Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Real Madrid iri kwiga ku kuba yagurisha Cristiano Ronaldo muri Juventus
Ikipe ya Real Madrid iri kwiga ku giciro cya miliyoni 100 z'ama Euro yagejejweho n'ikipe ya Juventus ngo ibe yagurisha rutahizamu wayo Cristiano Ronaldo.
Cristiano, Umunyaportugali w'imyaka 33 y'amavuko, ni we mukinnyi umaze gutsindira Real Madrid ibitego byinshi kurusha abandi mu mateka y'iyi kipe. Agejeje ku bitego 451.
Ariko imyaka ye ndetse no kuba Real ishaka kongera kwivugurura nyuma yo kurangiza irushwa amanota 17 na Barcelona yatwaye igikombe cya shampiyona ya Liga yo muri Espanye mu mwaka ushize w'imikino, byatumye ikipe ya Juventus igira iki gitekerezo cyo kumugura.
Juventus ifite igikombe giheruka cya shampiyona yo mu Butaliyani.
Mu kwezi kwa gatanu, Cristiano yatwaye igikombe cya gatanu cya Champions League ari mu ikipe ya Real Madrid.
Kuva we na Real batwara icyo gikombe mu mukino wa nyuma wabereye i Kiev muri Ukraine batsinzemo Liverpool, Zinedine Zidane yamaze kwegura ku butoza bwa Real ndetse asimburwa n'Umunyespanye Julen Lopetegui.
Ahazaza ha Cristiano umaze gutwara igihembo cy'umukinnyi w'umupira w'amaguru wahize abandi ku isi inshuro eshanu, hamye hateza impaka zikomeye mu myaka micye ishize.
Kandi n'imibanire ye na Florentino Perez, perezida wa Real, nayo yakomeje kwibazwaho byinshi.
Igiciro Juventus yaramuka imuguzeho icyo ari cyo cyose, cyaba kirenze agahigo ka miliyoni 90 z'ama Euro iyi kipe yatanze ubwo yaguraga rutahizamu Gonzalo Higuain w'Umunyargentine, hari mu mwaka wa 2016.
Icyo giciro cyaba kinarenze miliyoni zirenga 80 z'amapawundi Real yatanze mu mwaka wa 2009 ubwo yaguraga Cristiano imukura mu ikipe ya Manchester United yo mu Bwongereza.
