Inkuba yishe abana 13 mu nkambi y'impunzi muri Uganda
Ahavuye isanamu, Oxfam
- Umwanditsi, Wedaeli Chibelushi na Richard Kagoe
- Igikorwa, BBC News
Polisi ya Uganda ivuga ko inkuba yishe abana 13 n'umuntu mukuru umwe mu nkambi y'impunzi yo muri icyo gihugu.
Polisi ivuga ko abo bishwe bari bari mu rusengero basenga ku mugoroba wo ku wa gatandatu ubwo iyo nkuba yakubitaga. Abandi bantu 34 barakomeretse.
Ibyo byabereye mu nkambi y'impunzi ya Palabek, mu karere ka Lamwo mu majyaruguru ashyira uburengerazuba bw'icyo gihugu. Mu gihe cya vuba aha gishize, ako karere kaguyemo imvura nyinshi irimo imirabyo n'inkuba.
Kituuma Rusoke, umuvugizi wa polisi ya Uganda, yabwiye BBC News ko uwo muntu mukuru uri mu bishwe n'inkuba ku wa gatandatu yari umugabo w'imyaka 21.
Mu itangazo yasohoye nyuma ku rubuga nkoranyambaga X, polisi ya Uganda yatangaje ko abandi bishwe n'inkuba bafite hagati y'imyaka icyenda na 18.
Ishami ry'Umuryango w'Abibumbye ryita ku mpunzi (UNHCR) rivuga ko inkambi y'impunzi ya Palabek icumbikiye impunzi n'abasaba ubuhungiro bose hamwe barenga 80,000. Benshi baturuka muri Sudani y'Epfo ihana imbibi na Uganda.
Mu myaka ine ishize, inkuba yishe abana 10 mu mujyi wa Arua, na wo wo mu majyaruguru ashyira uburengerazuba bwa Uganda.
Icyo gihe abo bana bakubiswe n'iyo nkuba ubwo bari babaye bafashe akaruhuko, mu mukino w'umupira w'amaguru wabahuzaga.
