Real Madrid yagize Santiago Solari umutoza uhoraho

Real Madrid yagize Umunya-Argentine Santiago Solari umutoza wayo uhoraho kugeza mu kwezi kwa gatandatu mu mwaka wa 2021.

Ku itariki ya 29 y'ukwezi gushize kwa cumi, nibwo Solari w'imyaka 42 y'amavuko yari yagizwe umutoza w'inzibacyuho w'iyi kipe nyuma yo kwirukanwa kw'Umunya-Espanye Julen Lopetegui wahoze ari umutoza w'ikipe y'igihugu ya Espanye.

Kuva icyo gihe, amaze gufasha Real Madrid gutsinda imikino ine imaze gukina - intangiriro nziza cyane igizwe n'umutoza mu mateka y'iyi kipe.

Real Madrid yagombaga guha aka kazi Solari - cyangwa se undi mutoza - kuko amategeko yo muri Espanye atemerera ikipe kuba yagira umutoza w'inzibacyuho mu gihe kirenze ibyumweru bibiri.

Itozwa na Solari, Real Madrid yatsinze imikino yayihuje na Melilla mu mikino y'igikombe cya Copa del Rey, itsinda Viktoria Plzen muri Champions League, inatsinda kandi Real Valladolid na Celta Vigo mu mikino ya shampiyona ya Espanye izwi nka La Liga.

Muri iyo mikino, Real Madrid yatsinze igiteranyo cy'ibitego 15, itsindwa ibitego bibiri.

Itangazo rigufi Real Madrid yatangaje ku rubuga rwa interineti rwayo yemeza ko ihaye Solari akazi k'ubutoza mu buryo buhoraho, rivuga ko yatangiye kuyitoza by'inzibacyuho iri ku mwanya wa cyenda ku rutonde rw'agateganyo rwa La Liga.

None ubu ikaba iri ku mwanya wa gatandatu - irushwa amanota ane na Barcelona ya mbere ku rutonde rw'agateganyo rwa La Liga.