isi".

"Nubwo hari ibiri kumuvugwaho mu bitangazamakuru byo muri Espanye, we arishimye, avuga ururimi rw'Icyespanyole ku kigero cyiza kandi nta kibazo afitanye n'abandi bakinnyi ba Real. Abantu bandika ibi bintu nta kintu na kimwe bamuziho".

"Nta kiganiro na kimwe cyari bwabeho kinyanye nuko Gareth yava muri Madrid. Nta ho azajya kuri iyi mpeshyi".

"Nubwo hari ibyatangajwe, we arishimye, arashaka kuguma muri Real kandi na bo [Real] baramushaka".

"Turambiwe amakuru y'ibinyoma yuko agiye kugenda".

Mu kwezi gushize kwa kabiri, bimwe mu bitangazamakuru byasubiyemo amagambo y'umunyezamu Thibaut Courtois avuga ko Bale ataramenyera kubaho mu buzima bushya bwo muri Espanye ndetse ko hari ijoro yanze gusohokana na bagenzi be bakinana muri Real.

Myugariro Marcelo yabwiye ikinyamakuru Marca cyo muri Espanye ko Bale atavuga ururimi rw'Icyespanyole kandi ko ashyikirana akoresheje gusa guca amarenga.