Cristiano Ronaldo ntazakina umukino umwe wa Champions League kubera ikarita itukura

Impuzamashyirahamwe y'umupira w'amaguru i Burayi, Uefa, yanzuye ko rutahizamu Cristiano Ronaldo w'ikipe ya Juventus azashobora gukina mu mukino wa Champions League wo mu kwezi gutaha kwa cumi uzamuhuza n'ikipe yahoze akinamo ya Manchester United.

Uefa yongeyeho ko agomba kudakina umukino umwe kubera ikarita y'umutuku yeretswe ubwo Juventus yatsindaga Valencia 2-0 mu mukino wa Champions League - irushanwa rihuza amakipe yabaye aya mbere iwayo i Burayi - wabaye mu cyumweru gishize.

Muri uwo mukino, Cristiano w'imyaka 33 y'amavuko yagaragaye akwega umusatsi wa myugariro Jeison Murillo w'ikipe ya Valencia.

Ni yo karita itukura ya mbere yari yeretswe mu mikino ya Champions League.

Ku itariki ya 23 y'ukwezi gutaha kwa cumi, Juventus izakina na Manchetser United mu mukino wa Champions League wo mu itsinda H uzabera ku kibuga Old Trafford cya Manchester United.

Iyo Cristiano aramuka ahagaritswe imikino itatu, ntabwo yari kuzakina umukino wo kwishyura uzabera i Turin mu Butaliyani ku itariki ya 7 y'ukwezi kwa cumi na kumwe.

Bisobanuye ko atazakina mu mukino utaha uzahuza Juventus n'ikipe ya Young Boys yo mu Busuwisi ku itariki ya 2 y'ukwezi gutaha kwa cumi.

Bitandukanye no muri shampiyona ya Premier League yo mu Bwongereza aho uweretswe ikarita itukura adakina imikino itatu ikurikiyeho, ibihano bya Uefa byo bitangwa bitewe n'umwihariko wa buri kosa.

Guhagarikwa umukino umwe ukurikiyeho ni itegeko muri Uefa aho umukinnyi weretswe ikarita itukura atemerewe no kujurira, ariko amategeko ya Uefa agenga amarushanwa mu ngingo yayo ya 50.01 avuga ko "iyo hakozwe amakosa akomeye cyane, akanama k'ubugenzuzi n'imyitwarire kemerewe kongera igihano."

Cristiano, watwaye igikombe cya Champions League inshuro eshanu, yageze muri Juventus ku mpeshyi ishize aguzwe amapawundi miliyoni 99 n'ibihumbi 200, avuye mu ikipe ya Real Madrid.