Igikombe cy'isi 2022: Kapiteni wa Iran Ehsan Hajsafi yavuze ku bibera iwabo
Ahavuye isanamu, Getty Images
Kapiteni w'ikipe y'igihugu ya Iran, Ehsan Hajsafi, yamaganye uko ibintu bimeze mu gihugu cye, mbere y'umukino wa mbere w'iyi kipe uyihuza n'Ubwongereza mu gikombe cy'isi kuri uyu wa mbere.
Mu mezi ya vuba aha ashize, imyigaragambyo irimo urugomo yo kwamagana leta muri Iran yarwanyijwe n'abashinzwe umutekano mu buryo burimo urugomo rwinshi.
Aganira n'abanyamakuru mbere y'uwo mukino muri Qatar, uyu mukinnyi w'imyaka 32 yavuze ko abakinnyi "bashyigikiye" abapfuye.
Yagize ati: "Tugomba kwemera ko uko ibintu bimeze mu gihugu cyacu atari byo [bidakwiye] kandi abantu bacu ntibishimye".
Impirimbanyi ziharanira uburenganzira bwa muntu zavuze ko abigaragambya barenga 400 bishwe naho abandi 16,800 batabwa muri yombi mu gikorwa cyo guhangana na bo cy'abashinzwe umutekano.
Abategetsi ba Iran bavuga ko iyo myigaragambyo ari "imvururu" ziterwa n'abanzi b'iki gihugu bo mu mahanga.
Mu ntangiriro y'ikiganiro n'abanyamakuru, myugariro Hajsafi yagize ati: "Mbere y'ikindi kintu icyo ari cyo cyose, nifuzaga kwihanganisha imiryango yose yabuze abayo muri Iran.
"[Imiryango] Ikwiye kumenya ko turi kumwe na yo, turayishyigikiye kandi twifatanyije na yo mu kababaro".
Uyu myugariro ukina mu ikipe ya AEK Athens yo mu Bugereki yongeyeho ati:
"Ntidushobora guhakana ibintu – ibintu mu gihugu cyanjye ntibimeze neza kandi abakinnyi na bo barabizi.
"Turi hano ariko ntibivuze ko tudakwiye kuba ijwi ryabo, cyangwa ko tutagomba kububaha.
"Icyo dufite icyo ari cyo cyose ni bo tugicyesha. Tugomba guhatana, tugomba gukina neza cyane uko dushoboye kandi tugatsinda ibitego, ubundi tukageza umusaruro ku bantu b'intwari ba Iran.
"Kandi nizeye ko ibintu bihinduka bikaba uko abantu babyiteze".
Mbere y'iki gikombe cy'isi, abantu barimo n'ishyirahamwe ry'umupira w'amaguru muri Ukraine bari basabye ko Iran ikurwa muri iri rushanwa.
Impirimbanyi zishingira ku bivugwa ko igisirikare cya Iran gishyigikiye igitero cy'Uburusiya kuri Ukraine ndetse n'ibibazo ku burenganzira bwa muntu, birimo n'uburyo Iran ifata abagore.
